Wei Ol i Wokim Ol Nupela Liklik Nius!
1. Wanem ol nupela samting bilong mekim wok autim tok em ol i wokim long nupela stail?
1 Yumi bin kisim 5-pela nupela liklik nius long 2013 ‘Tok Bilong God Em i Tok i Tru!’ Kibung Distrik. Na Kingdom Nius Namba 38, nem bilong en “Tru Tru Ol Man i Dai Pinis Inap Stap Laip Gen?,” yumi bungim wantaim ol dispela liklik nius. Wei ol i wokim dispela 6-pela liklik nius em gutpela tru. Wanem as na ol i wokim long nupela stail? Taim yumi tilim long ol haus, olsem wanem yumi inap mekim gutpela wok long ol askim, skripsa na piksa?
2. Wanem as na ol i bihainim nupela pasin bilong wokim ol nupela liklik nius?
2 Nupela Wei Ol i Wokim: Bilong mekim gut wok autim tok long ol haus, yumi save bihainim dispela 4-pela rot: (1) Kamapim wanpela askim bilong kirapim tok. (2) Ritim wanpela skripsa na stori long en. (3) Tilim buk samting na man bilong haus i ken ritim. (4) Kamapim wanpela askim na taim yu go bek yu ken bekim, na stretim rot bilong go bek lukim em. Nupela wei ol i wokim ol dispela liklik nius i helpim yumi long bihainim dispela 4-pela rot.
3. Olsem wanem bai yumi tilim wanpela bilong ol nupela liklik nius taim yumi autim tok?
3 Rot Bilong Yusim: (1) Taim yumi tok moning o gude pinis long man bilong haus, soim em askim i gat narapela narapela hap bilong en i stap long fran bilong liklik nius, na askim em long kamapim tingting bilong em. (2) Opim liklik nius na stori long hap “Baibel i Tok.” Ritim skripsa stret long Baibel sapos i stret long mekim olsem. Sapos man bilong haus i gat taim, stori long hap “Samting Dispela Inap Mekim Long Yu.” (3) Tilim liklik nius na kirapim em long ritim nius olgeta long taim bilong em yet. (4) Paslain long yu lusim em, soim em askim long baksait, long hap “Samting Bilong Tingim” na stretim rot long go bek na stori long ol tok bilong Baibel i bekim dispela askim.
4. Hau bai yu yusim ol liklik nius taim yu mekim gobek?
4 Em i isi long mekim gobek. Yusim ol skripsa i stap long baksait bilong bekim askim em yu bin kamapim taim yu bin bungim em pastaim. Paslain long yu lusim em, soim em long piksa bilong buklet Gutpela Nius i stap long liklik nius, soim em buklet na lesen i stret long samting yupela i stori long en na tilim buklet. Sapos em i kisim buklet, orait stretim rot long stori wantaim em long buklet taim yu mekim gobek. Em nau, yu kirapim wanpela Baibel stadi! O sapos yu no tilim buklet, orait tilim narapela liklik nius na stretim rot long stori long en taim yu go bek lukim em.
5. Wanem gutpela wok ol liklik nius i mekim long wok autim tok bilong yumi?
5 Winim 130 yia pinis, yumi bin mekim wok long ol liklik nius taim yumi autim tok. Maski ol i bikpela o liklik na ol i wokim long narapela narapela stail, ol i gutpela tul tru bilong autim tok. Olsem na yumi laik yusim gut ol dispela liklik nius bilong autim yet tok bilong Baibel long olgeta hap bilong graun.—Snd. 15:7a.