DVD The Wonders of Creation Reveal God’s Glory
Planti i save amamas long lukim ol samting God i wokim. Tasol wan wan i luksave olsem ol dispela samting i kamapim klia tingting na laik bilong Bikpela Man Bilong Wokim yumi. (Rom 1:20) Long bipo yet, Devit i kisim save long Jehova long rot bilong Tok bilong Em. Tasol em i “lukim” tu ol samting God i bin wokim na dispela i kirapim em long go klostu long God. (Sng. 8:3, 4) DVD The Wonders of Creation Reveal God’s Glory bai helpim yumi, ol pikinini, na ol Baibel sumatin bilong yumi, long skelim gut ol samting Jehova i bin wokim, na lukim ol gutpela pasin bilong em, na long dispela rot yumi inap i go klostu moa long em. Taim yupela i lukim pinis DVD, yupela i ken bekim ol dispela askim.
(1) Olsem wanem sais bilong ples antap na wokabaut bilong ol samting long ples antap i helpim yumi long pilim tru bikpela strong bilong Jehova? (Ais. 40:26) (2) Taim yumi skelim wara, yumi kisim wanem save long Man i bin wokim? (Rev. 14:7) (3) Sais bilong graun na hap em i stap long en longwe long san, olsem wanem dispela i kamapim savetingting bilong Jehova? (4) Mun i gat wanem wok? (Sng. 89:37) (5) Jehova i wokim ol manmeri olsem wanem na bai ol inap i stap amamas? (6) DNA em i wanem samting? (Sng. 139:16) (7) Long olgeta samting i stap long graun em Jehova i bin wokim, olsem wanem ol manmeri i narapela kain? (Stt. 1:26) (8) Yu wet long lukim wanem samting long nupela taim?
Sampela Hap Moa: (9) Wanem samting i save kamapim ol kala? (10) Olsem wanem wara i sakim strong bilong graviti na go antap long het bilong ol diwai? (11) Wara i save mekim wanem wok insait long bodi bilong yumi? (12) Stori long sampela eksampel bilong ol samting i stap long graun em ol i save wok gut wantaim. (13) Olsem wanem na ol animal i save long pasin bilong pas gut wantaim ol narapela animal? (14) “Golden angle” em wanem samting? Olsem wanem em i stap ples klia long ol samting God i wokim?
“Lukim Gut” Ol Hanwok Bilong Jehova: Jisas i kirapim yumi long “lukim gut ol pisin long skai” na “kisim skul long ol plaua long bus.” (Mat. 6:26, 28) Dispela bai strongim bilip bilong yumi long Man Bilong Wokim olgeta samting, pilim tru savetingting bilong em, strong bilong em long kisim bek yumi, na pasin laikim bilong em. Yumi no ken larim ol wok samting bilong graun i pulim tingting bilong yumi. Yumi mas i gat taim bilong lukim gut ol samting Jehova i wokim, na tingim tingim olsem wanem ol dispela samting i skulim yumi long God.—Sng. 19:1.