Hau Long Stadi
Lainim “Ol Singsing Lotu” na Tingim Gut Long Bel
“Long ol taim mi pilim olsem mi samting nating, Jehova i save strongim mi long rot bilong ol singsing long JW Broadcasting®.”—Lorraine, Amerika.
Oltaim yumi ol Kristen i save singim “ol singsing lotu” bilong preisim God. (Kol. 3:16) Sapos yu lainim na tingim gut long bel ol dispela singsing, ol inap helpim yu taim yu no gat rot long kisim wanpela singsing buk o yu no gat smatfon o teblet samting. Traim bihainim ol dispela rot bilong helpim yu long tingim gut ol singsing.
Ritim gut ol tok bilong singsing bilong kliagut long mining. Yu inap tingim gut ol tok taim yu kliagut long mining bilong ol. Ol tok bilong olgeta singsing bilong yumi, dispela i makim tu ol orijinel song na ol singsing bilong ol liklik pikinini, olgeta i stap long jw.org. Aninit long Laibreri seksen, go long Musik.
Raitim ol tok bilong singsing long wanpela pepa. Taim yu mekim olsem, dispela bai helpim yu long holim long tingting ol tok bilong singsing.—Lo 17:18.
Prektis long singsing long strongpela nek. Ritim o mekim dispela singsing planti taim.
Luksave sapos yu inap tingim gut ol tok bilong singsing. Traim long kolim ol tok bilong singsing na no ken lukluk long pepa i gat ol tok bilong en, na bihain traim sekim pepa sapos yu kolim gut ol tok.