‘Pol i Tenkyu Long God na Em i Kisim Strong’

Taim kongrigesen long Rom i harim olsem Pol i kam, sampela brata i wokabaut inap 64 kilomita i go bilong bungim em. Dispela pasin laikim bilong ol i mekim wanem long Pol? “Taim Pol i lukim ol em i tenkyu long God na em i kisim strong.” (Ap 28:15) Pol em man bilong strongim ol kongrigesen em i visitim, tasol long dispela taim em i kalabusman, na ol brata i strongim em.—2Ko 13:10.

Long nau ol wasman sekit i save raun lukim ol kongrigesen bilong strongim ol bratasista. Wankain olsem ol narapela manmeri bilong God, sampela taim ol i save pilim taiet, tingting planti, na bel hevi. Sapos wasman sekit na meri bilong em i kam visitim kongrigesen bilong yu, yu ken mekim wanem bilong helpim ol long i gat strongpela bel na bai ‘yu strongim ol na ol i strongim yu’?—Ro 1:11, 12.

• 

  Go long bung bilong autim tok. Wasman sekit i kisim strong taim ol pablisa i redi long sapotim wik em i kam visitim kongrigesen. (1Te 1:2, 3; 2:20) Tingting long mekim wok painia haptaim long mun em i kam visitim kongrigesen. Olsem wanem? Yu inap stretim rot bilong autim tok wantaim em na meri bilong em o kisim wanpela bilong ol i go long Baibel stadi? Tupela i amamas long wok wantaim olgeta pablisa, em ol nupela pablisa na ol pablisa i no save gut long autim tok.

• 

  Mekim gutpela pasin long ol. Olsem wanem? Yu inap givim ples slip o kaikai long ol? Dispela i soim wasman sekit na meri bilong em olsem yu laikim tupela. I no gat wok long yu redim bikpela samting.—Lu 10:38-42.

• 

  Putim yau na bihainim tok em i givim. Wasman sekit i helpim yumi long luksave long olsem wanem wok bilong Jehova yumi mekim i kamap gutpela moa. Sampela taim em inap givim strongpela tok bilong helpim yumi. (1Ko 5:1-5) Taim yumi bihainim tok na daun long em, em bai amamas.—Hi 13:17.

• 

  Tok amamas long ol. Tokim wasman sekit na meri bilong em long olsem wanem wok ol i mekim i helpim yu. Yu ken tokim tupela o raitim wanpela kat na tok tenkyu long tupela.—Kl 3:15.