Lukautim Gut Maus Bilong Bel Bilong Yu
1. Wanem het tok bilong spesel de kibung bilong 2013? Bilong wanem ol i kamapim dispela kibung?
1 Olgeta de yumi save bungim ol hevi we inap bagarapim maus bilong bel bilong yumi. Olsem na spesel de kibung bilong neks yia, 2013, i gat dispela het tok: “Lukautim Gut Maus Bilong Bel Bilong Yu.” (1 Tim. 1:19) Kibung bai helpim yumi long was gut moa yet taim yumi yusim dispela gutpela presen em Man Bilong Wokim yumi i givim.
2. Ol tok bilong kibung bai bekim wanem ol askim?
2 Tingim Ol Dispela Poin: Ol tok bilong kibung bai bekim dispela 7-pela askim long samting bilong maus bilong bel:
• Wanem samting inap bagarapim maus bilong bel bilong yumi?
• Olsem wanem yumi ken skulim maus bilong bel bilong yumi?
• Yumi ken mekim wanem na bai yumi no gat asua long blut bilong wanpela man?
• Taim yumi wok long tingim na bihainim ol stiatok bilong Baibel, dispela i kamapim klia wanem samting long yumi?
• Yumi ken mekim wanem na yumi no bagarapim maus bilong bel bilong ol arapela?
• Ol yangpela, olsem wanem yupela inap sanap strong taim ol arapela i putim presa long yupela long mekim samting i no stret?
• Ol manmeri husat i bihainim maus bilong bel bilong ol em spirit bilong God i stiaim, ol bai kisim wanem ol blesing?
3. Kibung bai helpim yumi olsem wanem?
3 Jehova i helpim yumi na yumi inap long sakim ol samting Satan i mekim long bagarapim maus bilong bel bilong yumi. Long rot bilong Baibel na oganaisesen, gutpela Papa bilong yumi long heven i tokim yumi: “Dispela em i rot, wokabaut long en.” (Ais. 30:21, NW ) Dispela kibung em wanpela rot Jehova i redim bilong stiaim yumi. Olsem na yumi mas stretim ol samting na bai yumi ken stap long program olgeta. Putim gut yau na skelim gut olsem wanem bai yu bihainim ol dispela tok. Famili i ken stori wantaim long ol tok bilong kibung. Taim yumi bihainim ol dispela tok em bai strongim yumi na ‘oltaim maus bilong bel bilong yumi i stap stret long ai bilong God.’ Na tu i helpim yumi long sakim ol amamas bilong dispela graun i laik pulim yumi long mekim ol samting i bagarapim pasin pren bilong yumi wantaim Jehova.—1 Pita 3:16.