Strongim Bel Bilong Narapela Narapela
1 Aposel Pol i raitim pas i go long kongrigesen long Rom na i tok: “Mi laikim tumas long lukim yupela, long wanem, mi laik givim sampela presen bilong Holi Spirit long yupela bilong strongim yupela. Tingting bilong mi i olsem. Mi laik bai bilip bilong yupela i ken helpim mi na bilip bilong mi i ken helpim yupela tu, na dispela i ken strongim bel bilong yumi olgeta wantaim.” (Ro. 1:11, 12) Wankain olsem long taim bilong Pol, long nau tu taim ol wasman raun i kam lukim kongrigesen, dispela i opim rot long narapela i ken strongim bel bilong narapela.
2 Kongrigesen: Kongrigesen i save mekim toksave long visit bilong wasman sekit tripela mun samting paslain long wasman sekit i kam. Dispela i mekim na yumi gat taim bilong stretim sediul bilong yumi na bai visit bilong wasman sekit i ken helpim gut yumi. (Ef. 5:15, 16) Sapos yu wok mani, ating yu inap kisim de malolo na bai yu ken insait long wok autim tok long wik bilong sekit. Sampela i save stretim rot bilong mekim painia haptaim long mun bilong sekit visit. Sapos yu tingting pinis long go long narapela hap long taim bilong sekit visit, orait inap yu senisim plen bilong yu na bai yu ken i stap bek long wik bilong sekit?
3 Nambawan as na wasman sekit i save kam lukim kongrigesen, em bilong strongim olgeta wan wan na helpim ol long mekim gut wok autim tok. Olsem wanem? Yu inap askim wasman sekit na meri bilong em long wok wantaim ol? Wasman sekit i save amamas long wok wantaim narapela narapela pablisa, sampela em ol pablisa i no gat bikpela ekspiriens tumas long mekim wok autim tok o ol pablisa em ol i gat laik long mekim wok autim tok bilong ol i kamap gutpela moa. Olgeta inap lain long pasin bilong em long autim tok na bihainim tok em i givim long ol long pasin bilong autim tok. (1 Ko. 4:16, 17) Taim yu singautim em i kam kaikai wantaim yu, dispela bai opim rot bilong narapela i ken strongim narapela. Em i save mekim sampela senis long autlain bilong tok bilong em na bai tok i stret bilong helpim kongrigesen, olsem na yu mas putim gut yau long tok bilong em.
4 Wasman Sekit: Olsem ol brata em i helpim, aposel Pol tu i bin karim ol hevi na em i amamas long ol tok ol narapela i givim bilong strongim em. (2 Ko. 11:26-28) Taim kongrigesen long Rom i harim olsem Pol—em i stap olsem kalabusman—em i kam, sampela i go long Maket Bilong Apius bilong bungim em, em longwe inap 74 kilomita! “Pol i lukim ol, na em i tenkyu long God, na bel bilong en i kisim strong.” (Ap. 28:15) Yu tu inap strongim wasman sekit. “Givim biknem na gutpela pe” long em long rot bilong mekim ol samting bilong soim olsem yu tingim tru visit bilong em. (1 Ti. 5:17) Long rot bilong toktok na pasin bilong yu, kamapim klia olsem yu tenkyu tru long ol samting em i mekim bilong helpim yu. Wasman sekit na meri bilong em bai amamas taim ol i luksave olsem yu gat pasin bilong bilip, pasin laikim, na pasin bilong sanap strong.—2 Te. 1:3, 4.
5 Nau yumi stap long taim bilong “planti hevi nogut tru,” olsem na yumi olgeta i mas kisim ol tok bilong strongim yumi. (2 Ti. 3:1) Kirap nau na stretim ol samting bilong yu ken insait long dispela spesel wik bilong wasman sekit. Yumi olgeta—ol wasman raun na ol pablisa long kongrigesen—i ken wok wantaim bilong strongim bel bilong narapela narapela. Long dispela rot bai yumi wok yet long “givim gutpela tok long ol arapela manmeri bilong God na strongim bel bilong ol.”—1 Te. 5:11.
[Askim Bilong Stadi]
1. Visit bilong wasman raun i save opim rot long wanem ol gutpela samting ken kamap?
2. Bilong wanem kongrigesen i save toksave long visit bilong wasman sekit sampela mun paslain long em i kam?
3. Yumi wan wan inap mekim wanem na bai visit bilong wasman sekit i strongim yumi?
4. Olsem wanem yumi inap strongim wasman sekit?
5. Bilong wanem yumi olgeta wan wan i mas kisim ol tok bilong strongim yumi?