Soim Olsem Yu Tingim Narapela

TAIM yumi autim tok i tru bilong Baibel long ol man, yumi no laik bai dispela tok i stap tasol long tingting bilong man. Yumi laik bai em i pilim dispela tok long bel bilong em. Wanpela rot bilong mekim olsem em bilong soim olsem tru tru yumi tingim ol man i harim tok bilong yumi. Yumi inap kamapim dispela long kain kain rot.

Tingim Tingting Bilong Man. Aposel Pol i bin tingim sindaun na tingting bilong ol man i harim tok bilong em. Em i tok: ‘Taim mi stap wantaim ol Juda mi bihainim pasin bilong ol, bilong kisim ol Juda. Long ol man i no gat lo, mi stap olsem man i no aninit long lo, bilong kisim ol man i no aninit long lo. Mi bin kisim pasin bilong olgeta kain man, long wanem, mi laik kisim bek sampela bilong ol. Mi save mekim dispela olgeta wok bilong mekim gutnius bilong Jisas i kamap strong, bai mi tu mi ken kisim ol gutpela samting Bikpela i redim pinis bilong givim long ol man i bilip long gutnius.’ (1 Ko. 9:​20-23) Olsem wanem yumi inap ‘kisim pasin bilong olgeta kain man’ long nau?

Sapos yu inap skelim liklik ol man taim yu no kirap yet long toktok wantaim ol, ating yu inap luksave long sampela laik na sindaun bilong ol. Olsem wanem? Yu inap luksave long wok mani bilong ol? o samting i makim lotu bilong ol? o samting i makim sindaun bilong famili i olsem wanem? Orait, taim yu luksave pinis long ol kain samting olsem, yu inap senisim tok yu laik mekim na bai ol man i laikim moa tok bilong yu?

Bilong kamapim ol tok ol man i stap long teritori bilong yu bai i gat laik long harim, pastaim yu mas tingting gut long ol tok yu bai mekim long ol. Long sampela hap i gat ol man bilong ol narapela kantri i kam sindaun i stap. Olsem wanem? Sapos i gat ol kain man olsem i stap long teritori bilong yu, yu painim pinis wanpela gutpela rot long autim tok long ol? Yumi save em i laik bilong God long “kisim bek olgeta manmeri, bai ol i ken save long as bilong tok tru,” olsem na yumi laik autim tok bilong Kingdom long wanpela rot we ol man yumi bungim bai i gat laik long harim.​—1 Ti. 2:4.

Putim Gut Yau. Maski Jehova i save long olgeta samting, em i save putim yau long tok bilong ol narapela. God i givim wanpela driman long profet Mikaia, em i lukim Jehova i kirapim ol ensel long kamapim tingting bilong ol long mekim wanpela samting. Bihain God i larim wanpela ensel i bihainim tingting ensel yet i bin kamapim. (1 Kin. 22:​19-22) Taim Abraham i tingting planti long strafe bai painim Sodom, Jehova i larim em i kamapim tingting bilong em. (Stt. 18:​23-33) Olsem wanem yumi ken bihainim pasin bilong Jehova long putim yau taim yumi mekim wok autim tok?

Kirapim ol man long kamapim tingting bilong ol. Kamapim wanpela askim, na larim ol i bekim. Putim yau tru tru long tok bilong ol. Dispela bai kirapim ol long autim tru tingting bilong ol. Sapos bekim bilong ol i kamapim sampela laik bilong ol, orait long gutpela pasin givim sampela askim moa long ol. No ken givim planti askim tumas long ol, tasol wok long kisim save long ol. Sapos inap, tok amamas long tingting ol i kamapim. Maski yu no wanbel long tingting bilong ol, yu ken tok amamas long pasin bilong ol long kamapim dispela tingting.​—Kl. 4:6.

Tasol yumi mas was gut, nogut yumi laik save long sampela samting bilong ol i no stret yumi laik save long en. Tru yumi laik helpim ol narapela, tasol yumi no ken traim long kisim save long olgeta samting. (1 Pi. 4:​15, NW) Sapos yumi brata na yumi autim tok long meri o yumi sista i autim tok long man, na yumi laik soim olsem yumi tingim em, yumi mas was gut, nogut em i kisim tingting kranki olsem yumi gat laik long em. Wanem ol askim i stret long givim long man, ol i narapela narapela long ol wan wan ples na long ol wan wan man, olsem na yumi mas skelim gut hamas askim yumi givim long ol man.​—Lu. 6:31.

Pasin bilong redi gut i save helpim yumi long putim gut yau. Taim tok yumi laik mekim i stap gut long tingting bilong yumi, yumi inap i stap isi na putim gut yau long tok ol narapela i mekim. Dispela bai mekim na ol bai stap isi na ating ol bai i gat laik long toktok wantaim yumi.

Yumi save givim biknem long ol man taim yumi putim yau long tok ol i mekim. (Ro. 12:10) Dispela i soim olsem yumi ting tingting bilong ol na ol samting ol i pilim long bel em i bikpela samting. Na tu, dispela inap mekim na ol bai putim yau moa yet long tok yumi mekim. Olsem na i gat as na Baibel i tok yumi mas “putim yau kwik long harim tok, tasol . . . no ken hariap long mekim toktok.”​—Jems 1:19.

Helpim Ol Long Kamap Strong. Laik bilong yumi long helpim man bai kirapim yumi long tingim yet ol man i gat laik long harim tok na bai yumi go bek lukim ol bilong kamapim ol tok i tru bilong Baibel i stret tru long helpim ol. Taim yu laik go bek lukim ol, tingim ol save yu bin kisim long namba wan taim yu bin bungim ol. Redim sampela tok long samting ol i gat laik long en. Kamapim olsem wanem dispela tok em i gutpela long bihainim, na olsem wanem tok ol i lainim inap helpim ol.​—Ais. 48:17.

Sapos man yu toktok wantaim i kamapim wanpela hevi em i tingting planti long en, orait tingim dispela i olsem rot bilong autim gutnius long em. Bihainim pasin bilong Jisas. Oltaim em i redi long mekim gut bel bilong ol man i bel hevi. (Mk. 6:​31-34) No ken tokim ol wantu long rot bilong stretim dispela hevi o mekim sampela tok i stori antap antap tasol long dispela. Dispela inap givim tingting long man olsem yu no tingim tru hevi bilong em. Yu mas soim olsem yu pilim tru hevi bilong em. (1 Pi. 3:8) Wok long painim save insait long ol buk i kamapim ol tok bilong Baibel, na kamapim ol tok bilong strongim na helpim man long karim hevi bilong em. Na tu, taim yu tingim tru man bai yu no kamapim ol samting bilong em long ol narapela sapos i no gat as bilong mekim olsem.​—Snd. 25:9.

Yumi mas tingim tru ol man yumi stadi wantaim ol long Baibel. Beten na tingting long ol samting bilong helpim ol wan wan sumatin, na tingim dispela samting taim yu redim stadi bilong ol. Askim yu yet olsem, ‘Em i mas mekim wanem samting nau bambai em i ken wok long kamap strong long samting bilong spirit?’ Long pasin sori helpim sumatin long pilim tru ol tok em Baibel na ol buk samting “wokboi i gat gutpela tingting” i kamapim. (Mt. 24:45) Sampela taim yumi no ken kamapim mining bilong wanpela tok tasol. Nogat. Ating yu mas soim sumatin long pasin bilong bihainim wanpela stiatok bilong Baibel, olsem mekim wanpela samting wantaim em bilong soim olsem wanem em i ken bihainim dispela tok.​—Jo. 13:​1-15.

Yu mas wok long skelim gut ol samting taim yu laik helpim ol narapela long stretim sindaun bilong ol na bai em i stret wantaim ol lo bilong Jehova. Sindaun bilong ol man na save bilong ol long mekim ol samting i narapela narapela, na ol i no save kamap strong long wankain taim. Holim stretpela tingting long ol samting yu ting ol narapela inap long mekim. (Fl. 4:5) No ken subim ol long kamapim ol senis long i stap bilong ol. Larim Tok Bilong God na spirit bilong em i kirapim ol long senis. Jehova i laik bai ol man i mekim wok bilong em, long wanem, bel i kirapim ol long mekim, na i no olsem narapela i subim ol. (Sng. 110:3) No ken kamapim tingting bilong yu yet long ol samting ol i mas mekim, na maski ol i askim yu long mekim olsem, was gut, no ken tokim ol long samting ol i mas mekim.​—Ga. 6:5.

Givim Helpim. Namba wan tingting bilong Jisas em bilong helpim ol man long samting bilong spirit, tasol em i tingim ol long samting bilong skin tu. (Mt. 15:32) Maski yumi no gat planti samting bilong skin, i gat planti samting yumi inap mekim bilong helpim narapela.

Sapos yumi tingim ol narapela dispela bai kirapim yumi long mekim gut long ol. Olsem: Sapos ren samting i mekim na man yu autim tok long en i no stap gut, orait yu ken go sanap long hap em ren i no ken wasim em, o yu ken stretim tok long kam bek na stori wantaim em long narapela taim. Sapos i no gutpela taim long toktok wantaim man, orait tokim em yu laik kam bek long narapela taim. Sapos wanpela man i stap klostu long yu o wanpela man i gat laik long harim tok bilong yu na em i gat sik o em i stap long haus sik, yu ken raitim sotpela pas long em o go lukim em bilong soim olsem yu tingim em. Na tu, sapos i stret long mekim olsem yu ken redim liklik kaikai bilong em o mekim narapela gutpela pasin olsem.

Taim ol sumatin bilong Baibel i wok long kamap strong, ol inap bel hevi, long wanem, ol i no poroman tumas wantaim ol poroman bilong ol bilong bipo. Kamap pren bilong ol. Lusim sampela hap taim bihain long stadi na long ol narapela taim bilong toktok wantaim ol. Strongim ol long kisim ol gutpela poroman. (Snd. 13:20) Helpim ol long kam long ol miting Kristen. Sindaun wantaim ol long ol miting, na helpim ol long lukautim ol pikinini bilong ol bambai ol tok i kamap long miting i ken helpim tru olgeta.

Pasin Bilong Tingim Man i Mas Kirap Long Bel. Pasin bilong tingim narapela i no wanpela wok yu lain long mekim, nogat, em i wanpela pasin i stap long bel. I gat planti samting inap soim olsem yumi tingim ol narapela, olsem pasin bilong yumi long putim yau na ol tok yumi kamapim. Pasin bilong tingim ol narapela i kamap klia taim yumi mekim gutpela pasin long ol na tingim tru ol. Maski yumi no mekim wanpela tok, tingting bilong yumi long narapela na pes bilong yumi inap kamapim olsem yumi tingim em. Sapos yumi tingim tru ol narapela, ol bai luksave long dispela.

Nambawan as na yumi tingim gut ol man i olsem: Taim yumi mekim olsem yumi bihainim pasin sori na marimari bilong Papa bilong yumi long heven. Dispela i save helpim ol man long kam long Jehova na putim yau long tok em i givim yumi long autim long ol man. Olsem na taim yu autim gutnius, wok strong na bai yu ‘no ken lukautim ol samting bilong yu tasol. Yu mas lukautim ol samting bilong ol arapela na helpim ol long stap gut.’​—Fl. 2:4.