Bihainim Gutpela Piksa Bilong Ol Profet—Sefanaia
1. Olsem wanem Sefanaia i mekim wok olsem wanpela profet? Olsem wanem em i stap gutpela piksa bilong yumi long nau?
1 Em namel long yia 700 B.C.E, na ol Juda i kirap long lotuim god Bal. I no longtaim i go pinis ol i kilim king nogut, Amon, na nau yangpela Josaia i kirap mekim wok king. (2 Sto. 33:21–34:1) Long dispela taim, Jehova i kirapim Sefanaia long autim tok long kot bilong Em. Sefanaia i kam long wanpela famili bilong ol lain king bilong Juda, tasol em i no daunim strong bilong tok bilong God long bagarap bai painim ol hetman bilong Juda. (Sef. 1:1; 3:1-4) Olsem tasol, yumi wok strong long bihainim pasin bilong Sefanaia long strongim bel na yumi no larim ol samting bilong famili i pasim yumi long lotuim Jehova. (Mat. 10:34-37) Sefanaia i autim tok long wanem samting? Wanem samting i kamap?
2. Yumi mas mekim wanem na Jehova bai lukautim yumi long de bilong belhat bilong em?
2 Kam Long Jehova: Jehova tasol inap kisim bek yumi long de bilong belhat bilong em. Olsem na Sefanaia i tokim ol Juda long ol i mas kam long Jehova, mekim pasin i stret, na daunim ol yet taim dispela de i no kamap yet. (Sef. 2:2, 3) Dispela i wankain long taim bilong yumi. Olsem Sefanaia, yumi kirapim ol narapela long kam long Jehova, tasol yumi tu i mas bihainim dispela tok, na wok strong long no ken “givim baksait” long Jehova. (Sef. 1:6) Yumi kam long Jehova long rot bilong stadi long Tok bilong em na long rot bilong beten long em i ken stiaim yumi. Yumi bihainim stretpela pasin taim yumi stap klin long ai bilong God. Na yumi mekim pasin daun taim yumi kisim tingting bilong daunim yumi yet na redi long bihainim tok i kam long oganaisesen bilong Jehova.
3. Bilong wanem yumi mas holim stretpela tingting long wok autim tok?
3 Ol Gutpela Samting i Kamap: Ol tok bilong kot bilong Jehova em Sefanaia i autim i kirapim sampela Juda, wanpela em bilong ol em yangpela Josaia, husat i kirap long painim Jehova long taim em liklik mangi yet. Bihain Josaia i wok strong tru long rausim olgeta samting bilong ol god giaman long Juda. (2 Sto. 34:2-5) Long nau, sampela sid bilong Kingdom i pundaun long arere bilong rot, antap long ol ston, o namel long ol rop i gat nil, tasol sampela i pundaun long gutpela graun na i karim planti kaikai. (Mat. 13:18-23) Yumi save olsem Jehova bai wok yet long blesim wok yumi mekim taim yumi wok strong long autim tok bilong Kingdom.—Sng. 126:6.
4. Bilong wanem yumi mas “wet long dispela De” bilong Jehova?
4 Sampela Juda i kisim tingting olsem Jehova i no inap mekim wanpela samting. Tasol Jehova i bin promis olsem de bilong belhat bilong em i bin kam klostu pinis. (Sef. 1:12, 14) Jehova bai kisim bek ol man husat i kam long em olsem ples hait bilong ol. (Sef. 3:12, 17) Taim yumi “wet long dispela De” bilong Jehova, yumi amamas long stap wanbel wantaim ol wanbilip i lotuim nambawan God bilong yumi!—Sef. 3:8, 9.