Amamas Long Wok Yu Mekim
1. Wanem samting inap pinisim amamas bilong yumi long givim bel long autim tok?
1 God i wokim yumi olsem na yumi ken ‘amamas long wok yumi mekim.’ (Sav. 2:24) Tasol taim wok autim tok bilong yumi i no kamapim gutpela samting, yumi save bel hevi na dispela i pinisim amamas bilong yumi long givim bel long autim tok. Wanem samting inap helpim yumi long holimpas stretpela tingting?
2. Bilong wanem yumi mas holimpas stretpela tingting taim ol man i no harim tok yumi autim?
2 Holimpas Stretpela Tingting: Tingim, maski wan wan man tasol i bin harim tok bilong Jisas taim em i autim tok, gutpela samting i bin kamap long wok em i mekim. (Jon 17:4) Long tok piksa bilong em long man i planim sid long gaden, Jisas i tok profet olsem planti man bai i no harim tok bilong Kingdom. (Mat. 13:3-8, 18-22) Maski i olsem, hatwok yumi mekim inap kamapim ol gutpela samting.
3. Maski i luk olsem planti man i no harim tok, yumi ken mekim wanem na wok bilong yumi inap “karim kaikai”?
3 Wok Bilong Yumi i Karim Planti Kaikai: Long tok piksa bilong Jisas, ol man i harim tok ol bai “karim kaikai.” (Mat. 13:23) Taim wanpela stik wit i kamap bikpela, em i save karim kaikai. Kaikai em i karim i no ol nupela liklik stik wit, nogat. Em i kamapim ol pikinini wit. Olsem na kaikai em ol Kristen i kamapim, i no ol nupela disaipel, nogat, em dispela tok bilong Kingdom yet em ol i autim planti taim moa—em ol tok ol i mekim bilong autim tok bilong Kingdom. Dispela i kamapim gutpela samting na i mekim yumi i amamas, maski ol man i harim tok o nogat. Yumi helpim wok bilong mekim nem bilong Jehova i mas i stap holi. (Ais. 43:10-12; Mat. 6:9) Yumi amamas long dispela gutpela wok yumi holim, olsem stap wanwok bilong God. (1 Kor. 3:9) Na Jehova i amamas taim yumi yusim maus bilong yumi long givim biknem nem long em.—Hib. 13:15, 16.
4. Wanem ol gutpela samting inap kamap long wok autim tok bilong yumi na ating yumi no lukim?
4 Na tu, ating wok bilong yumi i kamapim gutpela samting tasol yumi yet i no lukim. Ating sampela man husat i bin harim tok Jisas i autim, ol i no bin kamap disaipel inap long taim Jisas i pinisim wok bilong em long graun. Olsem tasol tok bilong Kingdom yumi autim long man i no inap gro insait long bel bilong em inap sampela yia bihain, na ating em i kam insait long tok i tru na yumi no save. Tru tumas, wok autim tok bilong yumi i save kamapim ol gutpela samting tru. Olsem na yumi mas wok yet long kamapim “planti kaikai” na kamapim olsem yumi disaipel bilong Jisas.—Jon 15:8.