De Bilong Jehova Long Mekim Kot i Klostu Pinis!
“De bilong Bikpela i mekim kot bilong en, em i klostu nau na dispela De bai i kamap kwiktaim tru.”—SEFANAIA 1:14.
1. God i bin mekim wanem tok lukaut long rot bilong Sefanaia?
LIKLIK taim nau na God Jehova bai kirap na mekim save long ol man nogut. Harim! Em i mekim wanpela tok lukaut, i tok: “Mi laik bagarapim . . . olgeta man. . . . Bai mi pinisim olgeta manmeri bilong graun, na i no gat wanpela inap i stap.” (Sefanaia 1:2, 3) Bikpela King Jehova i bin mekim dispela tok long rot bilong profet Sefanaia, ating em i wanpela tumbuna pikinini bilong King Hesekia, em i bin stap gut long Jehova. Dispela tokaut i bin kamap long taim bilong King Josaia i makim olsem taim nogut bai painim ol manmeri i mekim pasin nogut, em ol i stap long Juda.
2. Olsem wanem na ol samting Josaia i mekim i no pasim de bilong Jehova long mekim kot?
2 Sefanaia i autim strong tok profet na ating dispela i kirapim tingting bilong yangpela King Josaia long em i mas rausim olgeta samting nogut bilong lotu giaman i stap long Juda. Tasol wok bilong Josaia long rausim lotu giaman, dispela i no pinisim olgeta pasin nogut ol man i mekim, o tekewe ol bikpela rong bilong bubu bilong em, King Manase, em “i bin kilim i dai planti stretpela manmeri i no gat rong long olgeta hap bilong Jerusalem.” (2 King 24:3, 4; 2 Stori 34:3) Olsem na de bilong Jehova long mekim kot em bai kamap tru.
3. Olsem wanem yumi ken save tru olsem yumi inap abrusim bagarap long de Jehova i kamapim belhat bilong em?
3 Tasol i gat sampela man bai abrusim bagarap long dispela bikpela de. Olsem na profet bilong God i tokaut strong olsem: “Nogut God i kamapim belhat bilong en na wantu bai yupela i bagarap olsem ol plaua i drai. Nogut belhat bilong Bikpela i kamap na kukim yupela olsem paia. Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.” (Sefanaia 2:2, 3) Em nau, i gat rot long abrusim bagarap long de bilong Jehova long mekim kot, olsem na nau yumi ken skelim ol ves bilong Buk Sefanaia. Profet Sefanaia i bin raitim long Juda paslain long yia 648 B.C.E., na em i hap bilong ol ‘tok profet’ bilong God em yumi olgeta i mas putim gut yau long en.—2 Pita 1:19.
Jehova Bai Mekim Save Long Ol
4, 5. Olsem wanem truim bilong Sefanaia 1:1-3 i kamap long ol man nogut long Juda?
4 Bilong kirapim dispela ‘tok Bikpela i givim long Sefanaia,’ Jehova i mekim tok lukaut em yumi bin kamapim pastaim. God i tok: “Mi laik bagarapim olgeta samting i stap long graun, em olgeta man na ol abus na ol pisin na ol pis. Na bai mi pinisim tru olgeta samting i save pulim ol manmeri long mekim pasin nogut. Bai mi pinisim olgeta manmeri bilong graun, na i no gat wanpela inap i stap. Mi Bikpela, mi tok pinis.”—Sefanaia 1:1-3.
5 Tru tumas, Jehova bai pinisim pasin nogut long Juda. Tasol God bai mekim wok long husat bilong “bagarapim olgeta samting i stap long graun”? Yumi ken ting Sefanaia i mekim tok profet long taim Josaia i nupela yet long wok king, em i bin kirap mekim long yia 659 B.C.E. Olsem na truim bilong dispela tok profet i kamap long taim Juda na nambawan biktaun bilong en, Jerusalem, i bagarap long han bilong ol Babilon long yia 607 B.C.E. Long dispela taim God i “pinisim tru” ol man i mekim pasin nogut em ol i stap long Juda.
6-8. Sefanaia 1:4-6 i tok profet long wanem samting? Truim bilong dispela tok profet i bin kamap olsem wanem long Juda?
6 Sefanaia 1:4-6 i tok profet long ol samting God bai mekim long ol man i save mekim lotu giaman, na i tok: “Bai mi wilwilim ol manmeri bilong Juda na Jerusalem. Bai mi bagarapim olgeta samting bilong lotu bilong giaman god Bal wantaim olgeta pris bilong Bal, na bai ol manmeri i no inap tingim ol gen. Bai mi bagarapim ol manmeri i save go antap long stretpela het bilong ol haus bilong ol na lotu long san na mun na ol sta. Tru, planti manmeri i save lotu long mi na i tok, ‘Tru antap, mipela i bihainim Bikpela.’ Tasol ol i save go lotu tu long giaman god Molek na tok, ‘Tru antap, mipela i bihainim god Molek.’ Olsem na bai mi bagarapim ol. Ol manmeri i save givim baksait long mi na i no moa bihainim mi na i no save kam long mi na askim mi long stiaim ol. Bai mi bagarapim ol dispela manmeri tu.”
7 Jehova i laik wilwilim ol manmeri bilong Juda na Jerusalem. Em i strong long kilim i dai ol man i lotuim god Bal bilong ol Kenan. Ol Kenan i save kolim sampela god bilong ol olsem Bal, long wanem, ol i ting ol dispela god i gat strong long stiaim ol samting i kamap long sampela ples. Olsem: Ol Moap na Midian i bin lotuim Bal long maunten Peor. (Namba 25:1, 3, 6) Long olgeta hap bilong Juda, Jehova bai bagarapim ol pris bilong Bal wantaim ol pris Livai i no stap gut long God na ol i brukim lo bilong em na poroman wantaim ol dispela pris bilong Bal.—Kisim Bek 20:2, 3.
8 God bai bagarapim tu ol man i save “lotu long san na mun na ol sta”—ating ol i save lukluk long ol sta bilong kisim save long ol samting bai kamap bihain. (2 King 23:11; Jeremaia 19:13; 32:29) Belhat bilong God bai painim tu ol man i laik bungim lotu i tru wantaim lotu giaman—ol i mekim tok tru antap long Jehova na long Molek, em nambawan god bilong ol Amon. Taim ol i lotuim Molek, ol i save kilim i dai ol pikinini olsem ofa.—1 King 11:5; Jeremaia 32:35.
Klostu Nau Kristendom Bai Bagarap!
9. (a) Ol lain bilong Kristendom i gat asua long wanem samting? (b) Yumi narapela kain long ol man bilong Juda i no bin stap gut long God, olsem na yumi mas strong long mekim wanem?
9 Dispela samting i kirapim yumi long tingim ol lotu bilong nau i holim nating nem Kristen, olsem Kristendom, em ol i save bihainim lotu giaman na lukluk long ol sta bilong kisim save long ol samting bai kamap bihain. Na ol i insait tru long wok bilong salim planti milion man i go long ol pait em ol pris pasto i save helpim na ol i orait long en—i olsem ol i givim ol dispela man olsem ofa! Em samting nogut tru! Yumi no ken kamap wankain olsem ol Juda i no bin stap gut long God, em ol ‘i no moa bihainim Jehova’ na ol i les na i no wok moa long painim em o askim em long soim rot long ol. Yumi mas holimpas pasin bilong i stap gut long God.
10. Bai yu stori olsem wanem long samting tok profet bilong Sefanaia 1:7 i makim?
10 Narapela tok bilong profet i stret tru long ol Juda i bin mekim rong na ol man nogut bilong nau. Sefanaia 1:7 i tok: “De bilong Bikpela em i kam klostu pinis. Olsem na yupela i mas kam klostu long em na pasim maus i stap. Bikpela i redi long kilim ol manmeri bilong en olsem ol man i kilim ol abus bilong mekim ofa. Na em i singautim ol arapela man i kam bilong lukim ol samting em i laik mekim, na em i tokim ol long bihainim pasin bilong mekim ol yet i kamap klin long ai bilong en.” Yumi ken ting ol dispela man ‘God i singautim ol,’ em ol lain Babilon, ol i birua bilong Juda. Na dispela “ofa” em Juda yet wantaim nambawan biktaun bilong en. Olsem na Sefanaia i tokaut long laik bilong God, em i laik bagarapim Jerusalem, na dispela tok profet i makim tu bagarap bai painim Kristendom. Tru tumas, de bilong God long mekim kot i kam klostu pinis, olsem na olgeta lain bilong graun i mas “pasim maus” na harim ol tok Bikpela King Jehova i mekim long rot bilong “liklik lain” bilong Jisas wantaim ol poroman bilong ol, em “ol arapela sipsip” bilong em. (Luk 12:32; Jon 10:16) Bagarap i laik painim olgeta manmeri i no laik harim tok na ol i kamapim klia olsem ol i nolaik tru long Kingdom bilong God i bosim graun.—Song 2:1, 2.
Klostu Nau—Taim Bilong Krai Nogut!
11. Wanem insait bilong Sefanaia 1:8-11?
11 Sefanaia 1:8-11 i stori moa long de bilong Jehova: “Long dispela De bilong kilim ol manmeri bilong mi, bai mi mekim save long ol ofisa bilong king na long ol pikinini man bilong king na long olgeta man i save bihainim pasin [olsem pasim klos] bilong ol haiden. Bai mi mekim save long olgeta manmeri i save lotu olsem ol haiden na i save stil na kilim ol man, na pulimapim haus bilong bikman bilong ol long ol samting ol i bin stilim. Bikpela i tok olsem, ‘Long dispela De bai yupela i lukim ol manmeri i sanap klostu long dispela dua bilong banis bilong Jerusalem, ol i kolim Dua Bilong Pis, na bai yupela i harim ol i krai i stap. Bai yupela i harim krai bilong ol manmeri bilong Niutaun bilong Jerusalem. Na bai yupela i harim wanpela samting i pairap strong long ol maunten. Taim yupela i stap long ples daun bilong taun na harim ol dispela samting, orait bai yupela i krai, long wanem, bai yupela i lukim olgeta bisnisman bilong yupela i dai pinis.’ ”
12. Olsem wanem na i gat sampela lain i olsem ol i pasim klos “bilong ol haiden”?
12 Taim King Josaia i dai, ol narapela bai senisim em na kamap king, olsem Joahas, Jehoiakim, na Jehoiakin. Bihain long ol, Sedekaia bai stap king, na long dispela taim Jerusalem bai bagarap. Tasol maski dispela bagarap i laik painim ol, sampela ol i “bihainim pasin [olsem pasim klos] bilong ol haiden” bambai ol dispela lain i stap klostu ol i ken laikim ol. Na olsem tasol planti man long nau i kamapim klia long kain kain rot olsem ol i no bilong oganaisesen bilong Jehova. Ol samting ol i mekim i kamapim olsem ol i insait long oganaisesen bilong Satan, olsem na ol bai kisim strafe.
13. Wanem samting bai kamap taim ol Babilon i kam pait long Jerusalem na dispela i stret wantaim tok profet bilong Sefanaia?
13 “Dispela De” bilong Juda long kisim kot em i wankain long de bilong Jehova long givim strafe bilong kot long ol birua bilong em, bilong pinisim ol pasin nogut na bilong kamapim long ples klia olsem em i nambawan bikpela God. Taim ol Babilon i kam pait long Jerusalem, bikpela krai bai kamap long hap bilong Dua Bilong Pis. Ating ol i kolim dispela dua olsem, long wanem, em i stap klostu long ples ol i save maket long pis. (Nehemia 13:16) Bikpela lain ami bilong Babilon bai kam insait long hap ol i kolim Niutaun, na dispela “samting i pairap strong long ol maunten,” ating em i makim pairap bilong ol bikpela lain ami bilong Babilon ol i kam klostu. Ol manmeri i stap long ples daun bilong taun ol i kolim Maktes bai ol i “krai.” Bilong wanem ol bai krai? Long wanem, wok bilong ol “bisnisman” long dispela hap bai pinis.
14. Ol man i tok ol i save lotuim Jehova, em bai skelim pasin bilong ol i go inap long wanem mak?
14 Taim Jehova i skelim pasin bilong ol man i save tok ol i lotuim em, em bai mekim i go inap long wanem mak? Tok profet i tok moa olsem: “Long dispela taim bai mi kisim lam na bai mi go raun insait long Jerusalem na painim ol man i no save laikim pasin bilong mi. Ol i ting ol yet inap long mekim olgeta samting, tasol nogat. Ol i tok, ‘God i save sindaun nating. Em i no helpim ol gutpela man na em i no bekim pe long ol man nogut. Olsem na maski long em.’ Orait bai mi bagarapim ol dispela man. Ol arapela man bai i stilim ol samting bilong ol dispela man, na bagarapim ol haus bilong ol. Ol i bin wokim ol nupela haus, tasol ol bai i no inap i stap long ol. Na ol i planim ol diwai wain, tasol ol bai i no inap kisim ol pikinini bilong ol dispela diwai na wokim wain long en.”—Sefanaia 1:12, 13.
15. (a) Wanem samting bai painim ol pris bilong Jerusalem em ol i bikhet na kisim ol narapela god? (b) Wanem samting bai painim ol lain bilong nau i save mekim lotu giaman?
15 Ol pris bilong Jerusalem em ol i bikhet long Jehova na kisim ol narapela god, ol i bungim lotu bilong Jehova wantaim lotu haiden. Ol i ting ol i stap gut na i no gat wanpela samting bai kamap long ol, tasol God bai painim ol, olsem man i holim lam i lait strong na em bai sut i go insait long tudak bilong spirit em ol i hait i stap long en. I no gat wanpela bai abrusim dispela tokaut na strafe bilong kot bilong Jehova. Ol dispela man i bin bikhet long Jehova, ol i les na sindaun isi tru i stap, olsem meme bilong wain i stap long as bilong tang wain. Ol i laik i stap olsem tasol, na ol i no laik harim wanpela tokaut long kot i laik painim ol, tasol ol i no inap abrusim strafe bilong dispela kot bilong God i painim ol. Na i wankain tu long ol lain bilong nau i save mekim lotu giaman—insait long dispela lain em Kristendom na sampela man i bin bikhet na lusim lotu tru bilong Jehova—ol tu i no inap abrusim strafe bilong God. Ol i sakim dispela tok olsem yumi stap long “taim bilong las de,” na ol i tok long bel bilong ol olsem: ‘God i no helpim ol gutpela man na em i no bekim pe long ol man nogut.’ Tasol tingting bilong ol i kranki stret!—2 Timoti 3:1-5; 2 Pita 3:3, 4, 10.
16. Wanem samting bai kamap taim kot bilong God i painim Juda? Save bilong dispela samting i mas mekim wanem long yumi?
16 Ol dispela lain bilong Juda i lusim pinis Jehova ol i kisim tok lukaut olsem ol Babilon bai kam kisim ol mani kago samting bilong ol, na pinisim ol lain bilong ol na ol haus bai stap nating, na kisim ol pikinini wain i stap long ol rop wain bilong ol. Ol kago samting bai i no inap helpim ol taim kot bilong God i painim Juda. Na i wankain tu long taim de bilong kot bilong Jehova i painim ol lain bilong dispela graun. Olsem na yumi mas tingim ol samting bilong spirit na wok long ‘bungim ol gutpela samting bilong yumi long heven,’ olsem putim wok bilong Jehova i stap olsem namba wan samting long i stap bilong yumi!—Matyu 6:19-21, 33.
Bikpela De Bilong Jehova i Klostu Pinis
17. Olsem yumi lukim long Sefanaia 1:14-16, de bilong Jehova long mekim kot i klostu pinis o olsem wanem?
17 Olsem wanem? De bilong Jehova long mekim kot i klostu pinis? Sefanaia 1:14-16 i tok, God i givim toksave long yumi olsem: “De bilong Bikpela i mekim kot bilong en, em i klostu nau na dispela De bai i kamap kwiktaim tru. Long dispela De nogut, maski ol man i strongpela soldia, ol tu bai i pret nogut na krai moa yet. Long dispela De, belhat bilong God bai i kamap ples klia, na bai ol manmeri i gat bikpela hevi na bel nogut, na bai ol samting i bagarap nabaut. Na ol klaut bai i karamapim san na bikpela tudak bai i kamap. Long dispela De ol biugel bai i krai na ol soldia bai i bikmaus na singaut long taim ol i mekim save pait long ol taun i gat strongpela banis na long ol longpela haus bilong ol wasman.”
18. Bilong wanem yumi no ken ting de bilong Jehova long mekim kot i longwe yet?
18 Ol lain bilong mekim sin long Juda, olsem ol pris na bikman na ol manmeri, ol i kisim toksave olsem “De bilong Bikpela i mekim kot bilong en, em i klostu nau.” Dispela de bilong Jehova “bai i kamap kwiktaim tru” long ol Juda. Na i olsem tu long taim bilong yumi—nogut ol man i ting de bilong Jehova long mekim kot na givim strafe long ol man nogut em bai kamap bihain bihain. God i bin kirap kwik na mekim save long ol Juda, na olsem tasol de bilong em long mekim kot bai kamap “kwiktaim tru.” (KTH 16:14, 16) Man! Em taim nogut tru bilong ol man i givim baksait long ol tok lukaut bilong Jehova em ol Witnes bilong em i autim na ol i no kirap na bihainim lotu i tru!
19, 20. (a) Wanem sampela samting i kamap long de bilong God long kamapim belhat bilong em long Juda na Jerusalem? (b) Long de bilong kot ol man nogut tasol bai bagarap, olsem na i gat wanem ol askim i kamap?
19 Taim God i kamapim belhat bilong em long Juda na Jerusalem, em i de bilong “bikpela hevi na bel nogut.” Taim ol lain bilong Babilon i kam pait long Juda, ol Juda i kisim planti pen na hevi, na bel bilong ol i bagarap stret, long wanem, dai na bagarap i laik painim ol. Long dispela de bilong bikpela bagarap, ol klaut i karamapim san na bikpela tudak i kamap, na ating em i no tok piksa tasol—em i kamap tru tru, long wanem, i gat bikpela smok i kamap na planti man i bagarap na skin bilong ol i slip nabaut long graun. Long dispela ‘De ol biugel i krai na ol soldia i bikmaus na singaut,’ tasol ol dispela tok lukaut i lus nating tasol.
20 Ol Babilon i holim ol bikpela pos diwai na sutim i go long banis bilong “ol longpela haus” na ol i pundaun, na ol wasman bilong Jerusalem i no inap mekim wanpela samting. Long taim bilong yumi tu, ol strongpela haus i gat ol samting bilong pait bai i no inap helpim ol man long sakim ol samting bilong pait Jehova i holim long heven na em bai mekim wok long en bilong bagarapim ol man nogut. Olsem wanem long yu? Yu laik abrusim bagarap long dispela taim? Yu sanap pinis long lain bilong Jehova? “Em i save was gut long ol manmeri i save laikim em tru. Tasol em bai i bagarapim ol manmeri i save mekim pasin nogut.”—Song 145:20.
21, 22. Truim bilong Sefanaia 1:17, 18 bai kamap olsem wanem long taim bilong yumi?
21 Man! Sefanaia 1:17, 18 i tok profet long wanpela de bilong kot i nogut tru! God Jehova i tok: “Ol manmeri i bin mekim sin long mi, olsem na bai mi mekim ol kain kain bagarap nogut tru i kamap long ol na bai ol i wokabaut olsem ol aipas i save painim painim rot bilong wokabaut. Na bai blut bilong ol i kapsait olsem wara na bai ol i dai. Na ol bodi bilong ol bai i sting nabaut long graun olsem pekpek bilong dok. Long dispela De belhat bilong Bikpela bai i kamap ples klia, na olgeta silva na gol bilong ol bai i no inap helpim ol. Nogat tru. Belhat bilong en bai i kamap olsem paia na kukim olgeta hap bilong graun. Na wantu bai em i pinisim tru olgeta manmeri bilong graun.”
22 Olsem Jehova i bin mekim long taim bilong Sefanaia, olsem tasol em bai kamapim bikpela hevi tru long “olgeta manmeri bilong graun” em ol i no laik putim yau long tok lukaut bilong em. Ol i mekim sin long God, olsem na ol bai wokabaut olsem ol aipas i no gat helpim, na ol i no inap painim rot bilong abrusim bagarap. Long de bilong Jehova long mekim kot, blut bilong ol bai “kapsait olsem wara,” olsem pipia samting tasol. Indai bilong ol bai i gat bikpela sem tru long en, long wanem, God bai tromoi skin bilong ol dispela man nogut—na ol rop bilong bel tu—i go nabaut long graun, “olsem pekpek bilong dok.”
23. Ol man bilong mekim rong i no ken abrusim bagarap long de bilong belhat bilong Jehova, tasol tok profet bilong Sefanaia i makim olsem yumi inap bilip long wanem samting?
23 Ol man i pait long Jehova na lain bilong em, i no gat wanpela man inap helpim ol long abrusim bagarap. Silva na gol i no bin helpim ol man bilong Juda i save mekim rong, na olsem tasol long “De belhat bilong [Jehova]” i painim ol lain bilong Kristendom na ol narapela lain bilong dispela graun, bikpela mani ol i hipim i stap na ol grismani bilong ol bai i no inap lukautim ol o helpim ol long ranawe na abrusim bagarap. Long dispela bikpela de bilong mekim kot, belhat bilong God bai i kamap olsem paia na kukim “olgeta hap bilong graun” taim em i wok long bagarapim ol man nogut na pinisim ol olgeta. Yumi save bilip long ol tok profet bilong God, olsem na yumi save bilip tru olsem yumi stap klostu long pinis bilong “taim bilong las de.” (Daniel 12:4) De bilong Jehova long mekim kot i klostu pinis, na liklik taim nau na em bai givim strafe bilong dispela kot long ol birua. Tasol tok profet bilong Sefanaia i makim tu olsem yumi inap bilip long God bai kisim bek sampela man long dispela taim na ol i no ken bagarap. Olsem na yumi mas mekim wanem bambai Jehova i ken haitim yumi long de bilong belhat bilong em?
Bai Yu Bekim Olsem Wanem?
• Truim bilong tok profet bilong Sefanaia i kamap olsem wanem long Juda na Jerusalem?
• Wanem samting bai painim Kristendom na olgeta man nogut long taim bilong yumi?
• Bilong wanem yumi no ken ting de bilong Jehova bai kamap bihain bihain?
[Piksa long pes 13]
Sefanaia i tokaut strong olsem de bilong Jehova long mekim kot i klostu pinis
[Kredit Lain]
From the Self-Pronouncing Edition of the Holy Bible, containing the King James and the Revised versions
[Piksa long pes 15]
De bilong Jehova i painim Juda na Jerusalem long han bilong Babilon long yia 607 B.C.E.
[Piksa long pes 16]
Yu laik abrusim bagarap long taim Jehova i bagarapim ol man nogut?