Rot Bilong Yusim Ol Liklik Nius Bilong Kirapim Tok

Kirap long Janueri 2018, fran pes bilong Kristen Laip na Wok Autim Tok Miting Wok Buk i kamapim eksampel bilong toktok. Dispela hap i kirapim yumi long toktok wantaim ol man na i no tilim tasol ol buk na nius long ol. Bilong helpim ol pablisa long senisim tok bilong ol, ol vidio bilong autim tok i soim olsem wanem pablisa i ken yusim Baibel bilong kirapim tok. Olsem wanem? Dispela i makim olsem yumi no ken yusim ol buk na nius taim yumi autim tok long ol haus? Nogat! Olsem, ol liklik nius i gutpela bilong yusim bilong kirapim tok. Yumi ken bihainim dispela rot taim yumi laik tilim wanpela bilong ol liklik nius:

1. Kamapim ol askim i stap long fran pes bilong liklik nius.

2. Soim man bekim Baibel i kamapim long dispela askim i stap long namba 2 pes bilong liklik nius. Sapos i gat inap taim, ritim na stori long ol tok i stap insait long nius.

3. Givim liklik nius long man bilong haus, na tokim em long ritim long taim bilong em yet.

4. Paslain long lusim em, soim em askim i stap long dispela hap bilong buklet “Samting Bilong Tingim” na stretim rot bilong i go bek narapela taim na kamapim bekim bilong en long Baibel.

Taim yu go bek, stori long bekim bilong dispela askim na lusim narapela askim gen wantaim em, na bai yu ken go bek narapela taim na bekim dispela askim. Yu ken givim wanpela askim i stap long websait bilong yumi o wanpela askim i stap long laspela pes bilong liklik nius i kam long wanpela buk o buklet. Long taim i stret, yu ken soim em buklet Gutpela Nius i Kam Long God! o narapela buk o nius i stap long hap Ol Tul Bilong Skulim Man.