Bihainim Gutpela Piksa Bilong Ol Profet—Jona
1. Jona i gat wanem ol gutpela pasin?
1 Taim yu tingim profet Jona, yu tingim wanem samting? Ating sampela i tingim em olsem man bilong pret o hatpela pasin. Tasol pasin bilong em i kamapim klia pasin daun, strongpela bel, na pasin bilong daunim laik bilong em yet. Olsem wanem yumi inap “bihainim gutpela piksa” bilong Jona?—Jems 5:10.
2. Olsem wanem yumi inap bihainim pasin daun bilong Jona?
2 Pasin Daun: Pastaim Jona i ranawe long asainmen bilong em. Yumi no kirap nogut long dispela, long wanem, ol Asiria ol i man bilong pait na bagarapim nogut tru ol man, olsem na Ninive i kisim nem olsem taun bilong “kilim ol man i dai.” (Nah. 3:1-3) Tasol taim Jehova i bin stretim Jona, em i mekim pasin daun na amamas long go gen long dispela asainmen. (Snd. 24:32; Jna. 3:1-3) Jona i mekim laik bilong Jehova, maski pastaim em i bin ranawe. (Mat. 21:28-31) Olsem wanem? Yumi gat wankain strongpela tingting long autim tok, maski wanpela i stretim yumi o asainmen bilong yumi i gat hatwok long en?
3. Long wok autim tok bilong yumi, bilong wanem yumi mas i gat strongpela bel na daunim laik bilong yumi yet?
3 Strongpela Bel na Daunim Laik Bilong Em Yet: Taim Jona i luksave olsem em i no bin mekim gutpela disisen na klostu ol boskru i lusim laip bilong ol, em i redi long dai na bai ol i no ken bagarap. (Jna. 1:3, 4, 12) Bihain, taim em i autim tok long Ninive, em i wokabaut i go insait tru long taun, ating em i painim wanpela gutpela hap na bai em i ken autim tok long kot bilong Jehova. Pasin em i mekim i no olsem wanpela man bilong pret, nogat. Em pasin bilong wanpela profet bilong God i gat strongpela bel! (Jna. 3:3, 4) Olsem wanem long yumi long nau? God i mas strongim bel bilong yumi na bai yumi no ken pret long autim tok taim ol man i birua. (Apo. 4:29, 31) Yumi mas i gat pasin bilong daunim laik bilong yumi yet na bai yumi inap givim taim na mani samting bilong yumi bilong helpim wok autim tok.—Apo. 20:24.
4. Bilong wanem yumi mas lusim hap taim bilong skelim long bel ol gutpela piksa bilong ol profet bilong Jehova?
4 Taim yu ritim stori bilong wanpela profet bilong Jehova na sapos yu piksaim yu yet i bin i stap long taim bilong em na dispela samting i bin kamap, dispela bai helpim yu. Askim yu yet: ‘Sapos dispela samting i kamap long mi, bai mi mekim wanem? Olsem wanem mi inap bihainim ol gutpela pasin bilong em?’ (Hib. 6:11, 12) Ol narapela stori bilong Wok Kingdom long bihain, bai stori long sampela gutpela pasin moa bilong ol narapela profet bilong Jehova em yumi inap kisim skul long en.