Ol Man i Askim
Ol Bikpela Bagarap Bilong Win na Ren Samting Em Panismen i Kam Long God?
God i no save yusim ol bagarap bilong win na ren samting bilong givim panismen long ol man i no gat asua. Em i no bin mekim olsem bipo na em bai i no inap mekim long bihain. Bilong wanem? Long wanem, Baibel long 1 Jon 4:8 i tok: “God em i as bilong pasin laikim.”
Pasin laikim em as tru bilong olgeta samting God i mekim. Man i gat pasin laikim i no save bagarapim ol man i no gat asua, long wanem, Baibel i tok, “man i save givim bel bilong em long arapela man, em i no save mekim pasin nogut long em.” (Rom 13:10) Long Jop 34:12, Baibel i tok: ‘God i no inap mekim pasin i no stret.’
Tru, Baibel i tok profet olsem long taim bilong yumi bai ol bikpela bagarap i kamap, kain olsem ol “bikpela guria.” (Luk 21:11) Tasol dispela i no makim olsem Jehova i as bilong ol bagarap i kamap long ol dispela rot, nogat. I wankain olsem man i gat save long skelim win na ren samting na em i tokaut long saiklon bai kamap, tasol em i no as bilong ol bagarap dispela saiklon i kamapim. Sapos God i no mekim ol bikpela bagarap bilong win na ren samting i kamap, orait wanem samting i kamapim ol dispela bagarap?
Baibel i tokaut olsem “dispela graun olgeta em i stap aninit long strong bilong Satan.” (1 Jon 5:19) Em i bin stap man bilong bagarapim ol man kirap long taim em i bikhet long taim bilong Adam na Iv na i kam inap long nau. (Jon 8:44) Satan i ting laip bilong man em i pipia samting nating tasol. Pasin bilong tingim em yet tasol i bosim em, olsem na yumi no kirap nogut olsem dispela pasin i bosim dispela graun. Long nau ol gavman i orait long ol man husat i tingim ol yet tasol long mekim nogut long ol arapela man, dispela i mekim na ol man em ol i no gat strong bilong helpim ol yet, ol i sindaun long ol hap we ol inap kisim bagarap long ol bikpela win na ren samting o kisim bagarap long ol samting ol man yet i kamapim. (Efesus 2:2; 1 Jon 2:16) Ol man i gat gridi pasin ol i gat asua long ol bagarap i painim sampela man. (Saveman 8:9) Olsem wanem dispela samting i kamap?
Ol man i gat hap asua long planti bikpela bagarap i kamap. Olsem, tingim bikpela bagarap em tait wara i bin kamapim long ol manmeri i stap long hap bilong New Orleans, Yunaitet Stets, o long graun i bruk long ol maunten bilong Veneswela na karamapim ol haus. Long taim dispela tupela samting i bin kamap na long planti arapela taim tu, ol samting olsem win na ren i kamapim bikpela bagarap, long wanem, ol man i no save gut long ol samting bilong win na ren, ol i no wokim gut ol haus, ol i no plenim gut wok ol i mas mekim, ol i no bihainim ol tok lukaut, na sampela dipatmen bilong gavman i lukautim ol dispela samting i mekim kranki ol samting.
Tingim wanpela bagarap i bin kamap long taim bilong ol man i bin raitim Baibel. Long taim bilong Jisas wanpela bikpela haus i bin bruk na i kilim i dai 18 manmeri. (Luk 13:4) Ating as bilong dispela hevi em popaia bilong ol man i kamapim, o “taim nogut” i kamap long taim yumi no ting em bai kamap, o ating tupela samting wantaim—tasol dispela bagarap em i no kot bilong God long givim strafe long ol man nogut.—Saveman 9:11.
Yu ting i gat sampela bikpela bagarap em God i bin kamapim? Yes i gat, tasol em i no wankain long ol bagarap bilong win na ren o bagarap ol man i kamapim, nogat. Taim Jehova i kamapim bagarap em i save makim bagarap i mas painim husat, na i gat as na em i kamapim dispela bagarap, na em i kamapim kain bagarap long wan wan taim tasol. Bikpela Tait Wara long taim bilong Noa na bagarap i bin painim Sodom na Gomora long taim bilong Lot em tupela eksampel bilong ol bagarap God i bin kamapim. (Stat 6:7-9, 13; 18:20-32; 19:24) Dispela ol bikpela strafe God i kamapim i rausim ol man nogut, tasol ol stretpela man long ai bilong Jehova ol i stap gut.
Tru tumas, God Jehova i gat rot, em i gat laik, na em i gat strong long pinisim olgeta pen na hevi na mekim gut gen ol samting em ol bagarap bilong win na ren i kamapim. Buk Song 72:12 i tok long Jisas Krais, em King God i makim, na i tok: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol.”