Hau Yu Inap Yusim Ol Vidio Bilong Baibel Stadi

Yumi gat 4-pela vidio bilong Baibel stadi we yumi inap yusim long autim tok. Wanem wok bilong wan wan bilong ol dispela vidio?

• 

  Wai na i Gutpela Long Stadi Long Baibel? (longpela vidio) i bilong kirapim laik bilong man long stadi long Baibel maski em i bilong wanem lotu. Em i kirapim ol man long painim bekim bilong ol bikpela askim bilong laip na i givim eksampel bilong bekim we man bai wanbel long en. Em i stori long hau bai man i askim long wanpela i ken stadi wantaim em long Baibel.

• 

  Wai na i Gutpela Long Stadi Long Baibel? (sotpela vidio) i wankain olsem narapela vidio we i longpela, tasol em i longpela inap 1 minit 17 seken. Em bai gutpela moa long yusim long teritori we ol manmeri i no gat taim long toktok wantaim ol narapela.

• 

  Mipela i Save Mekim Wanem Long Taim Bilong Baibel Stadi? i bilong kirapim laik bilong man long fri Baibel stadi program na bekim sampela askim we planti man i gat long dispela program, na tu, hau em inap askim long wanpela i ken stadi wantaim em.

• 

  Welkam Long Baibel Stadi Bilong Yu i bilong soim long ol Baibel stadi. Dispela vidio i stap long pes 2 bilong buk Stap Amamas Oltaim!, tasol yu ken soim dispela vidio tu long man taim yu stori wantaim em long buklet Stap Amamas Oltaim! Dispela vidio i kamapim ol samting em buk i stori long en na samting sumatin bai kisim save long en long taim bilong stadi.

Em tru olsem ol i wokim wan wan vidio bilong mekim wanpela wok stret, tasol yu ken soim o givim wanpela bilong ol dispela vidio long man sapos i stret long mekim olsem. Mipela i laik kirapim ol pablisa long save gut long ol dispela vidio na yusim long taim bilong autim tok.