Beten na Tingim Tingim Long Bel Ol Samting—Em Bikpela Samting Long Ol Man i Givim Bel Long Autim Tok
1. Wanem samting i helpim Jisas long sakim ol samting em inap pulim tingting bilong em long mekim wok autim tok?
1 Em apinun pinis na Jisas i wok long oraitim ol sikman na rausim ol spirit nogut. Long neks de, taim ol disaipel bilong em i lukim em, ol i tok: “Olgeta manmeri i wok long painim yu,” na ol disaipel i laik bai em i mekim yet ol strongpela wok bilong em. Tasol Jisas i no larim wanpela samting i pulim tingting bilong em na bai em i no mekim namba wan wok bilong em, em wok bilong autim gutnius. Em i tok: “Yumi go long ol arapela taun i stap klostu. Mi laik autim tok long ol tu, long wanem, em dispela wok tasol mi kam bilong mekim.” Wanem samting i helpim Jisas long putim tingting olgeta long wok bilong em? Em i bin kirap long bikmoning tru na beten na tingim tingim long bel ol samting. (Mk. 1:32-39) Olsem wanem pasin bilong beten na tingim tingim long bel ol samting inap helpim yumi long givim bel tru long autim tok?
2. Yumi inap tingim tingim long bel wanem ol samting em ol inap helpim yumi long givim bel yet long autim tok?
2 Tingim Tingim Long Bel Wanem Ol Samting? Jisas i luksave olsem ol manmeri “i stap nogut tru, olsem ol sipsip i no gat wasman.” (Mt. 9:36) Olsem tasol, yumi tu i ken tingim olsem ol man i mas harim gutnius, na tingim tu olsem taim i sot pinis. (1 Ko. 7:29) Yumi ken tingim tingim long bel ol wok na pasin bilong Jehova, na yumi amamas long stap olsem ol Witnes bilong em, na ol gutpela tok i tru yumi bin kisim save long en long Baibel em planti man long teritori bilong yumi i no save long en.—Sng. 77:11-13; Ais. 43:10-12; Mt. 13:52.
3. Wanem taim i gutpela bilong yumi ken tingim tingim long bel ol samting?
3 Wanem Taim i Gutpela? Olsem Jisas i bin mekim, sampela i save kirap long bikmoning taim ples i no gat planti nois na bai ol i ken tingim tingim long bel ol samting. Sampela narapela ol i save mekim olsem long nait paslain long ol i slip. (Stt. 24:63) Maski yumi gat planti wok, yumi inap painim taim bilong tingim tingim long bel ol samting. Sampela i save mekim olsem taim ol i raun long bas samting. Sampela narapela i save tingim tingim long bel ol samting long taim ol i malolo long belo. Planti ol i pilim olsem taim ol i tingim tingim long bel ol tok ol bai mekim paslain long ol i go autim tok, maski em inap sampela minit tasol, dispela i helpim ol long givim bel long autim tok na ol i no pret.
4. Bilong wanem yumi mas tingim tingim long bel ol samting?
4 Pasin bilong beten na tingim tingim long bel ol samting, dispela bai strongim laik bilong yumi long mekim wok bilong Jehova, na i helpim yumi long tingim olsem lotu bilong yumi i namba wan bikpela samting long laip bilong yumi, na i strongim tu laik bilong yumi long wok yet long autim tok. Nambawan Wokman bilong God, em Jisas, i bin kisim helpim long pasin bilong tingim tingim long bel ol samting, na olsem tasol dispela pasin inap helpim yumi tu.