Wok Yet Long Strongim Pasin Bilong Yumi Long Laikim Narapela Narapela

1-2. (a) Bilong wanem aposel Pol i tok pasin laikim em pasin i “nambawan tru”? (b) Yumi bai skelim wanem ol askim?

TAIM aposel Pol i stori long pasin bilong bilip, pasin bilong wetim God i helpim yumi, na pasin laikim, em i pinisim tok olsem pasin i “nambawan tru, [long ol dispela pasin] em pasin laikim.” (1 Kor. 13:13) Wai na Pol i tok olsem? Long bihain, yumi bai i no gat wok moa long bilip long ol tok promis bilong God long nupela taim bikos ol dispela samting yumi bilip na wet long en ol bai kamap tru pinis long dispela taim. Tasol oltaim yumi bai gat wok long laikim Jehova na ol manmeri. Na pasin bilong yumi long laikim ol bai wok long kamap strong moa inap oltaim oltaim.

² Oltaim yumi bai gat wok long soim pasin laikim long narapela narapela, olsem na yumi bai skelim 3-pela askim. Wai na yumi mas laikim narapela narapela? Hau yumi ken soim pasin laikim long narapela narapela? Na hau yumi ken wok yet long strongim pasin bilong yumi long laikim narapela narapela?

WAI NA YUMI MAS LAIKIM NARAPELA NARAPELA?

3. I gat wanem ol risen na yumi mas laikim narapela narapela?

³ Wai na em i bikpela samting long yumi mas laikim narapela narapela? Taim yumi soim pasin laikim long ol bratasista bilong yumi, yumi kamapim klia olsem yumi ol Kristen tru. Jisas i tokim ol aposel bilong em olsem: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Na tu, pasin bilong yumi long laikim narapela narapela i helpim yumi long stap wanbel. Pol i tok pasin laikim “em i nambawan gutpela rot bilong mekim ol man i kamap wanbel.” (Kol. 3:14) Tasol i gat narapela bikpela risen na yumi mas laikim narapela narapela. Aposel Jon i raitim pas long ol wanbilip, na em i tok: “Man i laikim God em i mas laikim brata bilong em tu.” (1 Jon 4:21) Taim yumi soim pasin laikim long narapela narapela, yumi soim olsem yumi laikim God.

4-5. Olsem wanem pasin bilong yumi long laikim ol narapela i soim olsem yumi laikim God? Stori long tok piksa.

⁴ Taim yumi soim pasin laikim long ol bratasista bilong yumi, olsem wanem dispela i soim olsem yumi laikim God? Yumi ken tok piksa olsem, lewa bilong yumi i konek wantaim ol narapela hap bilong bodi bilong yumi. Taim dokta i sekim blut presa long han bilong yumi bilong lukim sapos blut i ron strong o nogat, dispela inap helpim em long save sapos lewa bilong yumi i wok gut o nogat. Yumi ken kisim wanem skul long dispela stiatok?

⁵ Taim dokta i sekim blut presa long han bilong yumi, dispela inap helpim em long save sapos lewa bilong yumi i wok gut o nogat, olsem tasol, yumi inap luksave olsem pasin bilong yumi long laikim God i strong o nogat, taim yumi skelim pasin bilong yumi long laikim ol narapela. Sapos yumi luksave olsem pasin bilong yumi long laikim ol wanbilip em i no strong moa, orait dispela inap soim olsem pasin bilong yumi long laikim God em i no strong moa. Tasol taim yumi wok long mekim pasin laikim long ol wanbilip long olgeta taim, dispela i soim olsem pasin bilong yumi long laikim God em i strong.

6. Sapos pasin bilong yumi long laikim ol bratasista i no strong moa, olsem wanem dispela em i bikpela hevi? (1 Jon 4:​7-9, 11)

⁶ Sapos pasin bilong yumi long laikim ol bratasista i no strong moa, orait dispela em i wanpela bikpela hevi. Bilong wanem? Bikos dispela inap makim olsem pasin pren bilong yumi wantaim Jehova i no strong moa. Aposel Jon i kamapim klia dispela taim em i tokim yumi olsem: “Man i no laikim brata bilong em we em i bin lukim, em i no inap laikim God em man em i no bin lukim.” (1 Jon 4:20) Yumi kisim wanem skul? Jehova bai amamas long yumi sapos yumi “laikim narapela narapela.”—Ritim 1 Jon 4:​7-9, 11.

HAU BAI YUMI SOIM PASIN LAIKIM LONG NARAPELA NARAPELA?

7-8. Wanem sampela rot yumi ken soim pasin laikim long narapela narapela?

⁷ Long Tok Bilong God, planti taim yumi save lukim dispela tok olsem “laikim narapela narapela.” (Jon 15:​12, 17; Rom 13:8; 1 Tes. 4:9; 1 Pita 1:22; 1 Jon 4:11) Tasol pasin laikim em samting yumi save pilim insait long bel, na em samting we ol narapela i no inap lukim. Olsem na hau yumi ken kamapim klia pasin bilong yumi long laikim narapela narapela? Yumi ken mekim olsem long rot bilong ol tok na pasin bilong yumi.

⁸ I gat planti rot yumi ken soim ol bratasista bilong yumi olsem yumi laikim ol. Hia em sampela eksampel: “Mekim tok tru tasol long narapela narapela.” (Sek. 8:16) “Holimpas pasin bilong stap bel isi wantaim ol arapela.” (Mak 9:50) “Go pas long givim ona long ol arapela wanbilip.” (Rom 12:10) “Welkamim ol arapela brata.” (Rom 15:7) “Wok yet long . . . fogivim narapela.” (Kol. 3:13) “Wok yet long helpim narapela narapela long karim hevi.” (Gal. 6:2) “Wok yet long mekim isi bel bilong narapela narapela.” (1 Tes. 4:18) “Wok yet long . . . strongim narapela narapela.” (1 Tes. 5:11) “Beten bilong helpim narapela narapela.”—Jems 5:16.

9. Taim yumi mekim isi bel bilong ol narapela, olsem wanem dispela em i gutpela rot bilong soim pasin laikim long ol? (Lukim tu piksa.)

⁹ Yumi ken stori long wanpela rot yumi ken kamapim klia pasin bilong yumi long laikim ol narapela. Yumi bai skelim tok bilong Pol olsem: “Yupela i mas wok yet long mekim isi bel bilong narapela narapela.” Wai na pasin bilong mekim isi bel bilong ol narapela em i gutpela rot bilong soim olsem yumi laikim ol? Wanpela Baibel referens i tok, dispela tok “mekim isi bel” em Pol i yusim long hia i makim olsem “yumi sanap wantaim wanpela man bilong strongim bel bilong em taim em i karim wanpela bikpela hevi tru.” So taim yumi mekim isi bel bilong wanpela wanbilip husat i karim hevi, yumi helpim em long stap gut yet long Jehova na wokabaut yet long rot i go long laip. Long olgeta wan wan taim yumi mekim isi bel bilong wanpela brata o sista, yumi soim em olsem yumi laikim em.—2 Kor. 7:​6, 7, 13.

10. Olsem wanem pasin sori na pasin bilong mekim isi bel bilong ol narapela i wok gut wantaim?

¹⁰ Pasin sori na pasin bilong mekim isi bel bilong ol narapela i wok gut wantaim. Bilong wanem yumi tok olsem? Pasin sori i save kirapim man long mekim isi bel bilong ol narapela na traim long mekim sampela samting bilong helpim ol. So pastaim yumi save pilim sori long narapela, na bihain yumi mekim isi bel bilong em. Lukim olsem wanem Pol i tok pasin bilong Jehova long sori long ol manmeri i kirapim Em long mekim isi bel bilong ol. Pol i kolim Jehova olsem “Papa bilong marimari na God bilong mekim isi bel bilong ol man long olgeta kain taim.” (2 Kor. 1:3) Long hia, Pol i yusim dispela tok “marimari” bilong makim pasin bilong sori long ol narapela. So Baibel i tok God em i Papa, o em i As bilong pasin marimari bikos em i save sori tru long ol manmeri. Na dispela pasin sori i kirapim em long mekim isi bel bilong yumi “long olgeta hevi i kamap long yumi.” (2 Kor. 1:4) Taim man i nek drai na em i dring klinpela wara i kam aut long wanpela hulwara, em i save kisim nupela strong. Olsem tasol, Jehova i save givim nupela strong na mekim isi bel bilong ol man i bel hevi tru. Hau yumi ken bihainim pasin bilong Jehova long sori long ol narapela na mekim isi bel bilong ol? Wanpela rot yumi ken mekim olsem em long kisim ol pasin we bai kirapim yumi long sori long ol narapela na mekim isi bel bilong ol. Wanem sampela bilong ol dispela pasin?

11. Olsem Kolosi 3:12 na 1 Pita 3:8 i kamapim, wanem ol narapela pasin bai helpim yumi long laikim ol narapela na mekim isi bel bilong ol?

¹¹ Wanem samting bai helpim yumi long mekim yet pasin laikim na bai yumi ken “wok yet long mekim isi bel bilong narapela narapela” long olgeta wan wan de? Yumi mas kisim ol dispela pasin olsem pilim hevi bilong narapela, laikim tumas ol brata, na mekim pasin helpim. (Ritim Kolosi 3:12; 1 Pita 3:8.) Olsem wanem ol dispela pasin bai helpim yumi? Taim pasin sori na ol dispela pasin i kamap pasin tru bilong yumi, dispela bai kirapim yumi long redi long mekim isi bel bilong ol narapela taim ol i karim hevi. Olsem Jisas i tok: “Maus i save autim ol tingting i pulap long bel. Gutpela man i bin bungim ol gutpela samting na em i save bringim ol dispela gutpela samting i kam ausait.” (Mat. 12:​34, 35) Taim yumi mekim isi bel bilong ol bratasista i nidim helpim, dispela em i gutpela rot tru bilong soim olsem yumi laikim ol.

HAU YUMI KEN STRONGIM YET PASIN BILONG LAIKIM NARAPELA NARAPELA?

12. (a) Wai na yumi mas was gut na yumi no ken lusim pasin bilong laikim narapela narapela? (b) Yumi bai skelim wanem askim?

¹² Yumi olgeta i laik “wok yet long laikim narapela narapela.” (1 Jon 4:7) Tasol em i bikpela samting long yumi tingim tok lukaut bilong Jisas olsem “pasin laikim bilong planti manmeri bai i no strong olsem long bipo.” (Mat. 24:12) I no olsem Jisas i tok planti disaipel bilong em bai stop long soim pasin laikim long narapela narapela, nogat. Tasol yumi mas was gut na yumi no ken larim pasin bilong dispela graun i pulim yumi na yumi lusim pasin bilong laikim narapela narapela. Yumi ken tingim dispela samting, na nau yumi laik skelim dispela bikpela askim olsem: Wanem samting bai helpim yumi long save sapos pasin bilong yumi long laikim ol bratasista em i strong o nogat?

13. Wanem samting bai helpim yumi long save olsem pasin bilong yumi long laikim ol bratasista i strong o nogat?

¹³ Wanpela rot bilong skelim olsem pasin laikim bilong yumi i strong o nogat, em long skelim pasin yumi mekim long ol samting i kamap long laip bilong yumi. (2 Kor. 8:8) Wanpela bilong ol dispela samting em aposel Pita i stori long en olsem: “Na moa yet, yupela i mas laikim tru ol arapela, long wanem, pasin laikim i karamapim planti sin.” (1 Pita 4:8) So pasin yumi mekim taim ol bratasista bilong yumi i mekim ol popaia o bagarapim bel bilong yumi, dispela bai helpim yumi long save olsem pasin bilong yumi long laikim ol i strong o nogat.

14. Olsem 1 Pita 4:8 i kamapim, yumi mas i gat wanem kain pasin laikim? Stori long tok piksa.

¹⁴ Yumi ken tingim gut tok bilong Pita. Namba wan hap bilong ves 8 i stori long dispela kain pasin laikim we yumi mas i gat, em pasin bilong “laikim tru ol arapela.” Pita i mekim dispela tok olsem “laikim tru,” dispela i makim olsem “mekim i go bikpela.” Namba tu hap bilong dispela ves i stori long samting yumi bai mekim taim yumi laikim tru ol arapela. Pasin bilong laikim tru ol arapela i helpim yumi long karamapim sin bilong ol bratasista bilong yumi. Yumi ken tok piksa olsem: Yumi holim pasin laikim bilong yumi long tupela han, i olsem pasin laikim em i wanpela bikpela hap laplap, na yumi pulim na mekim i go bikpela inap yumi karamapim i no wanpela sin na i no tupela sin, tasol “planti sin.” Dispela tok “karamapim” i makim olsem yumi fogivim ol sin bilong ol narapela. Wankain olsem wanpela hap laplap inap karamapim ol mak mak long wanpela tebol, pasin laikim inap karamapim ol pasin kranki na ol popaia bilong ol narapela.

15. Sapos pasin bilong yumi long laikim ol bratasista i strong moa, dispela bai kirapim yumi long mekim wanem? (Kolosi 3:13)

¹⁵ Pasin bilong yumi long laikim ol narapela i mas strong moa na bai dispela i kirapim yumi long fogivim ol pasin kranki bilong ol wanbilip bilong yumi—maski sampela taim i hatwok tru long mekim olsem. (Ritim Kolosi 3:13.) Taim yumi fogivim ol narapela, yumi soim olsem pasin laikim bilong yumi i strong na yumi laik amamasim Jehova. Wanem narapela samting moa bai helpim yumi long no ken bel hevi hariap long ol pasin kranki na ol popaia bilong ol narapela?

16-17. Wanem samting moa bai helpim yumi long no ken tingim ol liklik popaia bilong ol narapela? Stori long tok piksa. (Lukim tu piksa.)

¹⁶ Tingim ol gutpela pasin bilong ol bratasista bilong yu, na i no ol pasin kranki bilong ol. Skelim dispela tok piksa. Tingim olsem yu stap long wanpela bung wantaim ol bratasista. Yupela i amamas wantaim na long pinis bilong dispela bung, yu kisim grup piksa. Yu kisim fes piksa, tasol yu kisim tupela moa piksa, nogut fes piksa yu kisim i no kamap gut. Nau yu gat 3-pela piksa. Tasol long wanpela piksa, yu luksave olsem wanpela brata i no smail. Bai yu mekim wanem long dispela piksa? Yu bai dilitim dispela piksa bikos yu gat narapela tupela piksa we olgeta long dispela grup na dispela brata tu i smail.

¹⁷ Yumi ken tok olsem ol piksa yumi seivim ol i olsem ol gutpela memori em yumi save holim long tingting. Planti taim yumi save gat ol gutpela memori bilong ol haptaim em yumi spendim wantaim ol bratasista. Tasol ating wanpela bilong ol dispela taim, wanpela brata o sista i mekim wanpela tok o pasin i no stret. Yumi mas mekim wanem long dispela memori? Ating i gutpela yu dilitim dispela memori, wankain olsem yu bai dilitim wanpela bilong ol dispela piksa. (Prov. 19:11; Efe. 4:32) Yumi ken dilitim o lusim tingting long dispela liklik popaia bilong wanbilip bilong yumi bikos yumi tingim planti gutpela taim we yumi save spendim wantaim em. Ol dispela kain memori ol i dia tumas na yumi laik holim long tingting.

EM I BIKPELA SAMTING LONG LAIKIM NARAPELA NARAPELA LONG NAU

18. Wanem sampela bikpela samting long pasin laikim em yumi stori long en long dispela atikol?

¹⁸ Wai na yumi laik strongim pasin bilong yumi long laikim narapela narapela? Olsem yumi stori pinis, taim yumi soim pasin laikim long ol bratasista, yumi soim olsem yumi laikim Jehova. Hau yumi ken soim pasin laikim long ol wanbilip? Wanpela rot yumi ken mekim olsem em long mekim isi bel bilong ol. Yumi bai “wok yet long mekim isi bel bilong narapela narapela” sapos yumi sori tru long ol. Olsem wanem yumi ken strongim yet pasin bilong yumi long laikim narapela narapela? Yumi ken mekim olsem long rot bilong wok strong long fogivim ol popaia bilong ol narapela.

19. Wai na em i bikpela samting long yumi soim pasin laikim long ol bratasista bilong yumi moa yet long nau?

¹⁹ Wai na em i bikpela samting long soim olsem yumi laikim narapela narapela moa yet long nau? Pita i kolim wanpela risen, em i tok: “Pinis bilong olgeta samting i kam klostu. Olsem na . . . yupela i mas laikim tru ol arapela.” (1 Pita 4:​7, 8) Pinis bilong haptaim nogut bilong nau i wok long i kam klostu, olsem na ol man bai mekim wanem long yumi? Jisas i tok profet long ol samting bai painim ol disaipel bilong em, na em i tok: “Ol man bilong olgeta lain bai heitim yupela, long wanem, nem bilong mi i stap long yupela.” (Mat. 24:9) Bilong stap gut yet long Jehova maski ol man i heitim yumi, yumi mas strongim pasin wanbel. Taim yumi mekim olsem, ol samting Satan i mekim bilong bagarapim pasin wanbel bilong yumi bai i lus nating, long wanem, yumi pas gut wantaim long pasin laikim—“em i nambawan gutpela rot bilong mekim ol man i kamap wanbel.”—Kol. 3:14; Fili. 2:​1, 2.