Yu Redi Sapos Bikpela Bagarap i Kamap?
1 Long olgeta yia, planti milion manmeri long olgeta hap, na ol bratasista bilong yumi tu, ol i save kisim bagarap long graun i guria, sunami, bikpela ren, saiklon, volkeno i pairap, na tait wara. Ol bikpela bagarap olsem i save kamap long taim yumi no tingim na em inap painim yumi olgeta, olsem na em i savepasin long redi paslain long kain samting olsem i kamap.—Snd. 21:5.
2 Redi Gut Pastaim: Sampela taim ol wokman bilong gavman bai toksave long bagarap i laik kamap. Em i bikpela samting long putim yau long kain tok lukaut olsem. (Snd. 22:3) Long kain taim olsem ol elda bai traim long painim olgeta bratasista insait long kongrigesen bilong helpim ol long redim ol samting. (Long ol kongrigesen o ol grup we i no gat ol elda, wasman sekit na sampela narapela brata i mas helpim ol brata na sista long redim ol samting.) Bihain long bagarap, ol elda bai traim long painim olgeta i save bung wantaim kongrigesen bilong save ol i stap orait o nogat, na ol i ken mekim wanem ol samting bilong helpim ol. Bikpela taim inap lus nating sapos ol elda i no gat atres na telefon namba bilong ol pablisa. Olsem na i gutpela ol pablisa i givim atres na telefon namba long kuskus na wasman bilong Buk Stadi bilong ol.
3 Sapos kongrigesen i stap long wanpela hap we bagarap inap kamap, orait ol elda i ken askim ol pablisa long givim nem na telefon namba bilong wanpela wanblut o pren husat i no sindaun long dispela ples, na sapos hevi i kamap ol elda i ken ringim ol. Dispela bai helpim ol elda long painim ol bratasista i bin lusim dispela ples long taim bagarap i kamap. Ol elda i ken stretim rot long ol samting kongrigesen i mas mekim sapos hevi i kamap. Olsem ol i ken wokim wanpela lista bilong ol samting ol wan wan pablisa i mas i gat, kain olsem marasin na kaikai samting, na ol samting ol i ken mekim bilong lusim ples, na olsem wanem ol i ken helpim ol lapun o ol lain i sik samting. Em i bikpela samting long yumi wok gut wantaim ol elda o ol brata i go pas.—Hi. 13:17.
4 Bihain Long Hevi: Yu mas mekim wanem sapos bagarap i kamap long ples bilong yu? Yu mas mekim ol samting bilong lukautim famili bilong yu long ol samting bilong skin. Sapos yu inap, orait helpim ol narapela i bin kisim bagarap. Yu mas toksave hariap long wasman bilong Buk Stadi bilong yu o narapela elda. Yu mas mekim olsem maski yu no kisim bagarap na i no gat wok long ol i helpim yu. Sapos yu mas kisim helpim, orait yu ken bilip tru olsem ol brata bai mekim ol samting ol inap mekim bilong helpim yu. (1 Ko. 13:4, 7) Tingim olsem Jehova i lukim hevi bilong yu; bilip long em bai i helpim yu. (Sng. 37:39; 62:8) Redi long helpim ol narapela long ol samting bilong skin na spirit. (2 Ko. 1:3, 4) Kirap hariap long mekim ol wok bilong spirit.—Mt. 6:33.
5 Tru, taim ol bagarap i kamap ol man i tingting planti na wari, tasol yumi save olsem ol gutpela samting bai kamap bihain. Klostu nau ol bikpela bagarap bai kamap olsem samting bilong bipo tasol. (KTH 21:4) Long nau, yumi ken mekim ol samting bilong redi long taim bilong hevi na givim bel yet long autim gutnius.
[Askim Bilong Stadi]
1. Bilong wanem em i savepasin long redi paslain long bikpela bagarap i kamap?
2. Bilong wanem yumi mas toksave long ol elda long atres na telefon namba bilong yumi?
3. Sapos yumi sindaun long ples we bagarap inap kamap, yumi ken mekim wanem na bai yumi wok gut wantaim ol elda?
4. Yumi mas mekim wanem sapos bagarap i kamap long hap bilong yumi?
5. Yumi ol Kristen i gat wanem tingting long ol bikpela bagarap i kamap?