Tingim Ol Narapela
1 I gat planti samting i kamapim long ples klia olsem Jehova i Man bilong tingim ol narapela. Em i save lukautim gut ol samting em i bin wokim, a? (Stt 1:29, 30; 2:16, 17; Mt 5:45; lukim Luk 6:35.) Tasol bikpela samting em i mekim i olsem: Em i stretim rot bilong kisim bek yumi long sin na i dai, na dispela i makim olsem em i tingim gut yumi, a?—Jo 3:16.
2 Taim Jisas i stap long graun, em i bihainim gutpela pasin bilong Papa bilong em long tingim ol narapela na helpim ol. (Mt 11:28-30; 1 Pi 2:21) Wanpela man i gat sik lepra i pulap long skin bilong em, em i tokim Jisas olsem: “Bikpela, sapos yu laik, yu inap long mekim mi i kamap klin.” Na Jisas i tok, “Mi laik,” na em i oraitim dispela man. (Mt 8:2, 3) Taim Jisas i kam klostu long taun Nain, em i bungim sampela man i karim bodi bilong wanpela yangpela man i dai pinis. Mama bilong dispela yangpela man em i gat dispela wanpela pikinini tasol, na man bilong em tu i dai pinis. Jisas i sori tru long dispela meri na kirapim bek pikinini bilong em. (Lu 7:11-15) Jisas i save tingim tru ol narapela, na long laik bilong em yet em i kirap helpim ol, maski ol i no bin askim em long mekim. Na em i tingim tu ol liklik pikinini na em i givim taim bilong em long ol, maski em i gat planti wok long mekim. Oltaim em i save mekim gut bel bilong ol man i gat hevi na em i strongim ol.—Mt 20:31-34; Mk 10:13-16.
FAMILI NA OL PREN
3 Yumi mas wok strong long bihainim pasin bilong Jehova na Krais Jisas long tingim ol narapela. Olsem na gutpela sapos yumi tingim sampela rot bilong mekim olsem.
4 Wanpela bikpela wok em i olsem: Ol brata i mas tingim tru ol famili bilong ol yet na ol i no ken slek long lukautim ol long ol samting bilong spirit, olsem mekim famili-stadi long olgeta taim. Olsem wanem? Taim yu mekim famili-stadi, yu save mekim long pasin i save kirapim tingting bilong ol na bai ol i amamas long stadi na ol i ken save dispela stadi inap helpim ol? Yu save wok wantaim ol wan wan long famili bilong yu long autim tok long olgeta taim? Taim yu autim tok wantaim ol, yupela i save kisim amamas wantaim? Yu lainim gut ol pikinini bilong yu na bai ol i gat laik long helpim ol narapela manmeri, olsem mekim pasin sori Kristen long ol? Sapos yu marit, tasol ol pikinini bilong yu i bikpela pinis na ol i no stap moa wantaim yu, yu mekim famili-stadi yet wantaim meri bilong yu?
5 Sapos rot i op, yumi laik helpim olgeta manmeri long ol samting bilong spirit. Tasol yumi gat planti wok long mekim, na olsem wanem? Sampela taim yumi lusim tingting long mekim ol samting bilong tingim ol narapela long kongrigesen em ol i sot long ol samting? (Snd 3:27; Ga 6:10) Long kongrigesen Kristen i gat sampela pikinini i no gat papa, na i gat ol lapun, na ol meri em man bilong ol i dai pinis, na ol sikman, na ol man i bel hevi, na ol lek nogut, na kain man olsem. Bilong bihainim pasin bilong Jehova na Pikinini bilong em Krais Jisas, yumi no ken les long helpim ol narapela brata sista.—1 Ko 10:24; Fl 2:4; Hi 13:16.
OL MAN I KAIN OLSEM SIPSIP
6 Yumi ken mekim wanem bilong tingim ol Baibel-stadi? Planti ol i save pinis ol i mas lusim ol poroman bilong ol em ol i no insait long tok i tru. Olsem wanem? Yumi save helpim ol dispela Baibel-stadi, maski yumi gat planti wok long mekim? Yumi save prenim ol Baibel-stadi em ol i senisim pinis pasin bilong ol? Yumi save strongim ol, maski yumi yet i no stadi wantaim ol?—Lukim Mak 10:28-30.
7 Olsem wanem? Yumi inap insait moa long wok bilong tingim tru ol man i gat laik long harim tok bilong Baibel? Bai yu wok long helpim ol man i sot long ol samting bilong spirit? Yu yet inap mekim wanem na bai yu ken mekim bikpela wok moa long wok autim tok? Sapos yu inap mekim bikpela wok moa, nogut yu no mekim, a?—Lu 9:60-62.
8 Yumi mas bihainim pasin bilong Jehova na Jisas long helpim ol narapela. Yumi mas sori long ol na wok strong long helpim ol, olsem Jisas i mekim taim em i lukim dispela man i gat sik lepra i pulap long skin bilong em. Olsem na long olgeta taim yumi mas painim rot bilong tingim na helpim ol narapela.
[Ol Askim]
1. Kolim sampela samting i makim olsem, Jehova i tingim tru ol narapela.
2. Kolim sampela stori long Baibel i makim olsem Jisas i tingim ol narapela.
3, 4. (a) Kolim sampela samting ol brata i ken mekim bilong tingim famili bilong ol long ol samting bilong spirit? (b) Taim ol i mekim famili-stadi, papa i mas i gat wanem kain tingting long stadi? Mama i mas i gat wanem kain tingting? Ol pikinini i mas i gat wanem kain tingting?
5. (a) Yumi ken helpim wanem kain man long kongrigesen bilong yumi? (b) Yumi gat wanem wok long helpim ol man i sot long ol samting, olsem Baibel i tok?
6, 7. Ol tok i stap long Mak 10:28-30 na Luk 9:60-62 i ken givim wanem tingting long yumi long ol samting yumi mas mekim long ol nupela man?
8. Bilong bihainim pasin bilong Jehova na Jisas, i gat wanem samting yu ken mekim bilong tingim gut ol man na helpim ol?