Yu Save Long Dispela?

Olsem wanem evidens bilong ol saveman i soim klia olsem Belsasar bilong Babilon i bin stap tru na em i mekim wok king?

INAP planti yia, ol man bilong sutim tok long Baibel i tok King Belsasar, em Buk Daniel i stori long en, em i no bin stap tru. (Dan. 5:1) Ol i tok olsem bikos ol saveman i no painim wanpela evidens i soim klia olsem em i bin stap tru. Tasol long 1854, tingting bilong ol i senis. Wai?

Wanpela bikman bilong Briten, nem bilong em J. G. Taylor, em i skelim sampela olpela samting long taun Ur bilong bipo, nau em sauten Irak. Long wanpela traipela taua, em i painim sampela klei silinda. Longpela bilong ol dispela silinda em inap 10 sentimita, na i gat ol rait em ol i bin yusim ol ston long raitim. Long wanpela bilong ol dispela silinda, i gat rait i soim beten em ol narapela i mekim long King Nabonaidas bilong Babilon na fes pikinini man bilong em Belsasar, i ken stap laip inap longpela taim. Ol man bilong sutim tok long Baibel i wanbel na tok: Dispela wok painimaut i kamapim klia olsem Belsasar i bin stap tru.

Baibel i tok Belsasar i bin i stap, na tu, Baibel i tok em i bin mekim wok king. Ol man bilong sutim tok i holim 2-pela tingting gen long dispela tok. Long yia 1875 samting, William Talbot, em wanpela saientis bilong Inglan, em i kamapim tok bilong sampela man olsem “Bel-sar-usur [Belsasar] i mekim wok king long seim taim wantaim papa bilong em Nabonaidas. Tasol i no gat wanpela evidens bilong dispela.”

Evidens i kamap taim ol i lukim ol rait long ol narapela klei silinda we i kamapim klia olsem papa bilong Belsasar, King Nabonaidas, i no bin i stap long Babilon inap sampela yia. Wanem samting i kamap taim em i no stap? Buk Encyclopaedia Britannica i tok, “Taim Nabonaidas i go kalabus, em i putim wok king na bikpela lain ami bilong em long han bilong Belsasar.” Olsem na Belsasar i mekim wok king long Babilon long dispela taim. Saveman Alan Millard i tok, i stret long “Buk Daniel i kolim Belsasar olsem ‘king.’”

Ol wokman bilong God i save olsem Baibel tasol i kamapim nambawan risen na ol inap bilip tru long ol tok bilong Buk Daniel na God yet i bin kamapim ol tok bilong dispela buk.—2 Tim. 3:16.