Hau Yumi Soim Pasin Laikim Long Ol Narapela

Yumi ol tumbuna pikinini bilong fes man, Adam, olsem na yumi olgeta i wanpela famili. Olgeta insait long wanpela famili i mas laikim na rispektim narapela narapela, tasol long nau i hatwok long lukim dispela kain pasin laikim. Dispela i no pasin God bilong yumi i laikim.

TOK OL SKRIPSA HOLI I MEKIM LONG PASIN LAIKIM

“Yu mas laikim ol arapela man olsem yu laikim yu yet.”—WOK PRIS 19:18.

“Yupela i mas laikim yet ol birua bilong yupela.”—MATYU 5:44.

INSAIT BILONG DISPELA TOK LAIKIM OL NARAPELA

Lukim hau God i stori long pasin laikim long Tok bilong em long 1 Korin 13:4-7:

“Man i gat pasin laikim em i no save les kwik, na em i save mekim gutpela pasin.”

Tingim: Yu pilim olsem wanem taim ol narapela i no les kwik na mekim gutpela pasin long yu na ol i no kros kwik taim yu popaia?

Man i gat pasin laikim “i no save jeles.”

Tingim: Yu pilim olsem wanem taim ol narapela i saspek nating o jeles long yu?

Man i gat pasin laikim “i no save tingim em yet.”

Tingim: Yu pilim olsem wanem taim ol narapela i rispektim tingting bilong yu na ol i no strong long bihainim tingting bilong ol yet?

Man i gat pasin laikim “i no save tingim rong ol arapela i mekim long em.”

Tingim: God i redi long fogivim ol man i mekim sin na tanim bel. “Em i no save tingim rong bilong yumi oltaim, na kros bilong em i no save stap longpela taim.” (Buk Song 103:9) Yumi amamas taim man yumi rongim i fogivim yumi. So yumi mas redi long fogivim ol narapela taim ol i rongim yumi.—Buk Song 86:5.

Man i gat pasin laikim “i no save amamas long ol pasin i no stret.”

Tingim: Taim hevi i painim yumi, yumi no laik bai ol narapela i amamas long yumi karim pen na hevi. So yumi no amamas taim ol narapela i karim pen na hevi, maski ol i bin mekim nogut long yumi.

Bilong kisim ol blesing bilong God, yumi mas laikim ol narapela olsem Baibel i kamapim maski ol i wanem kain man. Wanpela gutpela rot em long helpim ol man i nidim samting.