Ol Blesing Bilong Wok Painia
1 Wanpela painia i tok: “Wok bilong autim tok i tru long ol man, dispela i mekim na bel bilong mi i gutpela tru, mi save i no gat narapela wok inap mekim olsem long mi.” Narapela i tok: “Long pinis bilong olgeta de, mi save slip gut, na amamas i pulap tru long bel bilong mi.” Tok bilong ol dispela painia i kamapim tingting bilong ol brata sista long olgeta hap, em ol i bin kisim ol blesing bilong wok painia.—Snd. 10:22.
2 Wok bilong helpim ol narapela long kisim save long Baibel—em dispela save inap helpim man long kisim laip—dispela i save mekim man i stap belgut. (Ap. 20:35; 1 Te. 2:19, 20) Wanpela brata em i bin mekim wok painia inap longpela taim pinis, em i tok: “Taim yumi lukim olsem tok bilong God i gat strong long kirapim ol man long senisim pasin bilong ol, dispela i strongim bilip bilong yumi na yumi amamas.” Yes, taim ol painia i givim ol yet long helpim ol man na mekim ol Baibel-stadi, ol bai kisim ol kain blesing olsem.
3 Bilip Long Jehova: Long olgeta de ol painia i larim spirit bilong God i strongim ol long mekim wok autim tok, na dispela i save helpim ol long kamapim ol gutpela pasin em holi spirit i as bilong en, na i save lukautim ol. (Ga. 5:16, 22, 23) Na tu, long olgeta taim ol i save mekim wok long Tok Bilong God, olsem na ol i save gut tru long pasin bilong yusim ol skripsa long sambai long tok i tru na bilong strongim ol narapela. (2 Ti. 2:15) Wanpela brata i bin mekim wok painia inap planti yia pinis, em i tok: “Wok painia i bin helpim mi long kisim bikpela save long Baibel, na mi bin mekim wok long dispela save bilong helpim planti man long kisim save long Jehova na long ol samting em i tingting pinis long kamapim.” Em gutpela samting tru, a?
4 Long planti narapela samting tu, ol painia i mas bilip long Jehova. Taim ol i lukim em i blesim ol wok ol i mekim bilong lukautim ol yet long ol samting bilong skin, dispela i save strongim bilip bilong ol. Wanpela painia i gat 72 krismas na em i bin mekim wok painia inap 55 yia pinis, em i tok: “I no gat wanpela taim Jehova i bin lusim mi.” Na tu, ol painia i no tingting long kisim planti samting bilong skin, olsem na ol i abrusim planti hevi. Olsem wanem? Yu tu i laik abrusim ol hevi?—Mt. 6:22; Hi. 13:5, 6.
5 Go Klostu Long God: Pasin bilong yumi long pas gut wantaim Jehova em i wanpela gutpela samting tru. (Sng. 63:3) Taim pasin bilong laikim Jehova i as na yumi insait tru long wok autim tok, yumi save go klostu moa long em. (Jems 4:8) Wanpela brata i bin mekim wok painia winim 18 yia pinis, em i tok: “Wok painia i save givim rot long yumi na yumi inap ‘traim na lukim na save olsem Bikpela i gutpela tru,’ na long olgeta de yumi wok long pas strong moa wantaim Man bilong wokim yumi.”—Sng. 34:8.
6 Ol samting long sindaun bilong ol painia i mas orait long ol i ken mekim dispela wok, na tu, ol i mas i gat strongpela bilip, ol i mas laikim tru God na ol man, na ol i mas redi long lusim sampela samting bilong ol yet. (Mt. 16:24; 17:20; 22:37-39) Tasol long olgeta hap yumi lukim pes bilong ol painia i lait, na dispela i kamapim klia olsem ol blesing ol i kisim i winim tru ol samting ol i bin lusim. (Mal. 3:10) I no ol painia tasol i kisim ol blesing, nogat. Gutpela pasin bilong ol i helpim famili bilong ol na kongrigesen wantaim.—Fl. 4:23.
[Askim Bilong Stadi]
1, 2. Wanem ol blesing i save kamap long rot bilong wok painia? Bilong wanem i olsem?
3, 4. Olsem wanem wok painia i skulim man long bilip long Jehova? Olsem wanem dispela i save helpim man long kamap strong long ol samting bilong spirit?
5. Olsem wanem wok painia i helpim man long go klostu moa long Jehova?
6. Ol painia i mas gat wanem ol samting? Na husat ol narapela tu i save kisim helpim?