Namba 5 Hap—Mekim Ol Baibel Stadi i Save Helpim Ol Man
Skelim Hamas Paragraf Bilong Stadi
1 Taim Jisas i skulim ol disaipel, em i tingim save bilong ol, na em i toktok long ol “inap long mak bilong tingting bilong ol.” (Mk. 4:33; Jo. 16:12) Olsem tasol, ol tisa bilong Tok Bilong God long nau i mas skelim ol bai stadi hariap liklik o isi isi wantaim sumatin. Hamas paragraf ol bai mekim insait long wanpela stadi i mas stret long sindaun na save bilong tisa na sumatin.
2 Helpim Ol Long Kisim Strongpela Bilip: Sampela sumatin bai kliagut long tok yu lainim ol long en long wanpela stadi, tasol yu mas stadi wantaim sampela sumatin tupela o tripela taim bilong ol i ken kliagut long wankain samting. Yumi no ken hariap tasol long pinisim stadi long buk na nau sumatin i no kisim ol stretpela save. Olgeta sumatin i mas save long as tru bilong nupela bilip ol i kisim long Tok Bilong God.—Snd. 4:7; Ro. 12:2.
3 Taim yu mekim stadi long olgeta wan wan wik, wok long helpim sumatin long kliagut na bilipim ol samting em i lainim long Baibel, maski yu mas lusim planti taim long mekim olsem. Abrusim pasin bilong stadi hariap hariap na sumatin i no kisimgut insait bilong tok i tru em i skul long en. Stori gut long ol bikpela tok na ol skripsa i as bilong ol samting em i skul long en.
4 No Ken Stori Planti Long Ol Liklik Tok: Yumi no laik pinisim hariap ol paragraf, na tu, yumi laik abrusim pasin bilong toktok long sampela narapela samting. Sapos sumatin i stori planti long ol hevi bilong em, stretim rot bilong stori long ol dispela samting bihain long pinis bilong stadi.—Sav. 3:1.
5 Tasol pasin bilong yumi long laikim tok i tru inap mekim na i hatwok long abrusim pasin bilong stori planti long taim bilong stadi. (Sng. 145:6, 7) Sampela taim yu ken kamapim sampela narapela tok o ekspiriens bilong helpim sumatin, tasol yumi no laik pulim longpela stori tru na dispela i pasim sumatin long kisim stretpela save long ol tok bilong Baibel.
6 Long rot bilong mekim ol paragraf inap long skel bilong sumatin, yumi inap helpim ol Baibel sumatin long “wokabaut long lait Bikpela i givim.”—Ais. 2:5.