Bihainim Jisas Oltaim
1 Wanpela taim Jisas i tok: “Sapos wanpela man i laik bihainim mi, orait em i mas daunim laik bilong em yet, na em i mas karim diwai [pos] bilong en na bihainim mi.” (Mt 16:24) Yumi laik tru long bihainim dispela tok bilong Jisas. Nau yumi ken skelim ol samting yumi mas mekim bilong bihainim wan wan hap tok bilong dispela tok bilong Jisas.
2 “Em i Mas Daunim Laik Bilong Em Yet”: Taim yumi dediketim laip bilong yumi long Jehova, yumi no tingting moa long bihainim ol laik bilong yumi yet. Insait bilong tok Grik ol i tanim olsem “daunim laik bilong yumi yet,” em i olsem yumi mas tok “Nogat” long laik bilong yumi. Olsem na yumi lusim ol samting yumi gat laik long en, na sampela gutpela samting bilong skin, na ol samting bilong amamasim yumi yet, na yumi tingting strong long amamasim Jehova i go inap long olgeta taim bihain.—Ro 14:8; 15:3.
3 “Em i Mas Karim Diwai [Pos] Bilong En”: I stap bilong ol Kristen em bilong givim ol yet long mekim wok bilong Jehova, olsem karim wanpela pos. Wanpela rot bilong kamapim olsem yumi no tingim yumi yet, em yumi ken taitim bun tru long mekim wok autim tok. Planti pablisa i bin amamas long mekim wok painia haptaim long dispela yia. Ating yu wanpela bilong ol na yu inap tok olsem, ol blesing yu kisim i winim tru ol hatwok yu mekim. Sampela em ol i no inap mekim wok painia haptaim, ol i bin stretim rot bilong mekim bikpela wok autim tok moa olsem pablisa bilong kongrigesen. Bilong inapim dispela, sampela kongrigesen i wok long mekim bung bilong autim tok sampela minit paslain long taim bipo ol i bin mekim bung long en. Na tu, taim sampela i tingting long autim tok long ‘wanpela haus moa’ o long mekim wok moa ‘inap sampela minit tasol,’ ol gutpela samting i bin kamap.
4 Narapela rot bilong kamapim olsem yumi no tingim yumi yet, em yumi ken putim ol mak yumi yet i laik winim. Sampela i bin skelim gut ol samting na stretim sedyul bilong ol na ol i kamap painia oltaim. Sampela i bin stretim ol samting bilong ol bambai ol i ken wok long Betel o mekim wok misineri. Sampela i bin i go long ol hap i no gat planti pablisa.
5 “Bihainim Mi”: Maski planti traim i bin painim ol disaipel bilong Jisas, pasin bilong Jisas long givim bel na sanap strong long autim tok i bin strongim ol. (Jo 4:34) Taim em i stap wantaim ol, ol i pilim olsem ol i kisim nupela strong. Olsem na ol manmeri i bihainim em, ol i bin amamas tru. (Mt 11:29) Yumi tu i mas strongim narapela narapela long sanap strong na mekim dispela bikpela wok bilong autim tok bilong Kingdom na kamapim ol disaipel.
6 Yumi olgeta i mas harim singaut bilong Jisas long bihainim em oltaim, na yumi mekim olsem taim yumi no tingim yumi yet. Taim yumi mekim olsem, bai yumi i stap amamas tru long nau na yumi ken kisim planti blesing long bihain.