Tingim Gut Man—Mekim Ol Askim na Putim Gut Yau
1 Klostu olgeta man i amamas long kamapim tingting bilong ol, tasol ol i no laik bai narapela i mekim tok bilong stretim ol o sutim planti askim long ol. Olsem na yumi ol wokman Kristen i mas lain long kamapim ol gutpela askim i kirapim ol man long kamapim tingting bilong ol.—Snd. 20:5.
2 Ol askim bilong yumi i mas kirapim man long wokim tingting, ol i no ken mekim man i tingting planti. Taim wanpela brata i autim tok long ol haus, em i save askim ol man, “Yu ting wanpela taim bai kamap we narapela bai mekim gutpela pasin rispek long narapela?” Em i tingim tok man bilong haus i mekim na i tok, “Yu ting dispela samting inap kamap long wanem rot?” o “I gat wanem as na yu ting olsem?” Taim wanpela brata i autim tok long kain kain taim na ples na long ol pablik ples, em i save askim ol man i gat pikinini, “Wanem wok bilong papamama i save givim bikpela amamas long yu?” Bihain em i tok, “Yu save tingting planti long wanem samting?” Ol dispela askim i opim rot long ol man i ken kamapim tingting bilong ol na i no semim ol. Sindaun bilong ol man i no wankain, olsem na ating yumi mas senisim ol askim na pasin bilong kamapim ol askim na bai i stret long ol man i stap long teritori.
3 Kirapim Ol Man Long Kamapim Tingting: Sapos ol manmeri i amamas long kamapim tingting bilong ol, putim gut yau long tok bilong ol na no ken katim tok. (Jem. 1:19) Mekim sampela gutpela tok i kamapim olsem yu putim yau long tok bilong ol. (Kl. 4:6) Ating yu ken tok: “Gutpela yu kamapim tingting bilong yu. Tenkyu tru long tokim mi long dispela.” Mekim gutpela tok amamas sapos i gat as na yu ken mekim olsem. Long gutpela pasin mekim sampela narapela askim bilong painimaut tingting bilong ol na i gat wanem as na ol i ting olsem. Painim sampela tok yupela i wanbel long en. Taim yu laik kirapim man long skelim wanpela skripsa, yu inap tok, “Sampela taim yu bin ting dispela em i wanpela rot i ken helpim yumi?” No ken tok pait o kamapim olsem tingting bilong yu tasol i stret.—2 Ti. 2:24, 25.
4 Pasin bilong yumi yet long putim gut yau long tok bilong ol narapela inap mekim na ol i amamas long bekim ol askim bilong yumi. Ol manmeri inap luksave sapos tru tru yumi putim gut yau long tok bilong ol. Wanpela wasman raun i tok, “Taim yu soim olsem yu amamas long putim yau long tok bilong ol man, dispela i gat bikpela strong long kirapim ol long toktok wantaim yu na em i wanpela gutpela rot bilong soim olsem yu tingim tru man.” Taim yumi putim gut yau long ol narapela, dispela i litimapim nem bilong ol na em inap kirapim ol long harim gutnius yumi laik autim long ol.—Ro. 12:10.