Ol Tok Bilong Jehova Bilong Kirapim Gen Tingting Bilong Yumi
1 Man bilong raitim Song i litimapim nem bilong Jehova, na em i tok: “Oltaim mi save tingting long ol tok bilong yu bilong kirapim gen tingting.” (Sng 119:99, NW) Jehova i save kirapim tingting bilong yumi long tingim gen ol tok na ol lo bilong em. Sapos yumi mekim olsem, dispela bai kirapim yumi long mekim ol wok bilong spirit na bai yumi amamas.—Sng 119:2.
2 Yumi lain bilong Jehova, oltaim yumi kisim tok bilong stretim yumi. Ating planti bilong ol dispela tok yumi bin harim bipo. Tru yumi save amamas long ol dispela tok bilong strongim yumi, tasol planti taim yumi lusim tingting long en. (Je 1:25) Jehova i save isi long yumi na em i kamapim ol gutpela tok bilong kirapim gen tingting bilong yumi. Long pas bilong em, aposel Pita i kamapim sampela bilong ol dispela tok bilong ‘kirapim yumi long tingim gen ol lo bilong Bikpela.’—2 Pi 3:1, 2.
3 Planti taim ol brata i kirapim yumi long tingim pasin bilong stadi na go long ol miting em i bikpela samting; em bilong helpim yumi long i stap gut long ol samting bilong spirit.—1 Ti 4:15; Hi 10:24, 25.
4 Sampela i hatwok liklik long mekim tru wok Kristen bilong ol long autim tok. Olsem na yumi mas taitim bun na strongim bel na no ken les. Tru yumi mas mekim bikpela wok, tasol sapos ‘yumi redi long autim gutnius na putim dispela pasin olsem su bilong yumi,’ dispela bai helpim yumi long “sanap strong.”—Ef 6:14, 15.
5 Long tingting yumi save long ol lo bilong Jehova, tasol i no tingting tasol i kirapim yumi long mekim wok, nogat. Aposel Pol i tok, bel i mas kirapim yumi long “autim bilip bilong yumi na God i kisim bek yumi.” (Ro 10:10) Sapos yumi gat strongpela bilip na bel i gat laik long bihainim ol tok Jehova i givim long yumi bilong kirapim gen tingting, dispela bai strongim yumi long autim tok na litimapim nem bilong em.—Sng 119:36; Mt 12:34.
6 Taim yumi wok strong long mekim ol gutpela wok, yumi ken bilip olsem dispela bai givim amamas long yumi. (Sav 2:10) Pol i tok, amamas em wanpela pasin spirit bilong Jehova i save kamapim, na yumi mas wok strong long kamapim dispela pasin. (Ga 5:22) Na Pita i tok sapos yumi “wok strong tru,” wok bilong yumi long autim tok bai karim planti kaikai, na dispela bai kamapim amamas.—2 Pi 1:5-8.
7 Sapos samting i laik pasim rot long yumi long mekim wok, gutpela sapos yumi tingim ol aposel ol i bin sanap strong na tok: ‘Mipela i no inap pasim maus. Mipela i mas autim tok long olgeta samting mipela i bin lukim na harim.’ (Ap 4:20) ‘Long wok bilong yumi, God bai kisim bek yumi na ol manmeri i harim tok bilong yumi.’ Sapos yumi tingim dispela samting, dispela bai strongim yumi long mekim yet wok.—1 Ti 4:16.
8 Yumi no bikhet o bel hevi long wanem oltaim yumi save kisim ol tok bilong kirapim gen tingting bilong yumi, nogat. Ol dispela tok i gutpela tumas na yumi pilim tru. (Sng 119:129) Nau long dispela taim nogut, yumi tenkyu olsem Jehova i wok yet long kirapim gen tingting bilong yumi long tingim ol samting bilong spirit na long yumi mas wok strong long mekim ol gutpela pasin!—2 Pi 1:12, 13.