Wanem Samting i Kirapim Yumi Long Autim Tok?
1. Pasin bilong laikim husat i kirapim yumi long autim tok?
1 Wok bilong autim gutnius long Kingdom Bilong God i nambawan gutpela wok yumi inap mekim long nau. Tru tumas, long rot bilong dispela wanpela wok tasol yumi kamapim olsem yumi bihainim dispela tupela bikpela lo, em long laikim Jehova na laikim ol arapela. (Mak 12:29-31) Pasin laikim i gat strong long kirapim yumi long givim bel tru long autim tok.—1 Jon 5:3.
2. Olsem wanem wok autim tok bilong yumi i kamapim pasin bilong laikim Jehova?
2 Laikim Jehova: Pasin bilong laikim tru gutpela Pren bilong yumi, Jehova, i kirapim yumi long tokim ol narapela man long em. Klostu 6,000 yia i go pinis Satan i bin krungutim gutnem bilong God. (2 Kor. 4:3, 4) Olsem na ol man i bilip olsem God i save givim pen long ol man nogut long bikpaia, em i wanpela god Triwan, na em i no save tingim ol man. Na tu, planti man i ting olsem God i no stap. Yumi laik tru bai ol man i mas save long Papa bilong yumi long heven em i husat tru! Yumi wok strong long autim tok bilong God na dispela i mekim em i amamas, tasol Satan i belhat.—Snd. 27:11; Hib. 13:15, 16.
3. Long wanem rot wok autim tok bilong yumi i kamapim pasin bilong laikim ol arapela?
3 Laikim Ol Arapela: Olgeta taim yumi autim tok long wanpela man, yumi mekim pasin laikim long em. Nau long dispela taim bilong planti hevi, ol manmeri i mas harim gutnius. Olsem ol Ninive long taim bilong Jona, planti man long nau ol i no “save wanem samting i stret na wanem samting i no stret.” (Jna. 4:11, NW ) Wok bilong yumi long skulim ol man i helpim ol na ol inap i stap gut na stap amamas. (Ais. 48:17-19) Em i strongim ol long wetim gutpela samting long bihain. (Rom 15:4) Na sapos ol i harim na bihainim ol tok ol i lainim, God bai “kisim bek ol.”—Rom 10:13, 14.
4. Jehova i no inap lusim tingting long wanem samting?
4 Ol gutpela pikinini i no save soim pasin laikim long papamama long ol bikpela de tasol, nogat. Ol i save laikim papamama long olgeta taim. Olsem tasol, pasin bilong laikim tru God na ol narapela bai kirapim yumi long redi oltaim long autim tok taim rot i op, na yumi no autim tok tasol long ol de yumi makim bilong autim tok. Bai yumi no lusim wok bilong autim gutnius. (Apo. 5:42) Jehova i no inap lusim tingting long dispela kain pasin laikim.—Hib. 6:10.