Ol Bikpela Disasta—Bilong Wanem Planti i Kamap?
PLANTI taim nius i save stori long ol bikpela disasta. Long nau planti manmeri moa i kisim bagarap long ol disasta, winim long bipo. Wanpela ripot bilong lain Centre for Research on the Epidemiology of Disasters long Beljam i tokaut olsem long yia 2010 tasol i gat 373 disasta i bin kamap na i kilim i dai 296,000 manmeri.
Taim ol i skelim ol ripot bilong 20 o 30 yia i go pinis, ol i lukim olsem namba bilong ol bikpela bagarap i go bikpela tru. Olsem, namel long yia 1975 na 1999, inap 300 disasta i kamap insait long olgeta wan wan yia. Tasol namel long yia 2000 na 2010, inap olsem 400 disasta i kamap insait long olgeta wan wan yia. Ating yu tu i tingting planti olsem: ‘Bilong wanem planti bikpela disasta i kamap long nau?’
Maski planti man i tok ol kain disasta olsem em “ol wok bilong God,” dispela tok em i no tru. God i no as bilong ol pen na hevi i painim planti manmeri tru long nau. Tasol Baibel i bin tok profet olsem long taim bilong yumi bai i gat planti bikpela bagarap. Olsem, long Matyu 24:7, 8, Jisas i tok: “Bai i gat taim bilong ol bikpela hangre na ol guria bai kamap long narapela narapela hap. Ol dispela samting i olsem stat tasol bilong ol hevi, kain olsem pen i save kamap paslain long meri i laik karim pikinini.” Bilong wanem Jisas i tok profet long ol dispela samting? Dispela bai mekim wanem long yumi?
Jisas, Pikinini Bilong God, em i mekim dispela tok bilong bekim wanpela askim ol disaipel i bin givim long em, olsem: “Wanem sain bai kamap bilong soim olsem . . . pinis bilong dispela taim i kamap pinis?” (Matyu 24:3) Em i kolim ol narapela narapela mak na sampela em ol bikpela bagarap yumi stori pinis long en. Em i mekim dispela tok: “Taim yupela i lukim ol dispela samting i kamap, yupela i mas save olsem Kingdom bilong God i kam klostu.” (Luk 21:31) Olsem na ol dispela bikpela bagarap i mas kirapim yumi long tingim sampela bikpela samting. Ol i kamap bilong makim wanpela bikpela senis bai kamap klostu nau.
Ol Samting i Kamapim Ol Disasta
Tasol planti man i laik save, Sapos God i no as bilong ol dispela disasta, orait husat o wanem samting i as bilong en? Yumi inap kliagut long bekim bilong en sapos yumi tingim wanpela bikpela tok i tru bilong Baibel: “Dispela graun olgeta i stap long han bilong Satan.” (1 Jon 5:19) Dispela ves i kamapim olsem God i no as bilong ol hevi i kamap long graun, nogat, as bilong planti hevi em “Satan,” em birua bilong God, na Baibel i kolim em tu olsem “Devil.”—Revelesen 12:9, 12.
Dispela birua bilong God i tingting long inapim laik bilong em yet tasol, na em i tingim ol manmeri olsem samting em inap bagarapim na pinisim. Satan i bosim dispela graun, olsem na em i kirapim ol manmeri long bihainim wankain pasin olsem bilong em. Baibel i bin tok profet long dispela samting olsem “long taim bilong las de,” ol manmeri bai “laikim ol yet tasol, ol bai laikim tumas mani, ol bai litimapim nem bilong ol yet, ol bai i gat pasin antap.” (2 Timoti 3:1, 2) Olsem na yumi no kirap nogut olsem Satan i mekim na ol man long olgeta hap bilong graun i bihainim tru ol dispela pasin na ol narapela pasin nogut. Em i kirapim ol man long tingim laik bilong ol yet tasol na mekim ol samting we i bagarapim sindaun bilong ol narapela.
Olsem wanem pasin bilong ol man long tingim ol yet tasol i kamapim ol bikpela bagarap? Wanpela ripot bilong Yunaitet Nesen i stori long ol disasta, na i tok: “Planti taim ol man i save sindaun long ol hap we hevi inap painim ol, olsem long ples daun we taitwara inap kamap long en. Na tu, ol man i pinisim ol bikbus na ol ples tais, na dispela i mekim na i hatwok long daunim hevi. Na moa yet, wok ol man i mekim i kamapim planti win nogut na dispela i senisim weda na i mekim solwara i solap.” Maski ol i tok, “wok ol man i mekim” i bilong helpim kantri long kisim bikpela mani moa, tasol tru tru ol dispela wok em bilong inapim laik bilong sampela man tasol.
Long nau, planti saveman i luksave olsem ol wok nogut bilong ol man i mekim na ol disasta i kamapim bikpela bagarap moa. Tru tru, ol man i sapotim wok em Satan i mekim bilong givim bikpela pen na hevi long ol man long rot bilong ol disasta.
Yumi luksave olsem keles pasin bilong ol man i as bilong planti bagarap i save painim ol man. Sampela disasta i no inap kamapim bikpela bagarap sapos em i kamap long hap we i no gat man i stap long en. Long planti hap bilong graun, wok nogut bilong ol man i mekim na bikpela lain manmeri tru i save kisim hevi taim ol bikpela bagarap i kamap, na planti manmeri i gat hevi bilong mani o hevi long sindaun bilong ol na ol i go stap long ol hap we bagarap inap kamap long en. Tru tumas, sampela man i save kisim bagarap long ol disasta, na dispela em i no asua bilong wanpela man, nogat, “taim nogut i save painim yumi olgeta.”—Saveman 9:11.
Sapos yu kisim hevi long wanpela bikpela disasta, orait yu inap mekim wanem bilong karim dispela hevi? Nau yumi bai stori long ol rot bilong lukautim yumi yet na bai yumi no kisim bikpela bagarap long taim bilong ol disasta.