“Bihainim Mi”
1 Planti man i tingting tasol long amamasim ol yet, tasol planti taim ol i no stap amamas. Jisas i tokim ol man long bihainim pasin bilong daunim laik bilong ol yet na givim ol samting long ol narapela man, em dispela pasin i save givim amamas tru long man. (Ap. 20:35) Em i tok: “Sapos wanpela man i laik bihainim mi, orait em i mas daunim laik bilong em yet, . . . na bihainim mi.” (Mk. 8:34) Dispela i no makim olsem man i daunim laik bilong em yet inap wan wan taim tasol. Nogat. Em i makim olsem long olgeta de yumi mas mekim ol samting bilong amamasim Jehova, na i no bilong amamasim yumi yet.—Ro. 14:8; 15:3.
2 Tingim pasin bilong aposel Pol. Pol i “save long Krais Jisas,” olsem na em i lusim pasin bilong inapim ol laik bilong em na em i givim em yet bilong mekim wok bilong Kingdom. (Fl. 3:7, 8) Em i tok: “Mi bai amamas tasol long givim olgeta samting bilong mi, na long givim laip bilong mi tu” bilong helpim ol narapela. (2 Ko. 12:15) Em i gutpela long yumi olgeta i askim yumi yet olsem: ‘Mi save mekim wanem long strong, taim, save, na mani samting bilong mi? Mi tingting tumas long inapim ol laik bilong mi yet, o mi laik mekim ol samting Jehova i laikim?’
3 Ol Rot Bilong Givim: Long olgeta yia, lain bilong God i lusim inap olsem wan bilion aua long wok bilong kisim bek ol man long rot bilong autim tok bilong Kingdom. Insait long kongrigesen, ol yangpela na lapun i save mekim kain kain wok bilong helpim ol narapela. I gat planti wok bilong mekim long ol kibung na wok bilong sanapim na lukautim ol haus bilong mekim lotu i tru. Na tingim gutpela helpim ol brata husat i wok long ol Hospital Lieson Komiti i save givim long yumi. Olgeta dispela gutpela wok i bikpela samting tru long lain brata Kristen bilong yumi!—Sng. 110:3.
4 Rot i op long yumi ken helpim ol narapela taim sampela bikpela bagarap o hevi i kamap. Tasol ating planti taim, yumi luksave olsem wanpela wanbilip Kristen i mas kisim sampela helpim o tok bilong strongim bel bilong em. (Snd. 17:17) Taim yumi redi long givim ol samting bilong yumi yet bilong helpim ol narapela na mekim wok bilong Kingdom, yumi bihainim pasin bilong Jisas. (Fl. 2:5-8) Gutpela sapos yumi wok strong long mekim olsem long olgeta taim.