Ol Singsing Bilong Kingdom i Save Helpim Yumi Long Sanap Strong

Pol na Sailas i singim ol song bilong litimapim nem bilong God taim ol i stap long kalabus. (Ap 16:25) Long nau, ol wanbilip bilong yumi i save singim ol song bilong Kingdom taim ol i stap long banis kalabus bilong Sachsenhausen long Natsi Jemani na long Saibiria. Ol dispela eksampel i soim klia olsem ol singsing inap strongim bel bilong ol Kristen husat i karim ol hevi.

Klostu nau, ol narapela tokples bai i gat nupela song buk long tokples bilong ol yet, het tok bilong en “Singsing Amamas” Long Jehova. Taim yumi kisim kopi bilong dispela song buk, yumi ken traim long tingim tingim ol tok bilong ol dispela singsing na mekim prektis long taim bilong famili lotu. (Ef 5:19) Taim ol hevi i kamap, holi spirit bai helpim yumi long tingim gen ol tok bilong ol dispela singsing. Ol singsing bilong Kingdom inap helpim yumi long putim tingting long ol gutpela samting em yumi bilip na wet long en. Ol dispela singsing inap strongim bilip bilong yumi taim hevi i painim yumi. Taim yumi amamas, ol gutpela tok bilong ol dispela singsing bai kirapim yumi long “singim song,” na dispela i kamapim klia olsem bel bilong yumi i stap isi tru. (1St 15:16; Sg 33:1-3) Olsem na yumi mas mekim gutpela wok long ol singsing bilong Kingdom!

LUKIM VIDIO A SONG THAT INSPIRED LABORERS. BIHAIN, BEKIM OL DISPELA ASKIM:

• Wanem ol samting i kirapim Brata Frost long raitim wanpela singsing?

• Olsem wanem dispela singsing i bin strongim ol brata i stap kalabus long Sachsenhausen?

• Wanem ol hevi i save kamap long wan wan de em ol singsing bilong Kingdom inap strongim yu?

• Yu laik save gut long wanem ol singsing bilong Kingdom?