Putim Tok i Go Daun Long Bel
1. Tok bilong Jisas i mekim wanem long ol man?
1 Jisas Krais i putim tok i go daun long bel bilong ol man. Wanpela taim Jisas i stori long ol disaipel long mining bilong ol tok i stap long Rait Holi, na “bel bilong [ol] i bin kirap tru.” (Luk 24:32) Bel i mas kirapim man long bihainim tok bilong God. Olsem na hau bai yumi inap kirapim tingting bilong sumatin bambai em inap mekim ol senis long laip bilong em?—Rom 6:17.
2. Olsem wanem savetingting inap helpim yumi long putim tok i go daun long bel bilong man?
2 Bihainim Savetingting: Yumi inap tokim ol man long ol pasin i stret na ol pasin i no stret, tasol planti bilong ol i no inap larim dispela tok i stiaim ol. Sapos yumi kamapim planti skripsa bilong daunim bilip bilong ol, dispela inap pasim ol long putim yau. Olsem na pastaim yumi mas painimaut risen bilong bilip em i holim, na pasin em i bihainim. Sapos yumi givim ol askim i stret, em bai autim ol tingting i stap insait tru long bel bilong em. (Snd. 20:5) Long dispela rot tasol yumi inap kamapim ol tok bilong Baibel we man inap pilim tru. Olsem na yumi mas soim olsem yumi tingim em, na yumi no ken les kwik. (Snd. 25:15) Sampela man i save kamap strong kwik long bilip, na sampela nogat. Larim sampela haptaim i lus bambai holi spirit i ken stiaim tingting na pasin bilong man.—Mak 4:26-29.
3. Olsem wanem yumi inap helpim ol sumatin long kisim ol gutpela pasin?
3 Helpim Ol Long Kisim Ol Gutpela Pasin: Ol sumatin inap kisim ol gutpela pasin sapos yumi toktok gut wantaim ol long ol stori bilong Baibel we i kamapim klia ol gutpela pasin na pasin laikim bilong Jehova. Yumi ken yusim ol skripsa olsem Song 139:1-4 na Luk 12:6, 7, na dispela bai helpim sumatin long luksave olsem God i tingim tru yumi olgeta wan wan. Taim sumatin i pilim tru bikpela pasin helpim bilong Jehova, dispela bai strongim em long laikim God na givim bel moa yet long Em. (Rom 5:6-8; 1 Jon 4:19) Na tu, taim sumatin i kisim save olsem pasin bilong em inap mekim Jehova i amamas o bel hevi, dispela bai kirapim em long bihainim pasin we bai givim biknem long Jehova.—Sng. 78:40, 41; Snd. 23:15.
4. Taim yumi autim tok na mekim wok tisa, olsem wanem yumi inap soim rispek long man na larim em yet i mekim disisen long sampela samting?
4 Jehova i no save fosim man long bihainim ol tok bilong em, nogat. Em i save tokim man long gutpela samting bai kamap sapos em i bihainim skultok bilong God, na dispela i save kirapim man long bihainim tok. (Ais. 48:17, 18) Yumi bihainim pasin bilong Jehova taim yumi mekim wok tisa long pasin we inap helpim man long wokim tingting bilong em yet. Em gutpela moa taim man yet i luksave olsem em i mas mekim ol senis long laip bilong em. (Rom 12:2) Dispela bai kirapim man long i go klostu moa long Jehova, em man bilong “traim bel bilong yumi . . . na painimaut” olsem yumi wanem kain man.—Snd. 17:3.