Bihainim Pasin Bilong Krais Long Wok Autim Tok
1 Jisas i stap olsem gutpela piksa em yumi ken bihainim long wok autim tok. Pasin bilong em long laikim tru God na ol manmeri i kamap ples klia long planti taim na long planti rot. Em i lainim ol man i gat pasin daun long tok i tru na em i mekim gutpela-pasin-sori long ol man i bel hevi o ol narapela i daunim ol.—Mt. 9:35.
2 Pasin Bilong Jisas na Ol Tok Em i Lainim Ol Man Long En: Wok politik o wok bilong helpim sindaun bilong ol man i kamap gutpela i no pulim nabaut tingting bilong Jisas. Em i no larim ol narapela wok i pulim tingting o kisim ples bilong namba wan wok bilong em. (Lu. 8:1) Em i putim tingting bilong em long wok bilong autim gutnius bilong Kingdom Bilong God olsem Kingdom tasol em i rot bilong pinisim tru ol hevi bilong ol man. Jisas i gat bikpela wok na sotpela haptaim bilong mekim dispela wok. Taim ol manmeri long Kaperneam i laik bai Jisas i stap long dispela hap, em i tokim ol disaipel: “Maski, yumi go long ol arapela taun . . . Mi laik autim tok long ol tu, long wanem, em dispela wok tasol mi kam bilong mekim.”—Mk. 1:38.
3 Jisas i skulim ol disaipel bilong em, na bihain em i salim ol i go na i tokim ol olsem: “Yupela go na autim tok olsem, ‘Kingdom bilong heven em i kam klostu pinis.’ ” (Mt. 10:7) Em i tokim ol olsem wok bilong Kingdom i mas i stap namba wan samting long laip bilong ol. (Mt. 6:33) Paslain long Jisas i go antap long heven, tok em i mekim long ol disaipel bilong em i kamapim klia ol samting em i laik bai ol i mas mekim. Em i tok: “Yupela i mas i go mekim olgeta lain manmeri i kamap disaipel bilong mi.”—Mt. 28:19.
4 Kingdom Em i Bikpela Samting: Bikpela tok Jisas i autim em Kingdom Bilong God, na em i tokim ol disaipel long mekim wankain pasin. Wok bilong ol man long stretim ol hevi bilong ol i no inap kamap gutpela. (Jer. 10:23) Kingdom Bilong God tasol bai mekim holi nem bilong God na pinisim tru olgeta hevi bilong ol man. (Mt. 6:9, 10) Wok bilong lainim tok i tru bilong Kingdom long ol man i “bel nogut na i wari long olgeta dispela pasin nogut” i wok long kamap, i helpim ol long stap gut na amamas long nau, na ol inap bilip na wet long gutpela samting bai kamap bihain.—Ese. 9:4.
5 Jisas i insait yet long wok bilong autim gutnius bilong Kingdom Bilong God, na em i tok em i sapotim yumi taim yumi mekim dispela wok. (Mt. 28:20) Yumi save bihainim gut pasin bilong Jisas long wok autim tok o olsem wanem? (1 Pi. 2:21) Long dispela taim bilong las de, gutpela sapos yumi mekim olgeta samting yumi inap mekim bilong bihainim pasin bilong Jisas long wok autim tok!