Givim Taim na Strong Bilong Yu Long Helpim Ol Sumatin
1. Yumi mas mekim wanem bilong helpim Baibel sumatin?
1 Bilong helpim wanpela Baibel sumatin i go inap long em i dediket, i no inap long yumi stadi tasol wantaim em long Baibel, nogat, yumi mas mekim sampela samting moa. Aposel Pol i tok pasin i stap namel long em wantaim ol man em i skulim i wankain olsem pasin i stap namel long meri i givim susu na pikinini bilong em. Yumi tu i amamas long “givim laip” bilong yumi, olsem taim na strong olgeta bilong yumi, long helpim ol sumatin bilong yumi na bai ol i ken kamap strong long ol samting bilong spirit.—1 Te. 2:7-9.
2. Bilong wanem yumi mas kamapim klia olsem yumi tingim tru sumatin? Olsem wanem yumi inap mekim olsem?
2 Tingim Tru Em: Taim Baibel sumatin i wok long bihainim ol tok em i lainim, maus bilong bel bilong em bai kirapim em long em i no ken pren moa wantaim ol manmeri em ol i no save bihainim ol stiatok bilong Baibel. (1 Pi. 4:4) Ating famili bilong em i birua long em. (Mt. 10:34-36) Yumi ken helpim em long stap bel isi long rot bilong tingim tru em. Wanpela longtaim misineri i tok: “Taim stadi i pinis, no ken lusim em wantu na i go. Sapos inap, stap na toktok wantaim em inap sampela haptaim.” Oltaim yu mas redi long mekim ol samting bilong helpim sumatin bilong yu. Olsem, yu ken ringim em o go lukim em taim em i sik. Na yu ken sindaun wantaim sumatin bilong yu long taim bilong miting na helpim em long lukautim ol pikinini, sapos i stret long mekim olsem.
3. Olsem wanem yumi inap helpim sumatin bilong yumi long kisim strong long kongrigesen?
3 Helpim i Kam Long Kongrigesen: Sapos yu autim tok klostu long hap bilong Baibel sumatin bilong yu, i gutpela yu go lukim em na bai em i ken bungim poroman bilong yu long autim tok. Sapos i stret, sampela taim yu ken singautim narapela narapela pablisa, na ol elda tu, long go wantaim yu long stadi. Na tu, bihain tasol long yu kirapim wanpela stadi, strongim Baibel sumatin bilong yu long kam long ol miting long Haus Kingdom. Dispela bai opim rot long em i ken bung wantaim ol bratasista long kongrigesen em ol inap kamap famili spirit bilong em.—Mk. 10:29, 30; Hi. 10:24, 25.
4. Olsem wanem pasin bilong yumi long wok strong inap kamapim gutpela samting?
4 Papa o mama husat i save wok strong long helpim ol pikinini bilong em long ol samting bilong spirit, em i save amamas tru taim ol i stap long sait bilong Jehova na bihainim tok i tru. (3 Jo. 4) Yumi tu i ken kisim wankain amamas taim yumi givim taim na strong bilong yumi long helpim ol Baibel sumatin bilong yumi.