Rot Bilong Yusim Eksampel Bilong Toktok

Kirap long Janueri 2018, ol i putim eksampel bilong toktok long fran pes bilong Kristen Laip na Wok Autim Tok—Miting Wok Buk. Yumi ken mekim wok long en olsem wanem?

Taim Yu Gat Tok Long Skul: Yu mas yusim askim, skripsa, na neks askim i stap long eksampel bilong toktok. Tasol dispela i no makim olsem yu mas mekim wankain tok i kamap long vidio i soim eksampel bilong toktok. Yu ken bihainim pasin bilong autim tok long kain kain hap, yusim narapela kirap bilong tok, na senisim tok. Yu inap tilim wanpela buk o nius i stap long Ol Tul Bilong Skulim Man, maski em i no stap long eksampel bilong toktok.

Taim Yu Autim Tok: Ol i redim eksampel bilong toktok bilong givim tingting long yumi long sampela rot yumi ken bihainim long autim tok. Sapos man i gat laik long kisim sampela save moa, yu ken yusim hap bilong gobek na toktok wantaim em. Yu ken senisim tu eksampel bilong toktok o yu yusim narapela tok bilong autim tok. Olsem wanem? Wanpela eksampel bilong toktok bilong mun i go pinis o narapela skripsa bai i stret long ol manmeri long teritori bilong yupela? Ol manmeri long hap bilong yu ol i tingting planti long wanpela samting i kamap long teritori bilong yupela o wanpela nius i kamap long TV o niuspepa? Yu ken yusim eksampel bilong toktok long kain kain rot, tasol bikpela samting em yu mas ‘mekim olgeta samting bilong helpim gutnius na bai yu inap autim tok bilong gutnius long ol arapela man.’—1Ko 9:22, 23.