Baibel i Tok Wanem?
Pasin Bilong Tingim Tingim Ol Samting Long Bel
“BIKPELA, MI LAIK BAI TOK BILONG MI NA TINGTING BILONG MI I KEN I ORAIT LONG AI BILONG YU. BIKPELA, YU PLES HAIT BILONG MI NA HELPIM BILONG MI.”—SONG 19:14.
YU TING pasin bilong “tingim tingim long bel” i makim wanem samting? Sapos yu bihainim tingting bilong sampela lotu long hap bilong Is, ating bai yu gat tingting olsem dispela pasin bai mekim na tingting bilong yu i klia tru, o long dispela rot bai yu kisim narapela kain save. Bilong tingim gut samting long bel, lotu Buda i kirapim ol man long rausim olgeta samting i stap long tingting. Sampela i tok olsem pasin bilong tingim wanpela “tok tru olgeta man i save long en” i olsem narapela rot bilong tingim tingim samting long bel.
Samting Baibel i makim i olsem pasin bilong tingim tingim samting long bel, em i narapela kain long ol dispela tok. Em i narapela kain olsem wanem? Tingim tok bilong Baibel i stori long pasin Aisak i mekim. Em i gat 40 krismas na i gat planti samting em i mas tingim. Stat 24:63 (NW ) i tok: “Taim san i laik go daun, Aisak i wokabaut long ples i gat sotpela gras bambai em i ken tingim tingim ol samting long bel.” I no gat as bilong ting olsem Aisak i rausim olgeta samting i stap long tingting na em i wokabaut, o em i wok long tingim wanpela kain ‘tok tru olgeta man i save long en.’ I luk olsem Aisak i gat planti samting bilong tingting long en, olsem i dai bilong mama bilong em, na ol samting em yet bai mekim long bihain, na husat bai stap olsem meri bilong em. Em i mekim wok long hap taim em i stap wanpis long apinun bilong tingim gut ol dispela bikpela samting. Tok bilong Baibel i makim olsem pasin bilong tingim tingim samting long bel i no olsem pasin bilong tingting long samting i olsem samting nating tasol.
Bilong Tingim Tingim Long Bel
Tingim pasin bilong Devit, em man bilong raitim Song. Em i gat kain kain bikpela hevi i hatwok long stretim, na em i save em i wanpela sinman, na bilong bihainim pasin i stret em i mas i gat helpim i kam long God. Wanem samting i bin strongim Devit long karim ol hevi? Olsem Song 19:14 i kamapim, Devit i tok: “Bikpela, mi laik bai tok bilong mi na tingting bilong mi i ken i orait long ai bilong yu. Bikpela, yu ples hait bilong mi na helpim bilong mi.” Insait bilong dispela tok Hibru ol i tanim olsem tingim tingim long bel i olsem “toktok wantaim yu yet.” Em nau, Devit i bin “toktok wantaim em yet” long ol samting bilong Jehova, olsem wok bilong Em, lo bilong Em, na gutpela pasin bilong Em.—Song 143:5.
Olsem Devit i mekim, ol Kristen bilong pastaim i save, wanpela wok bilong ol insait long trupela lotu em bilong makim hap taim bilong tingim tingim ol samting bilong spirit. Aposel Pol i tokim ol Kristen: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” (Filipai 4:8) Tasol bilong tingting long ol gutpela samting i strongim bel, i mas i gat wanpela taim yumi bin putim ol dispela tok bilong Pol long tingting bilong yumi. Yumi mekim olsem wanem?
Man i raitim Song i bekim dispela askim. Song 1:1, 2 i tok: “Man i no save bihainim tok bilong ol man nogut, . . . dispela man i ken amamas tru. Dispela man i save laikim tumas lo bilong God, na em i save tingting long dispela lo long san na long nait.” Tru tumas, man bilong raitim Song i save ritim lo bilong God long olgeta taim. Dispela i mekim na em inap tingim tingim long bel ol save em i kisim long Man i bin wokim olgeta samting.
Pasin Bilong Tingim Ol Samting Long Bel Long Nau
Wok bilong ritim Baibel i bikpela samting tru, tasol taim yumi ritim sampela hap pinis, yumi mas tingim tingim long bel o “toktok wantaim yumi yet” long ol samting yumi bin ritim. Olsem skin i mas mekim wok long kaikai bilong helpim bodi, olsem tasol yumi mas tingim tingim long bel ol samting yumi ritim long Baibel sapos yumi laik kisim gut insait bilong en. Pasin bilong tingim tingim long bel ol tok bilong Jehova, dispela i save daunim ol tingting nogut, na i no dispela samting tasol. Dispela i helpim yumi long tingim wanem tok bilong Baibel yumi ken bihainim bilong stretim hevi bilong yumi. Na em i ken helpim yumi long karim ol hevi bilong ol wan wan de.—Matyu 6:25-32.
Man bilong raitim Song, em Devit, em i save olsem wanem wok bilong tingim tingim ol samting long bel i save amamasim God. Em i tok: “Stretpela man i gat gutpela save na i autim gutpela tok tasol.” (Song 37:30) Tru tumas, pasin bilong tingim tingim long bel ol tok bilong Baibel i makim olsem man i givim bel long lotuim Jehova. Sapos yumi stap stretpela man long ai bilong God, dispela em i wanpela gutpela blesing tru na em bai helpim yumi long ol samting bilong spirit. I olsem Baibel i tok: “Rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” (Sindaun 4:18) Olsem na Kristen i save bihainim tok na “autim ol gutpela tok tasol,” em i ken ting olsem save bilong em long Baibel bai i go bikpela moa.
Na tu, Baibel i tokim ol Kristen long tingim tingim long bel ol wok Kristen ol i mas mekim. Aposel Pol i tokim Timoti: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru. Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:15, 16) Tru tumas, toktok bilong yumi na pasin bilong yumi inap mekim bikpela samting long ol narapela.
Em nau, yumi save i gat planti as na yumi laik tingim gut tru ol bikpela samting. Yumi mas tingim ol samting i bin kamap long yumi long bipo na tingim ol samting bilong yumi long nau na ol samting bilong bihain. Tasol nambawan bikpela samting i olsem, sapos yumi tingim tingim long bel ol save bilong Man i bin wokim olgeta samting, em God Jehova, dispela bai helpim yumi moa yet.
[Piksa long pes 26]
“Man Bilong Tingting,” em Rodin i wokim