“Yu No Ken Pret”
1. Olsem Jeremaia, yumi inap pilim olsem wanem?
1 Taim Jehova i tokim Jeremaia long mekim wok profet, em i pilim olsem em i no inap mekim. Tasol Jehova i tokim em olsem, “yu no ken pret,” na long gutpela pasin Jehova i strongim Jeremaia long mekim wok bilong em. (Jer. 1:6-10) Long nau, pasin bilong sem o yumi ting yumi no fit long mekim wok, dispela inap mekim na yumi surik long autim tok. Pasin bilong pret long ol man bai ting olsem wanem long yumi inap mekim na yumi no autim tok. Olsem wanem yumi inap daunim kain pasin olsem bilong pret, na bai yumi kisim wanem ol blesing?
2. Olsem wanem pasin bilong redi gut pastaim bai helpim yumi long daunim pasin bilong pret long autim tok?
2 Redi Gut Pastaim: Pasin bilong redi gut pastaim bai helpim yumi long daunim pasin bilong pret. Olsem, sapos yumi tingim ol tok ol man inap mekim bilong katim tok, yumi bai redi long bekim tok bilong ol. (Snd. 15:28) Gutpela sapos long taim bilong Famili Lotu yumi mekim traim long pasin bilong bekim tok bilong ol man long skul o long taim bilong autim tok.—1 Pi. 3:15.
3. Olsem wanem pasin bilong bilip long Jehova bai helpim yumi long winim pasin bilong pret?
3 Bilip Long Jehova: Pasin bilong bilip long God bai helpim yumi long winim pasin bilong pret. Jehova i bin tok promis olsem em bai helpim yumi. (Ais. 41:10-13) I no gat wanpela narapela man inap helpim yumi gut olsem Jehova. Na tu, Jisas i tokim yumi olsem taim sampela hevi i kamap long taim yumi no tingim, holi spirit bilong God bai helpim yumi long autim gut tok. (Mk. 13:11) Olsem na oltaim askim Jehova long givim holi spirit bilong em.—Lu. 11:13.
4. Wanem ol blesing i kamap taim yumi stap strong long wok autim tok maski i gat ol hatwok?
4 Ol Blesing: Taim yumi stap strong long wok autim tok maski i gat ol hatwok, dispela i strongim yumi long karim ol hatwok i kamap bihain. Yumi kisim pasin bilong i no pret—em pasin bilong ol man em holi spirit i pulap long ol. (Ap. 4:31) Na tu, taim Jehova i helpim yumi long winim pasin bilong pret, yumi strongim bilip bilong yumi na pasin bilong bilip olsem em bai helpim yumi. (Ais. 33:2) Na bai yumi amamas na belgut tu, taim yumi save olsem yumi amamasim Papa bilong yumi long heven. (1 Pi. 4:13, 14) Olsem na yumi no ken pret long autim tok bilong Kingdom wantaim strongpela bel, oltaim yumi bilip olsem Jehova bai helpim yumi!