I Gat Wanem As na Yumi “Amamas”?
1. I gat wanem as na yumi amamas long pinis bilong olgeta mun?
1 Long pinis bilong olgeta mun taim yumi putim ripot bilong yumi, i gat wanem as na yumi save “amamas”? (Gal. 6:4) Maski yumi mekim wok painia salim na yumi mas kisim 130 aua o sampela bilong yumi ol i gat sik samting na ol i kisim 15 minit long wok autim tok, yumi olgeta i amamas olsem yumi bin givim bel olgeta long mekim wok bilong Jehova.—Sng. 100:2.
2. Bilong wanem yumi mas givim bel olgeta long mekim wok bilong Jehova?
2 Jehova em i Bikpela King bilong heven na graun, olsem na i stret yumi mas givim bel olgeta long mekim wok bilong em. (Mal. 1:6) Yumi laikim em olsem na yumi bin dediketim laip bilong yumi long mekim laik bilong em. Long pinis bilong olgeta de o mun sapos yumi pilim olsem yumi bin givim “ol namba wan hap kaikai” olsem taim, save, na strong bilong yumi long mekim wok bilong Jehova orait i gat as na yumi amamas. (Snd. 3:9) Tasol sapos bel bilong yumi i gat tok olsem yumi no mekim wok bilong Jehova inap long skel, orait yumi mas skelim wanem ol samting yumi ken mekim na bai wok bilong yumi i ken kamap gutpela moa.—Rom 2:15.
3. Bilong wanem em i no savepasin long skelim yumi yet wantaim ol narapela?
3 ‘No Ken Skelim Yu Yet Wantaim Narapela’: Em i no savepasin long skelim yumi yet wantaim ol narapela o skelim wok yumi bin mekim long pastaim wantaim wok yumi mekim long nau. Sindaun bilong yumi i save senis. Yumi olgeta i no wankain. Pasin bilong skelim yumi yet wantaim ol narapela i save kamapim pasin bilong resis wantaim ol narapela o inap mekim na yumi pilim olsem yumi samting nating. (Gal. 5:26; 6:4) Jisas i no skelim ol manmeri. Em i tok amamas long wok olgeta wan wan inap mekim.—Mak 14:6-9.
4. Yumi inap lainim wanem samting long tok piksa bilong Jisas?
4 Long tok piksa bilong Jisas long ol wokboi i kisim mani, olgeta wan wan i kisim “samting i stret long save na strong” bilong ol. (Mat. 25:15) Taim bosman i kam bek na i skelim wok bilong ol, em i tok amamas long ol wokman em sindaun bilong ol i opim rot na ol i yusim save bilong ol long mekim gutpela wok long mani ol i kisim. (Mat. 25:21, 23) Olsem tasol sapos yumi givim bel long autim tok bilong Kingdom, yumi ken bilip tru olsem God i orait long yumi na yumi ken amamas!