Givim Biknem Long Jehova Long Olgeta De

1. Ol wokman bilong God i laik mekim wanem? Bilong wanem ol i laik mekim olsem?

¹ King Devit i tok olsem em i laik givim biknem long Jehova long “olgeta de,” i go inap oltaim oltaim. (Sng. 145:​2, 7, 21) I gat as tru na yumi tu i mas givim biknem long Jehova long olgeta de.​—⁠Sng. 37:10; 145:​14, 18; 2 Pi. 3:⁠13.

2. Olsem wanem ol famili i ken givim biknem long Jehova long olgeta de?

² Long Haus Bilong Yumi: Yumi gat ol gutpela buk na nius i helpim yumi long toktok long ol samting bilong spirit taim yumi skelim teks bilong de, taim yumi mekim Famili Lotu, na taim yumi redim ol tok bai kamap long ol miting bilong kongrigesen. Planti famili i gat pasin bilong bung na kaikai wantaim wanpela taim long olgeta de. Dispela i mekim na famili inap sindaun gut na toktok wantaim na i opim rot long ol i ken givim biknem long Jehova. Kain toktok olsem em papamama i kirapim, em i wanpela bikpela samting bilong helpim ol long mekim bikpela long ol pikinini na ‘stretim gut ol na skulim ol long tok bilong Bikpela.’​—⁠Ef. 6:4; Lo 6:​5-7.

3. Yumi gat rot long mekim wanem taim yumi stap wantaim ol brata bilong yumi?

³ Wantaim Ol Brata Bilong Yumi: Taim yumi autim tok o stap long ol miting bilong kongrigesen, yumi gat gutpela rot long givim biknem long Jehova wantaim ol wanbilip bilong yumi. (Snd. 15:30; Fl. 4:8; Hi. 13:15) Yumi olgeta i laikim tru Jehova, olsem na i no hatwok long mekim ol tok amamas long gutpela pasin bilong Jehova taim yumi toktok wantaim ol narapela.​—⁠Sng. 106:⁠1.

4. Long wanem kain rot yu ken givim biknem long Jehova?

⁴ Taim Yumi Toktok Wantaim Ol Man Ausait: Ating sindaun bilong yumi i mekim na yumi no inap autim tok long ol haus long olgeta wan wan de. Tasol sapos yumi toktok liklik wantaim ol wanwok, wanskul, na ol neiba, long Jehova na ol samting em i tingting pinis long mekim, dispela inap helpim ol man i gat gutpela bel long bilip na wetim gutpela samting. (Sng. 27:14; 1 Pi. 3:15) Wanpela sista i raun long balus na em i autim tok long wanpela pasindia. Ol tok pasindia hia i harim i strongim na mekim gut bel bilong em, olsem na em i givim atres na fon namba bilong em long sista bambai ol i ken toktok moa wantaim. Taim ol hevi na sindaun bilong graun i wok long i go nogut moa, lain bilong Jehova i wok yet long bringim “gutpela tok” long ol man i laik harim. Dispela i helpim ol man long bilip na wetim gutpela samting bai kamap bihain na i kirapim ol long givim biknem long Jehova.​—⁠Ais. 52:7; Ro. 15:⁠11.

5. Bilong wanem yumi laik givim biknem long Jehova? Dispela inap kamapim wanem samting?

⁵ Jehova i amamas tru taim em i harim ol wokman bilong em i givim biknem long em long olgeta de! Ol samting Jehova i bin wokim i givim biknem long em, na olsem tasol yumi tu i ken givim biknem long em long olgeta de long haus bilong yumi, insait long kongrigesen, na taim yumi toktok wantaim ol man husat i no bin kamap yet olsem man bilong givim biknem long Jehova.​—⁠Sng. 19:​1-4.