Wanem Taim Kingdom Bilong God Bai Bosim Graun?

JISAS I TOK WANEM OL SAMTING BAI KAMAP?

Jisas i tok: “Wanpela kantri bai pait long narapela kantri na wanpela kingdom bai pait long narapela kingdom. Na bai i gat ol bikpela guria, na long narapela narapela hap bai i gat ol bikpela sik na bikpela hangre.” (Luk 21:10, 11) Olsem ol mak long han i kamapim pingaprin bilong wanpela man, olgeta dispela samting i kamap seim taim i wanpela sain na i makim olsem “Kingdom Bilong God i kam klostu.” Yu lukim ol dispela samting i kamap long olgeta hap? Skelim ol evidens.

1. WOA

Long 1914, woa i kamap na i go long planti hap winim ol narapela taim long bipo! Planti taim ol saveman i tok yia 1914 em yia we bikpela senis i kamap bikos fes wol woa i kirap long dispela taim. Long dispela woa, em fes taim ol i yusim ol bikpela tenk, ol bikpela bom, masin gan, posin ges, na ol narakain strongpela samting bilong pait. Bihain long en namba 2 wol woa i kamap, long dispela woa ol i wokim ol atomik bom. Kirap long 1914, ol man i bin pait long ol woa long wanpela o planti hap, na ol dispela woa i kilim i dai planti milion man.

2. GURIA

Wanpela wok painimaut bilong Britannica Academic i tok, long olgeta yia i gat olsem 100 guria i bikpela inap long “kamapim bikpela bagarap.” Na lain United States Geological Survey i tok olsem “ol rekod mipela i bungim inap longpela taim (kirap long yia 1900), i soim olsem yumi ekspektim klostu 16 bikpela guria long kamap.” Sampela inap ting i gat planti guria bikos i gat ol gutpela wei bilong painimaut, tasol tru tru ol bikpela guria i kamap long olgeta hap bilong graun i kamapim bikpela pen na hevi na planti man i dai winim long bipo.

3. BIKPELA HANGRE

Bikpela hangre i kamap long olgeta hap bikos long woa, korapsen, bikpela hevi long mani, i no lukautim gut gaden, na i no redi gut paslain long ol bikpela ren na san. Lain World Food Programme i stori long “2018 Year in Review” na i tok: “Long olgeta hap bilong graun, 821 milion manmeri i stap hangre—124 milion i sot tru long kaikai.” I no gat gutpela kaikai na klostu 3.1 milion pikinini i dai long olgeta yia. Dispela em risen na long 2011, klostu 45 pesen bilong ol pikinini i dai long olgeta hap bilong graun.

4. BIKPELA SIK

Wanpela nius bilong lain World Health Organization i tok: “Ol bikpela sik i kamap kirap long yia 2001. Ol sik bilong bipo—kolera, na yelo fiva—i kamap gen, na ol nupela sik i wok long kamap—strongpela kus (SARS), sik influensa, sik bilong lang (MERS), Ebola na Zika.” Na sik COVID-19 em sik i kamap nau tasol. Maski ol saientis na dokta i kisim save long planti sik, ol i no inap painim wanpela marasin bilong pinisim olgeta bikpela sik.

5. AUTIM TOK LONG OLGETA HAP

Jisas i kolim narapela hap bilong sain taim em i tok: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.” (Matyu 24:14) Maski graun i pulap long ol bikpela hevi, winim 8 milion manmeri bilong olgeta lain i autim gutnius bilong Kingdom Bilong God long 240 kantri long winim 1,000 tokples. Dispela samting i no bin kamap long bipo.

DISPELA SAIN I MAKIM WANEM SAMTING?

Ol samting i makim sain Jisas i tok long en i kamap tru long nau. Wai na yumi mas save long dispela samting? Bikos Jisas i tok: “Taim yupela i lukim ol dispela samting i kamap, yupela i mas save olsem Kingdom Bilong God i kam klostu.”—Luk 21:31.

Sain Jisas i kolim, na ol yia Baibel i stori long en, i helpim yumi long kliagut olsem God i kamapim Kingdom bilong em long heven long yia 1914.a Long dispela taim, em i putim Pikinini bilong em, Jisas Krais, olsem King. (Buk Song 2:2, 4, 6-9) Klostu nau, Kingdom Bilong God bai bosim graun, na em bai pinisim olgeta gavman i birua long en na mekim graun i kamap wanpela paradais na bai ol man i ken stap oltaim long en.

Klostu nau, ol tok long beten Jisas i skulim ol man long en bai kamap tru: “Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:10) So, Kingdom i mekim wanem taim em i kirap mekim wok long yia 1914? Na yumi ken luk fowed long wanem samting taim Kingdom i bosim ol man?