Vidio Jehovah’s Witnesses—Faith in Action, Part 1: Out of Darkness
Long Baibel, lait na tok i tru i poroman wantaim, na tudak na tok giaman i poroman wantaim. (Sng. 43:3; Ais. 5:20) Satan i bringim tudak i kam long graun taim em i giamanim Iv, na bihain dispela tudak i go long olgeta hap bilong graun. (Rev. 12:9) Vidio Jehovah’s Witnesses—Faith in Action, Part 1: Out of Darkness i stori long hau lait bilong tok i tru i wok long kamap namel long tudak. (Ais. 60:1, 2) Taim yu lukim pinis vidio, yu inap bekim ol dispela askim?
(1) Olsem wanem bikpela tudak i kamap bihain long ol aposel i dai? (2) Kirap long yia 1100 samting, wanem samting i helpim ol manmeri long luksave olsem ol lotu i no lainim ol man long tok i tru? (3) Henry Grew na George Storrs, ol i husat? (4) Wanem ol samting i kamap long laip bilong Charles Russell we i mekim bikpela samting long em? (5) Olsem wanem Brata Russell, papa bilong em, na sampela poroman bilong ol i mekim Baibel stadi klas bilong ol? Ol skripsa i helpim ol long kisim wanem save? (6) Bilong wanem dispela Baibel stadi grup i joinim grup bilong Nelson Barbour? Wanem samting i mekim na Brata Russell i lusim ol? (7) Wanem samting i kamap long Julai 1879 na i kirapim taim we lait bilong tok i tru i kamap? (8) Bihain, taim lain Sumatin Bilong Baibel i wok long i go bikpela, ol i mekim wanem bilong autim gutnius? (9) Inap planti yia paslain long 1914, ol Sumatin Bilong Baibel i wet long wanem samting bai kamap long 1914? (10) Wanem ol hevi i painim ol Sumatin Bilong Baibel bihain long Brata Russell i dai? (11) Ol Sumatin Bilong Baibel i mekim wanem bihain long Brata Rutherford na ol poroman bilong em i lusim kalabus? (12) Olsem wanem dispela vidio i bin helpim yu long kliagut moa long oganaisesen bilong Jehova na tenkyu long en? (13) Olsem wanem dispela vidio i bin strongim tingting bilong yu long wok yet long autim tok maski i gat ol hevi? (14) Olsem wanem yumi inap yusim dispela vidio long helpim ol famili bilong yumi, ol Baibel sumatin, na ol narapela?
Yumi bin kisim ol gutpela samting bilong lotu i tru long ol dispela Sumatin Bilong Baibel long bipo! Ol i no pret na ol i wok strong long givim lait long ol man bilong dispela graun i stap long tudak bilong ol bilip giaman. Gutpela sapos yumi bihainim pasin bilong ol na “wokabaut yet olsem ol pikinini bilong lait.”—Efe. 5:8.