Laikim na Tenkim Jehova—Dispela Bai Kirapim Yu Long Kisim Baptais

1-2. Olsem Aposel 8:27-31, 35-38 i kamapim, wanem samting i kirapim ofisa bilong Itiopia long kisim baptais?

OLSEM WANEM? Yu laik kisim baptais na kamap wanpela disaipel bilong Krais? Pasin laikim na pasin bilong tok tenkyu i kirapim planti manmeri long mekim olsem. Tingim eksampel bilong wanpela ofisa husat i bin stap wokman bilong kwin bilong Itiopia long bipo.

² Taim dispela ofisa i kisim save long tok bilong Ol Skripsa, kwiktaim em i kisim baptais. (Ritim Aposel 8:27-31, 35-38.) Wanem samting i kirapim em long kisim baptais? Em i pilim tru Tok Bilong God; em i sindaun long karis na ritim sampela tok bilong Buk Aisaia. Taim Filip i toktok wantaim em, man Itiopia i pilim tru samting Jisas i mekim bilong helpim em. Tasol wai na em i go long Jerusalem? Bikos em i kisim pinis pasin bilong laikim Jehova. Hau na yumi save? Em i go lotuim Jehova pinis long Jerusalem na em i kam bek. Em i lusim lotu em i kamap bikpela long en, na em i joinim wanpela lain tasol husat i dediket long God tru. Em i laikim tru Jehova na dispela i kirapim em long mekim wanpela bikpela samting; em i kisim baptais na kamap disaipel bilong Krais.—Mat. 28:19.

3. Wanem ol samting inap pasim man long kisim baptais? (Lukim blok “Wanem Kain Laik i Stap Long Bel Bilong Yu?”)

³ Sapos yu laikim Jehova, dispela inap kirapim yu long kisim baptais. Tasol pasin laikim inap stopim yu long kisim baptais. Long wanem rot? Tingim sampela eksampel. Ating yu laikim tru ol pren na ol wanfamili husat i no wanbilip, na yu tingting planti olsem sapos yu kisim baptais, ol bai heitim yu. (Mat. 10:37) O ating yu laikim ol pasin em God i heitim, na yu pilim hatwok long lusim ol dispela pasin. (Sng. 97:10) Taim yu wok long kamap bikpela, ating yu save selebretim ol bikpela de we i sapotim ol bilip giaman bilong ol lotu. Ating yu laikim amamas yu save kisim long selebretim ol dispela de. Olsem na yu inap pilim hatwok long lusim ol selebresen em Jehova i no orait long en. (1 Kor. 10:20, 21) Olsem na askim yu yet, “Mi laikim wanem samting o husat moa yet?”

MAN YUMI MAS LAIKIM MOA YET

4. Wanem samting em nambawan samting we inap kirapim yu long kisim baptais?

⁴ I gat planti samting em yu inap laikim na tok tenkyu long en. Paslain long yu stadi wantaim ol Witnes Bilong Jehova, ating yu kisim pinis pasin bilong laikim tru tok bilong Baibel. Na ating yu kisim tu pasin bilong laikim Jisas. Yu save nau long ol Witnes Bilong Jehova, na ating yu laik bung wantaim ol. Tasol yu mas mekim sampela samting moa na dispela bai kirapim yu long dediketim yu yet long Jehova na kisim baptais. Sapos yu laikim tru God Jehova, dispela em nambawan samting we inap kirapim yu long kisim baptais. Taim yu laikim Jehova na dispela pasin laikim i winim pasin bilong laikim olgeta narapela samting, yu no inap larim wanpela man o wanpela samting i pasim yu long mekim wok bilong God. Sapos yu laikim tru Jehova, dispela bai kirapim yu long kisim baptais, na tu, dispela bai helpim yu long stap gut yet long bilip bihain long yu kisim baptais.

5. Long dispela atikol, yumi bai skelim wanem ol samting?

⁵ Jisas i tok yumi mas laikim Jehova long bel olgeta, laip olgeta, tingting olgeta, na long strong olgeta bilong yumi. (Mak 12:30) Olsem wanem yumi inap kisim pasin bilong laikim tru Jehova na soim bikpela rispek long em? Taim yumi tingim pasin laikim Jehova i soim long yumi, dispela bai kirapim yumi long laikim em. (1 Jon 4:19) Long dispela atikol, yumi bai skelim sampela gutpela tok we inap kirapim yu long kisim pasin bilong laikim God. Na tu, yumi bai skelim ol narapela pasin yu bai kisim taim yu laikim tru God.b

6. Olsem Rom 1:20 i kamapim, wanem wanpela rot bilong kisim save long Jehova?

⁶ Kisim save long Jehova long rot bilong kriesen. (Ritim Rom 1:20; Rev. 4:11) Skelim ol plaua, ol diwai, na ol animal na luksave long olsem wanem ol dispela samting i kamapim klia savetingting bilong God.c Kisim sampela save long hau God i wokim gut yumi. (Sng. 139:14) Tingim olgeta strong na pawa Jehova i putim insait long san maski san em wanpela tasol bilong planti bilion bilion sta i stap long galaksi. (Ais. 40:26) Taim yu tingim na skelim ol samting Jehova i krietim, dispela bai strongim pasin bilong yu long rispektim em. Tasol yu mas mekim sampela samting moa. Yu mas kisim planti save moa long Jehova, na dispela bai strongim moa yet pasin bilong yu long laikim em.

7. Yu mas bilip long wanem samting na dispela bai strongim moa yet pasin bilong yu long laikim Jehova?

⁷ Yu mas bilip olsem Jehova i save tingim yu. Olsem wanem? Yu pilim hatwok long bilip olsem Krieta bilong heven na graun i save long yu na em i tingim yu? Tingim, Jehova “i no stap longwe long yumi olgeta wan wan.” (Apo. 17:26-28) Devit i tokim Solomon olsem God i “save skelim bel bilong olgeta man,” na “sapos yu wok long painim em, em bai kamapim em yet long yu.” (1 Sto. 28:9) Yu inap stadi nau long Baibel bikos Jehova yet i bin tok, “Mi mekim yu i kam klostu long mi.” (Jer. 31:3) Taim yu pilim tru olgeta samting Jehova i mekim bilong helpim yu, dispela bai strongim moa yet pasin bilong yu long laikim em.

8. Sapos yu pilim tru pasin laikim bilong Jehova, dispela bai kirapim yu long mekim wanem?

⁸ Sapos yu pilim tru pasin laikim bilong Jehova, dispela bai kirapim yu long toktok long em long rot bilong beten. Taim yu autim ol wari bilong yu na tenkim em long olgeta samting em i mekim bilong helpim yu, dispela bai strongim moa yet pasin bilong yu long laikim God. Taim yu luksave long ol samting Jehova i mekim bilong bekim ol beten bilong yu, dispela bai strongim pasin bilong yu long pas gut wantaim em. (Sng. 116:1) Yu bai bilip tru olsem em i kliagut long tingting na filings bilong yu. Tasol sapos yu laik go klostu moa long Jehova, yu mas kliagut long tingting bilong em. Yu mas save long ol samting em i laik bai yu mas mekim. Wanpela rot tasol bilong kisim save long laik bilong God em long stadi long Tok bilong em long Baibel.

9. Olsem wanem yu inap soim olsem yu pilim tru tok bilong Baibel?

⁹ Kisim pasin bilong pilim tru Tok Bilong God. Taim yu ritim Baibel, yu bai kisim stretpela save long Jehova na samting em i laik bai yu mas mekim. Yu soim olsem yu pilim tru tok bilong Baibel taim yu ritim long olgeta wan wan de, redim lesen yu bai skelim wantaim Baibel stadi kondakta bilong yu, na bihainim skul yu kisim. (Sng. 119:97, 99; Jon 17:17) Olsem wanem? Yu wokim sediul bilong yu yet long ritim Baibel? Yu save bihainim dispela sediul na ritim Baibel long olgeta wan wan de?

10. Long Baibel, wanem samting i narakain na i spesel tru?

¹⁰ Long Baibel, wanpela samting i narakain na i spesel tru em olsem: Yu inap ritim stori bilong ol aiwitnes em ol i bin lukim Jisas. Baibel tasol em buk i stori long ol samting Jisas i bin mekim bilong helpim yu. Taim yu kisim save long ol tok Jisas i autim na ol wok em i mekim, dispela bai kirapim laik bilong yu long kamap pren bilong em.

11. Olsem wanem yu inap kisim pasin bilong laikim Jehova?

¹¹ Kisim pasin bilong laikim Jisas. Sapos yu laikim Jisas, pasin bilong yu long laikim Jehova bai kamap strong moa. Wai? Bikos Jisas i bihainim gut ol pasin bilong Papa. (Jon 14:9) Olsem na taim yu kisim sampela save moa long Jisas, yu bai kliagut moa na pilim tru ol pasin bilong Jehova. Jisas i sori tru long ol lain i stap rabis, ol lain i sik, na ol lain i no gat strong—em ol lain ol narapela i luk daun long ol. Tingim ol gutpela edvais Jisas i givim long yu na hau laip bilong yu i wok long kamap gutpela moa taim yu bihainim tok bilong em.—Mat. 5:1-11; 7:24-27.

12. Taim yu kisim save long Jisas, dispela inap kirapim yu long mekim wanem?

¹² Pasin bilong yu long laikim Jisas bai kamap strong moa taim yu tingim tingim ofa em i givim we i opim rot long God inap fogivim ol rong bilong yumi. (Mat. 20:28) Taim yu kliagut olsem Jisas i redi long dai bilong helpim yu, dispela inap kirapim yu long tanim bel na mekim ol samting na bai Jehova inap fogivim yu. (Apo. 3:19, 20; 1 Jon 1:9) Taim pasin bilong yu long laikim Jisas na Jehova i kamap strong moa, yu bai amamas long bung wantaim ol narapela em ol tu i laikim Jisas na Jehova.

13. Jehova i givim wanem samting long yu?

¹³ Kisim pasin bilong laikim famili bilong Jehova. Ating ol wanfamili na sampela olpela pren em ol i no wanbilip, ol i no kliagut long risen na yu laik dediketim yu yet long Jehova. Ol inap birua long yu. Tasol Jehova bai helpim yu na givim yu ol wanfamili long sait bilong bilip. Sapos yu pas gut wantaim dispela famili, ol bai laikim yu na sambai long yu. (Mak 10:29, 30; Hib. 10:24, 25) Bihain, ol wanfamili bilong yu inap joinim yu long lotuim Jehova na bihainim ol lo bilong em.—1 Pita 2:12.

14. Olsem 1 Jon 5:3 i kamapim, yu luksave long wanem samting long ol lo bilong Jehova?

¹⁴ Kisim pasin bilong rispektim na bihainim ol lo bilong Jehova. Paslain long yu kisim save long Jehova, ating yu yet i makim wanem pasin i stret na wanem pasin i no stret, tasol nau yu luksave olsem ol lo bilong Jehova i nambawan tru. (Sng. 1:1-3; ritim 1 Jon 5:3.) Tingim ol stiatok bilong helpim ol maritman, ol maritmeri, ol papamama, na ol pikinini. (Efe. 5:22–6:4) Olsem wanem? Taim yu bihainim ol dispela stiatok, yu luksave olsem famili laip bilong yu i kamap gutpela moa? Taim yu bihainim ol stiatok bilong Jehova long sait bilong makim gut ol poroman, yu kisim sampela gutpela pasin? Yu pilim olsem yu stap amamas moa? (Prov. 13:20; 1 Kor. 15:33) Ating bekim bilong yu long ol dispela askim em yes.

15. Yu ken mekim wanem sapos yu pilim hatwok long kliagut long olsem wanem yu inap bihainim ol stiatok bilong Baibel?

¹⁵ Sampela taim yu inap pilim hatwok long kliagut long olsem wanem yu inap bihainim ol stiatok yu lainim. Olsem na Jehova i yusim oganaisesen bilong em long redim ol pablikesen bilong Baibel we inap helpim yu long kliagut long wanem samting i stret na wanem samting i no stret. (Hib. 5:13, 14) Taim yu ritim na stadim ol dispela pablikesen, yu bai luksave stret long olsem wanem yu inap bihainim ol stiatok bilong Baibel, na dispela bai kirapim yu long kam insait long oganaisesen bilong Jehova.

16. Olsem wanem Jehova i oganaisim ol manmeri bilong em?

¹⁶ Kisim pasin bilong laikim na sapotim oganaisesen bilong Jehova. Jehova i oganaisim ol manmeri bilong em long stap insait long ol kongrigesen—Pikinini bilong em, Jisas, i stap het bilong olgeta kongrigesen. (Efe. 1:22; 5:23) Namel long ol Kristen God i bin anointim, Jisas i makim sampela brata tasol long go pas long oganaisim wok em Jisas i laik bai yumi mas mekim long nau. Jisas i kolim ol olsem “gutpela wokboi i gat savetingting,” na ol i pilim olsem em i bikpela samting tru long ol i mas givim kaikai bilong strongim na lukautim yu long sait bilong bilip. (Mat. 24:45-47) Gutpela wokboi i tingim yu, na wanpela rot bilong helpim yu em olsem: Dispela wokboi i apointim ol elda long stap olsem ol wasman insait long kongrigesen. (Ais. 32:1, 2; Hib. 13:17; 1 Pita 5:2, 3) Ol elda i redi long mekim olgeta kain samting bilong helpim yu, mekim isi bel bilong yu, na stiaim yu long i go klostu moa long Jehova. Tasol wanpela bikpela samting tru ol i mekim bilong helpim yu em olsem: Ol i helpim yu long skulim ol narapela long Jehova.—Efe. 4:11-13.

17. Olsem Rom 10:10, 13, 14 i kamapim, wai na yumi save skulim ol narapela long Jehova?

¹⁷ Helpim ol narapela long kisim pasin bilong laikim Jehova. Jisas i tokim ol disaipel long skulim ol narapela long Jehova. (Mat. 28:19, 20) Yumi save olsem yumi mas bihainim dispela tok. Tasol taim pasin bilong yu long laikim Jehova i kamap strong moa, yu bai pilim wankain olsem aposel Pita na Jon, em ol i tok: “[Mipela] i no inap pasim maus long ol samting [mipela] i bin lukim na harim.” (Apo. 4:20) Yumi save kisim bikpela amamas tru taim yumi helpim wanpela long kisim pasin bilong laikim Jehova. Filip i kisim bikpela amamas tru taim em i helpim man Itiopia long kisim save long ol tok i stap long Ol Skripsa na kisim baptais! Taim yu bihainim eksampel bilong Filip na bihainim tok bilong Jisas long autim tok, yu soim klia olsem yu laik kamap wanpela Witnes Bilong Jehova. (Ritim Rom 10:10, 13, 14.) Ating yu bai mekim wankain askim olsem man Itiopia i bin mekim: “Wanem samting i pasim mi long kisim baptais?”—Apo. 8:36.

18. Yumi bai skelim wanem ol askim long neks atikol?

¹⁸ Taim yu mekim disisen long kisim baptais, dispela em nambawan bikpela disisen long laip bilong yu. Olsem na yu mas kliagut long ol samting yu mas mekim taim yu kisim baptais pinis. Kain olsem: Yu mas kisim wanem stretpela save long mining bilong baptais? Yu mas mekim wanem ol samting paslain na bihain long taim yu kisim baptais? Yumi bai kisim bekim bilong ol dispela askim long neks atikol.