Sampela Tok i Kam Long Olgeta Hap

Ol Hap Em Hangre i Stap Long En

Wanpela buk (State of the World 2000) i tok: “Lain Wol Helt Oganaisesen (WHO) i ting inap olsem 50 pesen bilong ol manmeri bilong olgeta kantri​—⁠maski kantri i gat planti mani o i stap rabis​—⁠ol i no save kisim gutpela kaikai em inap strongim skin bilong ol.” Ol i ting inap 1.2 bilion manmeri long olgeta hap ol i no save kisim kaikai i gat gutpela marasin long en. Na tu, ol i tok planti bilion manmeri moa ol i gat wanpela hangre i narapela kain, olsem ol i save kisim planti kaikai, tasol ol dispela kaikai i no gat ol marasin olsem vaitamin samting long en em ol i mas kisim. Wanpela lain (Worldwatch Institute) i save kamapim ripot long buk State of the World long olgeta yia, ol i tok: “Planti man long nau ol i ting hangre i save kamap taim i no gat planti kaikai. Tasol dispela tingting i no stret. Ol samting man yet i mekim i kamapim hangre . . . Ol man i gat gutpela sindaun o nogat, na ol i save givim biknem long ol meri o nogat, na ol gavman i mekim pasin i stret long ol man o nogat​—⁠ol dispela samting i makim husat ol i kaikai na husat ol i no kaikai, tasol hamas kaikai i stap long kantri, dispela i no makim olsem ol man i stap hangre o nogat.”

Makim Lotu i Stret Long Laik Bilong Man

Ripot bilong George Gallup, Jr., i kamapim olsem planti manmeri long Amerika i ting ol lotu i gat kain kain bilip long en. Nius National Post bilong Kanada i tok, ‘ol man bilong [Not] Amerika ol i no laik bihainim ol bilip bilong bipo, ol yet i makim ol samting ol i laik bilip long en, na planti ol i save bungim narapela narapela tingting bilong wanpela lotu o ol i bungim bilip bilong 2-pela o 3-pela lotu na kamapim bilip bilong ol yet.’ Nius i tok, dispela ripot i kamapim tu olsem “planti ol i no gat save long Baibel, na long bilip na pasin bilong lotu bilong ol yet” na “planti man i bilip nating long skin tasol, na ol i no save ol i bilip long wanem samting na bilong wanem ol i bilip long en.” Reginald Bibby, em i wanpela profesa long Yunivesiti Bilong Letbris, Albeta, Kanada, em i tok: “Planti man ol i tok ol i bihainim lotu Katolik na lotu Talatala, tasol ol i save makim ol bilip na pasin ol i laikim, na ol samting lotu i ken helpim ol long en​—⁠olsem baptaisim man, maritim man, na planim man.”

Kofi na Ol Marasin Nogut

Nius Australian i tok, save ol i kisim long nau i kamapim olsem kofi inap rausim “78 i go inap 90 pesen bilong ol marasin nogut bilong wara bilong tep, olsem sampela kain ain ol i kolim let na kopa. Kofi inap mekim olsem, long wanem, sampela marasin bilong pikinini kofi i save rausim sampela marasin nogut.” Saveman Mike McLaughlin i tok: “Taim kofi i strong moa em i rausim bikpela hap moa bilong ol marasin nogut.” Ol i mekim wankain traim long ol ti-bek, tasol ti inap rausim 33 pesen bilong ain let tasol, na em i no inap rausim kopa.

Aisman Long De Sabat

Planti ais i pundaun long Israel long yia i go pinis, na dispela i bin kamapim sampela askim long ol Juda Otodoks. Olsem: Ol inap tromoi na paitim man long ol bal ol i wokim long ais long de Sabat, o nogat? Olsem wanem long wokim aisman? Wanpela lain (IsraelWire) bilong kamapim nius i tok, nambawan rabai bilong Israel, Mordehai Eliyahu, em i bin kamapim sampela tok bilong helpim ol bilipman i no save gut long ol samting ol i ken mekim na ol samting ol i no ken mekim. Dispela rabai i tok, pasin bilong wokim aisman em i wanpela “wok,” maski em i samting bilong amamas tasol. Olsem na lo bilong Sabat i tambuim dispela samting. Tasol pasin bilong tromoi na paitim man long ol bal ol i wokim long ais i no wanpela wok, olsem na em i orait long mekim dispela samting. Tasol ol i mas inapim wanpela lo. Olgeta manmeri i insait long dispela samting ol i mas wanbel long mekim olsem, na ol i no ken tromoi ol bal long ol man i wokabaut long rot.

Kru Bilong Man i Wokim Ol Nupela Sel

Nius The New York Times i tok: “Inap planti yia ol man i bin ting olsem taim mama i karim pikinini em i kisim pinis olgeta sel bilong kru em bai kisim.” Long 1965, ol i bin mekim ol traim long sampela animal na save ol i kisim i kamapim olsem kru bilong ol i wokim ol nupela sel bilong ol rop wailis olsem nev, tasol planti dokta i bin ting dispela samting i no save kamap long ol man. Tasol insait long 10-pela yia i go pinis, save ol i kisim i kamapim klia olsem kru bilong man i save wokim ol nupela sel bilong ol nev, na ating long olgeta taim kru i wok long stretim em yet. Long yia i go pinis, ol saveman i kisim save olsem ol nupela sel i kamap long hap bilong kru bilong man i helpim em long tingim ol samting i bin kamap long nau. Sampela saveman long nau ol i ting “kru i wok long stretim em yet long olgeta taim.”

Ol Hevi na Pasin Bilong Mekim Nogut Long Pikinini

Wanpela nius (The Dallas Morning News) i tok: “Ol meri em ol narapela i bin mekim nogut long ol o mekim pasin sem long ol taim ol i pikinini yet, ating ol bai i no inap karim gut ol hevi i go inap long taim ol i dai.” Ol saveman long Yunivesiti Emori long Atlanta, ol i skelim ol meri em ol man i bin mekim nogut long ol na ol meri em ol man i no bin mekim nogut long ol. Ol i skelim mak bilong wanpela kain homon na hamas taim klok i pam insait long wanpela minit. Ol i skelim dispela samting taim ol meri i mekim wanpela wok i gat hatwok long en. Mak bilong ol homon bilong ol meri em ol man i bin mekim nogut long ol taim ol i pikinini yet i go antap tru, na klok bilong ol i pam hariap moa. Nius i tok, ol saveman i ting “pasin bilong skin bilong ol dispela meri long pilim hevi na karim hevi inap senis olgeta.”

Ol Hevipela Ruksak

Ripot bilong wanpela lain (American Academy of Orthopedic Surgeons) i bin kamapim olsem ol hevipela ruksak em sampela pikinini i save karim, i kamapim pen long baksait na long sol bilong ol. Ol i save pulimapim ruksak long ol buk bilong skul, kaikai na dring, samting bilong pilai musik long en, na senis bilong ol, olsem na sampela pikinini i save karim ruksak em hevi bilong en inap 18 kilo. Ol dokta bilong ol pikinini i tok, ol pikinini i save go long komyuniti skul ol inap kisim ol bikpela hevi long baksait, olsem bun bilong baksait i krungut, sapos ol i karim ol hevipela ruksak i go long skul. Wanpela nius (Excelsior) bilong Meksiko Siti i tok, sampela dokta i tokim ol tisa olsem hevi bilong ruksak em pikinini i karim i no ken winim 20 pesen bilong hevi bilong skin bilong pikinini, o ol i mas karim ruksak long “wanpela samting i gat wil bilong en, o i mas i gat let bilong pasim ruksak daunbilo long bel, o putim liklik matres samting long hap em ruksak i pas long baksait.”

Wain Bilong 300 Yia i Go Pinis

Nius The Times bilong Landon i tok, ol i bin painim tupela botol wain long ol pipia ston bilong wanpela haus long Landon i bin bagarap long yia 1682. Tuptup bilong wanpela botol i sting pinis na wain i bin kamap viniga, tasol ol i bin pasim tuptup bilong narapela botol long waia samting na em i pas strong. Long Haus Tumbuna Bilong Landon ol i traim ol wain, na ol saveman bilong wain ol i traim dispela wain bilong bipo tru em ol i rausim long botol long rot bilong nil ol i save givim sut long en. Ol i tok, em i olsem wain bilong Madera, na em i ‘gutpela, i no pait, na i swit.’

Ol Bikpela Wara i Laik Bagarap

Nius USA Today i tok: “Winim 50 pesen bilong olgeta bikpela wara long olgeta hap i laik drai o ol marasin nogut i wok long bagarapim ol.” Wanpela lain (World Commission on Water for the 21st Century) i tok, pasin bilong mekim wok nogut long graun na wara i mekim na mak bilong planti bikpela wara “i go daun tru na ol i bagarap.” Dispela lain i tok, pasin bilong bagarapim ol dispela wara inap “bagarapim skin bilong ol man na rot bilong ol man long lukautim ol yet​—⁠ol man i mas i gat dispela wara bilong givim wara long gaden, na bilong dring, na bilong mekim ol wok bisnis.” Long ol 500 bikpela wara i stap long olgeta hap tupela bilong ol i “stap klin,” em wara Amason long Saut Amerika na wara Kongo long Afrika. Bilong wanem ol i stap klin? Ripot i tok, “i no gat planti faktori samting klostu long dispela tupela wara.”