Kisim Pasin Bilong Pas Gut Wantaim Jehova

¹ Wanpela sista Kristen i tok: “Inap 20 yia mi bin go long ol miting na autim tok, tasol i no olsem mi insait tru long tok i tru, nogat.” Na em i tok moa: “Tru, pasin bilong go long ol miting na autim tok em i bikpela samting, tasol dispela tupela samting tasol i no inap long strongim mi taim ol hevi i kamap. . . . Nau mi save pinis, mi mas stretim tingting bilong mi na stadi gut bambai mi inap save gut long Jehova na laikim em tru na pilim tru ol gutpela samting Pikinini bilong em i bin mekim bilong helpim yumi.”

² Bilong pas gut wantaim Jehova yumi mas wok strong. Yumi no bihainim nating wanpela pasin bilong mekim ol wok bilong spirit na em tasol, nogat, yumi mas mekim sampela samting moa. Sapos yumi no toktok wantaim Jehova long olgeta taim, bihain em inap kamap olsem wanpela pren em bipo yumi bin pas gut wantaim em tasol nau yumi no save toktok moa wantaim em. (KTH 2:4) Orait yumi ken skelim olsem wanem pasin bilong mekim stadi bilong yumi yet long Baibel na beten inap helpim yumi long kisim pasin bilong pas gut wantaim Jehova.—Sng. 25:14.

³ Beten na Tingim Tingim Long Bel i Bikpela Samting: Pasin bilong mekim stadi bilong yumi yet na bai dispela i ken helpim bel bilong yumi, dispela i no olsem yumi makim ol bikpela tok long buk yumi stadi long en na lukim ol skripsa na em tasol, nogat. Yumi mas tingting long ol tok yumi stadi long en i kamapim wanem samting long ol pasin na lo bilong Jehova. (Kis. 33:13) Taim yumi kisim gut save long ol samting bilong spirit, dispela i save mekim sampela samting long bel bilong yumi na kirapim yumi long tingim i stap bilong yumi yet. (Sng. 119:35, 111) Taim yumi mekim stadi, yumi mas i gat tingting long i go klostu long Jehova. (Jems 4:8) Bilong yumi ken stadi gut, yumi mas i gat taim na wanpela hap we i gutpela bilong mekim stadi, na yumi mas bosim gut skin bambai yumi inap stadi long olgeta taim. (Dan. 6:10) Maski yu bisi long olgeta taim, yu save makim taim long olgeta de long tingim tingim ol gutpela pasin bilong Jehova?—Sng. 119:147, 148; 143:5.

⁴ Pasin bilong pilim tru long bel na beten em i bikpela samting long taim yumi mekim stadi bilong yumi yet. Bilong tok i tru bilong Baibel i ken kirapim bel bilong yumi long “litimapim nem bilong em na pret long em na aninit long em,” yumi mas kisim holi spirit bilong God. (Hi. 12:28) Olsem na bilong kirapim stadi bilong yumi yet, yumi mas askim Jehova long givim spirit bilong em long yumi. (Lu. 11:13) Taim yumi tingim tingim ol tok bilong Baibel na mekim wok long ol buk bilong stadi em oganaisesen bilong Jehova i redim, yumi kamapim bel bilong yumi long Jehova. (Sng. 62:8) Taim yumi bihainim dispela pasin na mekim stadi, dispela i wanpela wok lotu yumi mekim na long rot bilong en yumi kamapim klia olsem yumi givim bel long Jehova na yumi strongim pasin bilong yumi long pas gut wantaim em.—Ju. 20, 21.

⁵ Wankain olsem yumi save mekim long pasin bilong yumi long pas gut wantaim ol narapela, oltaim yumi mas lukautim pasin bilong yumi long pas gut wantaim Jehova bambai dispela pasin i ken wok long kamap strong moa. Olsem na long olgeta de yumi mas makim hap taim bilong mekim ol samting bilong i go klostu long God, na yumi save olsem em tu bai i kam klostu long yumi.—Sng. 1:2, 3; Ef. 5:15, 16.

[Askim Bilong Stadi]

1. Wanpela sista i luksave long wanem samting long pasin bilong em long mekim ol wok bilong spirit?

2. Bilong wanem em i bikpela samting long kisim pasin bilong pas gut wantaim Jehova?

3. Taim yumi mekim stadi bilong yumi yet, yumi mas bihainim wanem pasin na bai dispela i ken helpim yumi long i go klostu long God?

4. Olsem wanem pasin bilong beten long taim bilong stadi inap helpim yumi long kisim pasin bilong pas gut wantaim Jehova?

5. Bilong wanem em i bikpela samting long yumi mas tingim tingim tok bilong God long olgeta de?