Yumi Harim Pinis Dispela Tok, A?
1 Yes, yumi bin harim! I gat planti tok i stap long Baibel em Jehova i kolim gen planti taim na bai dispela tok i ken helpim ol manmeri bilong em. Planti taim Jisas i bin kolim gen ol tok em i skulim ol man long en long ol narapela narapela samting bilong Kingdom. Oltaim ol aposel bilong em i bin stori gen long sampela tok bilong spirit wantaim ol man i save pinis long tok i tru.—Ro 15:15; 2 Pi 1:12, 13; 3:1, 2.
2 Long taim bilong yumi oganaisesen bilong Jehova i stretim rot na bai yumi ken stori gen long ol bikpela samting long ol miting bilong kongrigesen. Yumi bin stadi gen long sampela buk planti taim. Em nau, em i bikpela samting long harim gen ol tok yumi harim pinis!
3 Pasin Bilong Tingim Gen Ol Tok i Bikpela Samting: Ol tok Jehova i save tokim yumi gen long en i save helpim yumi long save gut long ol samting, na mekim save bilong yumi i go bikpela, na i strongim tingting bilong yumi long stap strong yet long ol samting bilong spirit. (Sng 119:129) Pasin bilong tingim gen ol lo bilong God em i olsem man i lukluk long wanpela glas. Em i helpim yumi long skelim yumi yet na stretim ol pasin kranki bilong yumi—nogut yumi “harim nating tasol.”—Je 1:22-25.
4 Sapos oltaim yumi no wok long tingim tok i tru, ol narapela samting bai bagarapim tingting bilong yumi. Ol tok God i tokim yumi gen long en em i save strongim yumi long sakim ol tingting nogut bilong dispela graun bilong Satan. (Sng 119:2, 3, 99, 133; Fl 3:1) Ol tok bilong truim bilong ol laik bilong God yumi save harim planti taim em i save helpim yumi long “was i stap.” (Mk 13:32-37) Ol tok i tru bilong Baibel yumi save harim gen ol i save helpim yumi long wokabaut yet long rot bilong bringim ol man long laip oltaim.—Sng 119:114.
5 Olsem Wanem Dispela i Ken Helpim Yu: Yumi mas ‘kirapim bel bilong yumi na bai yumi gat laik long bihainim lo.’ (Sng 119:36) Sapos long miting yumi bai stori long wanpela tok yumi save pinis long en, orait yumi mas redim pastaim, lukim ol skripsa em paragraf i no kamapim ol tok bilong en, na tingting long olsem wanem yumi ken bihainim dispela tok. Yumi no ken lusim pasin bilong redim rivyu bilong raitim long Skul Bilong Wok Autim Tok—yumi no ken ting em i no bikpela samting. (Lu 8:18) Yumi no ken ting olsem long miting ol i save toktok long ol as tok bilong tok i tru planti taim, olsem na yumi no ken putim gut yau, nogat.—Hi 5:11.
6 Yumi mas bihainim pasin bilong man bilong raitim Song: “Mi save amamas tru long bihainim tok bilong yu. Na mi no save amamas olsem long planti mani na bilas samting.” (Sng 119:14) Em nau, yumi harim pinis ol dispela gutpela tok, na bai yumi harim gen. Bilong wanem? Long wanem, Jehova i save olsem yumi mas harim ol dispela tok!