Wanpela famili i lukim bagarap i kamap long hap ol i stap long en bihain long netrol disasta

Baibel i Tok Wanem Long Ol Netrol Disasta?

Tok Baibel i mekim

God i no save kamapim ol netrol disasta we i kamap long nau, tasol em i save tingim ol manmeri husat i karim hevi bilong ol dispela netrol disasta. Kingdom Bilong God bai pinisim ol netrol disasta, em wanpela bilong ol samting we i save kamapim pen na hevi. Tasol long nau yet, God i save mekim isi bel bilong ol manmeri husat i karim hevi bilong ol netrol disasta.—2 Korin 1:3.

Wai na yumi ken bilip olsem ol netrol disasta i no panismen i kam long God?

Ol netrol disasta i no wankain long win na ren samting em God i yusim olsem ol stori i stap long Baibel.

Ol netrol disasta i save bagarapim na kilim i dai olgeta kain man. Tasol ol stori bilong Baibel i kamapim klia olsem God i save bagarapim ol man nogut tasol. Olsem, taim God i bagarapim taun Sodom na Gomora, em i no bagarapim gutpela man Lot na tupela pikinini meri bilong em. (Stat 19:29, 30) Long dispela taim, God i lukim bel bilong olgeta wan wan na em i baragapim tasol ol man i bin mekim pasin nogut.—Stat 18:23-32; 1 Samuel 16:7.
Ol netrol disasta i save givim liklik tok lukaut o sampela taim nogat tok lukaut. Tasol God i no save mekim olsem, em i givim tok lukaut long ol man nogut paslain long em i yusim win na ren samting bilong bagarapim ol. Ol manmeri husat i bihainim ol tok lukaut, ol inap long abrusim bagarap.—Stat 7:1-5; Matyu 24:38, 39.
Inap sampela haptaim, ol samting ol man i mekim i kamapim sampela netrol disasta. Hau? Long rot bilong bagarapim ol samting long graun na wokim ol haus long ol hap we i gat planti guria, bikpela tait wara, na strongpela win na ren samting. (Revelesen 11:18) Em i no rong bilong God long ol disisen ol man i mekim.—Provep 19:3.

Yu ting ol netrol disasta em wanpela sain bilong las de?

Yes, ol tok profet bilong Baibel i kamapim olsem bai i gat planti bikpela bagarap long taim bilong “pinis bilong dispela taim,” o “long taim bilong las de.” (Matyu 24:3; 2 Timoti 3:1) Olsem, Jisas i stori long taim bilong yumi, na i tok: “Bai i gat taim bilong ol bikpela hangre na ol guria bai kamap long narapela narapela hap.” (Matyu 24:7) Klostu nau, God bai pinisim olgeta samting i save kamapim pen na hevi, na tu, ol netrol disasta.—Revelesen 21:3, 4.

Hau na God i helpim ol lain i karim hevi bilong ol netrol disasta?

God i save mekim isi bel bilong ol manmeri husat i karim hevi long rot bilong Tok bilong em, Baibel. Baibel i tokim yumi olsem God i save tingim yumi na em i pilim hevi bilong yumi long taim yumi karim pen na hevi. (Aisaia 63:9; 1 Pita 5:6, 7) Na tu, em i promis olsem wanpela taim bai kamap na bai i no gat ol netrol disasta.—Lukim “Ol tok bilong Baibel bilong mekim isi bel bilong ol lain husat i karim hevi bilong ol netrol disasta.”
God i helpim ol lain i karim hevi bilong ol netrol disasta long rot bilong ol man i lotuim em. God i yusim ol man i lotuim em long graun long bihainim eksampel bilong Jisas. Tok profet i tokaut olsem Jisas bai mekim isi bel bilong “ol man husat i bel hevi tru” na “olgeta man i krai sori.” (Aisaia 61:1, 2) Ol man i lotuim God i wok strong long mekim olsem.—Jon 13:15.

God i yusim tu ol man i lotuim em long givim helpim long ol lain i karim hevi bilong ol netrol disasta.—Aposel 11:28-30; Galesia 6:10.

Ol Witnes Bilong Jehova i stretim wanpela haus long Pueto Riko — Ol Witnes Bilong Jehova i givim helpim long ol lain i karim hevi bilong hariken long Pueto Riko

Yu ting Baibel inap helpim yu long redim yu yet paslain long ol netrol disasta?

Yes. Maski Baibel i no wanpela buk bilong redim man paslain long disasta, em i kamapim ol stiatok we inap helpim man. Eksampel:

Mekim plen long samting yu bai mekim long taim ol disasta i kamap. Baibel i tok: “Man i gat pasin bilong tingting gut na mekim samting, em i lukim hevi na em i haitim em yet.” (Provep 22:3) Em savetingting long mekim plen long samting yumi ken mekim paslain long hevi i kamap. Dispela i makim tu olsem, yumi ken redim imejensi saplai na mekim prektis wantaim famili long wanem hap bai yumi bung sapos disasta i kamap.
Tingim laip olsem bikpela samting winim ol narapela samting. Baibel i tok: “Yumi no bin bringim wanpela samting i kam long dispela graun, na taim yumi lusim dispela graun, yumi no inap karim wanpela samting i go.” (1 Timoti 6:7, 8) Yumi mas redi long lusim haus na ol samting bilong yumi na bai yumi ken abrusim disasta. Yumi mas tingim olsem laip i bikpela samting winim ol samting yumi holim.—Matyu 6:25.

Ol tok bilong Baibel bilong mekim isi bel bilong ol lain husat i karim hevi bilong ol netrol disasta

Stat 18:25: “Mi no ting [God] inap mekim dispela pasin na kilim i dai ol stretpela man wantaim ol man nogut . . . Ating Jas bilong graun olgeta bai no inap mekim stretpela pasin, a?”

Mining: Oltaim God i save mekim stretpela pasin; em i no rong bilong em na ol gutpela manmeri i dai long ol netrol disasta.

Buk Song 46:1, 2: “God em i ples hait bilong yumi na em i save strongim yumi. Long taim hevi i painim yumi, em i save redi long helpim yumi. Olsem na yumi no ken pret, maski ol senis i kamap long graun.”

Mining: Maski wanem samting i painim yumi, yumi ken bilip olsem God bai strongim yumi.

Aisaia 63:9: “Long taim ol i stap bel hevi, dispela i mekim em tu i bel hevi.”

Mining: God i save pilim tru hevi—em i bel hevi taim yumi karim pen na hevi.

Jon 5:28, 29: “Taim i laik kamap na olgeta man i stap long matmat ol bai harim nek bilong [Jisas] na kam ausait.”

Mining: Yumi ken bilip na wet long lukim gen ol lain em yumi laikim tru i kirap bek bikos God bai givim strong long Jisas long kirapim bek ol man i dai pinis.

1 Pita 5:6, 7: “Yupela i mas daunim yupela yet na stap aninit long strongpela han bilong God. . . . God i save wari long yupela, olsem na yupela i mas putim olgeta hevi bilong yupela long han bilong em.”

Mining: God i save tingim tru yumi na em i laik bai yumi beten long em na tokim em long olgeta hevi bilong yumi.

Revelesen 21:4: “[God] bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen. Ol dispela samting bilong bipo ol i pinis olgeta.”

Mining: God bai pinisim olgeta samting i save kamapim pen na hevi, dispela i makim tu ol netrol disasta.