Mi Mekim Bikpela Wok o Nogat?
1. Ol Kristen inap tingting planti long wanem samting?
1 Sampela taim yu bin mekim dispela askim long yu yet? Ating yu no mekim moa bikpela wok bilong autim tok olsem bipo, long wanem, krismas bilong yu i go antap, yu gat sik, o bikpela wok bilong lukautim famili, na dispela i mekim na yu bel hevi. Wanpela sista i gat tripela pikinini i tok olsem sampela taim bel i kotim em, long wanem, taim na strong em i lusim bilong lukautim famili bilong em i pasim em long mekim bikpela wok bilong autim tok. Wanem samting bai helpim yumi long kisim stretpela tingting long dispela samting?
2. Jehova i laik bai yumi mas mekim wanem?
2 Samting Jehova i Laik Bai Yumi Mas Mekim: Ating yumi olgeta i gat laik long mekim bikpela wok moa bilong autim tok. Tasol samting yumi laik mekim em i no wankain olsem samting yumi inap mekim. Sapos yumi gat laik long mekim bikpela wok moa, dispela i soim olsem yumi ting wok yumi mekim em i no inap. Yumi mas tingim olsem Jehova i save long mak bilong yumi long mekim ol samting na em i no strong long yumi mas mekim samting yumi no inap mekim. (Sng. 103:13, 14) Em i laik bai yumi mas mekim wanem? Em i laik bai yumi givim bel olgeta long mekim wok bilong em.—Kl. 3:23.
3. Olsem wanem yumi ken skelim wok yumi mekim bilong autim tok?
3 Wanem samting bai helpim yumi long skelim samting yumi inap mekim? Yumi ken askim Jehova long helpim yumi long kisim stretpela tingting long i stap bilong yumi. (Sng. 26:2) Yumi inap kisim helpim tu long wanpela pren i strongpela Kristen, em yumi trastim em na em i no pret long tokim yumi sapos i gat sampela samting yumi gat wok long kamap gutpela moa long en. (Snd. 27:9) Tingim tu olsem sindaun bilong yumi i save senis, olsem na oltaim em i gutpela long yumi skelim i stap bilong yumi.—Ef. 5:10.
4. Yumi mas i gat wanem tingting long ol tok yumi kisim bilong mekim wok autim tok?
4 Stretpela Tingting Long Ol Tok Yumi Kisim: Long taim bilong resis, ol manmeri i lukim resis ol i save singaut bilong strongim ol man i resis. Ol i mekim olsem bilong helpim ol man i ron long ol i ken winim resis, i no bilong daunim ol. Na olsem tasol, ol tok bilong Baibel yumi kisim long rot bilong ol miting na ol buk na nius bilong yumi, olsem yumi mas “strong long autim tok,” i bilong helpim yumi na i no bilong tok olsem wok yumi mekim em i no inap. (2 Ti. 4:2) Yumi ken bilip olsem taim yumi wok strong, Jehova bai tingim ‘ol gutpela wok yumi bin mekim.’—Hi. 6:10.