Wanem Taim i Stret Long Toktok?

1. Eklisiastis 3:1, 7 i givim wanem skul long yumi?

SAMPELA bilong yumi i gat pasin bilong toktok. Sampela i no gat pasin bilong toktok. Olsem tim skripsa long dispela atikol i kamapim, i gat taim bilong toktok na taim bilong pasim maus. (Ritim Eklisiastis 3:1, 7.) Maski i olsem, ating yumi laik bai sampela bratasista i kisim pasin bilong toktok. Na ating yumi laik bai sampela i no ken toktok tumas.

2. Husat i gat rait long putim lo bilong makim wanem taim yumi ken toktok na wanem ol tok yumi ken mekim?

² Pasin bilong toktok em wanpela presen i kam long Jehova. (Kis. 4:10, 11; Rev. 4:11) Long Baibel, God i helpim yumi long kliagut long rot bilong yusim gut dispela presen. Long dispela atikol, yumi bai skelim sampela eksampel bilong Baibel we inap skulim yumi long wanem taim yumi ken toktok na wanem taim yumi no ken toktok. Yumi bai kisim save tu long Jehova i pilim olsem wanem long ol tok yumi mekim long ol narapela. Pastaim, yumi ken stori long wanem taim yumi mas toktok.

WANEM TAIM YUMI MAS TOKTOK?

3. Olsem Rom 10:14 i kamapim, wanem taim yumi mas toktok?

³ Oltaim yumi mas redi long tokim ol narapela long Jehova na Kingdom bilong em. (Mat. 24:14; ritim Rom 10:14.) Long dispela rot, yumi bihainim pasin bilong Jisas. Wanpela bikpela risen bilong Jisas long kam long graun em olsem, em i laik skulim gut ol manmeri long Papa bilong em. (Jon 18:37) Yumi mas tingim gut wei bilong yumi long tromoi tok. Taim yumi tokim ol narapela long Jehova, yumi mas tingim filings na bilip bilong ol na yumi mas mekim tok “long pasin isi na pasin rispek.” (1 Pita 3:15) Taim yumi mekim olsem, tok bilong yumi bai go daun tru long bel bilong man.

4. Olsem Provep 9:9 i kamapim, hau bai toktok bilong ol elda inap helpim ol narapela?

⁴ Ol elda i no ken surik long toktok sapos ol i lukim olsem wanpela brata o sista i nidim tok kaunsel. Em tru olsem ol i mas makim taim i stret na bai ol i no ken semim narapela. Ol i ken wet inap long taim we ol narapela bratasista i no stap klostu. Ol elda i no ken givim tok kaunsel long pasin we inap daunim gutnem bilong pablisa. Ol i mas kamapim ol stiatok bilong Baibel we inap helpim pablisa long bihainim savetingting. (Ritim Provep 9:9.) Long taim i stret long toktok, wai na em i bikpela samting long yumi mas strongim bel na toktok? Skelim 2-pela narapela narapela eksampel: Wanpela man i mas stretim pasin bilong ol pikinini bilong em, na wanpela meri i mas go toktok long wanpela man husat bai mekim wok king long bihain.

5. Wanem samting i kamap na i stret long Hetpris Eli i mas toktok, tasol em i no bin mekim olsem?

⁵ Hetpris Eli i gat 2-pela pikinini man na em i laikim ol tru. Tasol dispela tupela pikinini i no rispektim Jehova. Tupela i mekim wok pris long haus lotu sel. Tasol tupela i mekim pasin bikhet, na ol i no rispektim ol ofa em ol manmeri i givim long Jehova, na ol i mekim pasin pamuk. (1 Sml. 2:12-17, 22) Lo Bilong Moses i makim olsem i stret long kilim tupela i dai, tasol Eli i givim liklik tok kaunsel long tupela na em i larim tupela long stap na wok yet long haus lotu sel. (Lo 21:18-21) Jehova i pilim olsem wanem long wei bilong Eli long stretim ol? Em i tokim Eli: “Yu wok long givim bikpela ona long tupela pikinini man bilong yu winim mi.” Olsem na Jehova i mekim disisen long kilim tupela i dai.—1 Sml. 2:29, 34.

6. Yumi kisim wanem skul long stori bilong Eli?

⁶ Yumi kisim wanpela bikpela skul long stori bilong Eli. Sapos yumi painimaut olsem wanpela pren o wanblut i brukim lo bilong God, orait yumi mas toktok na kirapim em long tingim gen ol lo bilong Jehova. Yumi mas toktok na bai em inap kisim helpim i kam long ol wokman bilong Jehova. (Jems 5:14) Yumi no ken tru bihainim pasin bilong Eli na givim bikpela ona long wanpela pren o wanblut na yumi no givim ona long Jehova. Yumi mas strongim bel na bai yumi inap stretim pasin bilong narapela, na dispela bai kamapim gutpela samting. Orait nau yumi ken skelim pasin bilong wanpela meri Israel, em Abigel.

7. Wai na Abigel i toktok long Devit?

⁷ Abigel em meri bilong wanpela maniman, nem bilong em Nabal. Taim Devit na lain bilong em i ranawe long King Sol, ol i lusim sampela haptaim long stap wantaim ol man i lukautim ol sipsip bilong Nabal, na ol i lukautim gut ol animal bilong Nabal na bai ol stilman i no ken stilim. Yu ting Nabal i soim tenkyu bilong em long Devit na lain bilong em? Nogat. Taim Devit i askim em long givim sampela kaikai na wara long ol lain bilong em, Nabal i kros na em i singaut bikmaus na mekim tok bilong daunim ol. (1 Sml. 25:5-8, 10-12, 14) Olsem na Devit i tok long kilim i dai olgeta man long lain bilong Nabal. (1 Sml. 25:13, 22) Hau bai ol inap stopim dispela hevi? Abigel i luksave olsem em i mas toktok, olsem na em i strongim bel na em i go long bungim 400 man em ol i hangre na belhat, na em i toktok long Devit.

8. Yumi kisim wanem skul long stori bilong Abigel?

⁸ Taim Abigel i bungim Devit, em i strongim bel na bihainim pasin rispek taim em i toktok, na toktok bilong em i kirapim Devit long senisim tingting. Abigel i no gat asua long wanpela samting, tasol em i tok sori long Devit. Abigel i bin askim Jehova long strongim em, olsem na em inap toktok long Devit na kolim ol gutpela pasin bilong em. (1 Sml. 25:24, 26, 28, 33, 34) Wankain olsem Abigel, yumi tu mas strongim bel na toktok sapos yumi lukim olsem narapela i laik mekim rong. (Sng. 141:5) Yumi mas soim pasin rispek, na tu, yumi mas tokaut stret. Taim yumi soim pasin laikim na givim tok kaunsel i stret long narapela, yumi soim olsem yumi stap pren tru.—Prov. 27:17.

9-10. Ol elda i mas tingim wanem samting taim ol i givim tok kaunsel long ol narapela?

⁹ Ol elda i mas strongim bel na toktok long ol narapela long kongrigesen em ol i mekim popaia. (Gal. 6:1) Ol i mas bihainim pasin daun na luksave olsem ol tu i sinman na wanpela taim ol tu bai nidim tok kaunsel. Tasol ol i no ken larim dispela i stopim ol long stretim pasin bilong ol narapela. (2 Tim. 4:2; Tai. 1:9) Ol i bihainim savetingting na pasin isi taim ol i givim tok kaunsel. Ol i laikim tru ol narapela, na pasin laikim i kirapim ol long helpim ol narapela. (Prov. 13:24) Tasol nambawan laik bilong ol em long givim ona long Jehova, olsem na ol i wok strong long bihainim ol lo bilong em na lukautim kongrigesen na bai ol hevi i no ken daunim ol.—Apo. 20:28.

¹⁰ Orait nau yumi kisim save pinis long wanem kain taim yumi mas toktok. Tasol sampela taim i gutpela moa long yumi no ken mekim wanpela tok. Wanem ol hevi inap kamap long kain taim olsem?

WANEM TAIM YUMI NO KEN TOKTOK?

11. (a) Jems i bin mekim wanem kain tok piksa? (b) Olsem wanem dispela tok piksa i stret long pasin bilong yumi long toktok?

¹¹ Yumi inap pilim hatwok long kontrolim toktok bilong yumi. Jems i bin mekim wanpela tok piksa. Em i tok: “Sapos man i no popaia long tok em i mekim, orait dispela man i gutpela olgeta, na em inap bosim gut bodi olgeta bilong em. Sapos yumi putim hap ain long maus bilong ol hos bilong mekim ol i bihainim tok bilong yumi, orait long dispela rot yumi bosim tu bodi olgeta bilong ol.” (Jems 3:2, 3) Ol man bilong sindaun long hos i save putim hap ain long het na long maus bilong hos. Ol i joinim ol dispela hap ain long ol rop, olsem na taim man i pulim ol rop, dispela inap stiaim hos o mekim em i stop. Sapos man i no pulim stret ol rop, hos inap ron i go nabaut na kamapim hevi long em yet na long man i sindaun long hos. Olsem tasol, sapos yumi no kontrolim gut toktok bilong yumi, dispela inap kamapim planti hevi. Orait yumi ken stori long wanem taim yumi no ken toktok.

12. Wanem taim i no stret long yumi toktok?

¹² Yu save mekim wanem taim wanpela brata o sista i save long sampela tok hait we i no stret long ol narapela i save long en? Sapos yu bungim wanpela brata i stap long kantri we gavman i tambuim wok lotu bilong yumi, yu ting yu bai askim em long hau ol bratasista i mekim wok lotu long kantri ol i stap long en? Ating yu gat stretpela tingting. Yumi laikim tru ol bratasista bilong yumi na yumi laik save long ol i stap olsem wanem. Taim yumi beten, yumi laik kolim stret ol samting yumi laik bai God i mekim bilong helpim ol. Tasol long kain taim olsem, yumi no ken toktok long dispela samting. Sapos yumi strong long brata i mas stori long ol tok hait, yumi soim olsem yumi no gat pasin laikim—yumi no soim pasin laikim long dispela brata na ol bratasista long kantri em gavman i tambuim wok bilong yumi. Yumi no ken putim planti hevi moa long ol dispela bratasista. Na tu, ol bratasista long ol kain ples olsem i no inap stori long ol narapela long olsem wanem ol Witnes long ol dispela hap i mekim wok autim tok na ol narapela wok lotu.

13. Olsem Provep 11:13 i kamapim, ol elda i mas mekim wanem? Bilong wanem?

¹³ Ol elda i mas bihainim stiatok bilong Provep 11:13 na no ken stori nabaut long ol samting we i mas stap olsem tok hait. (Ritim.) Hevi inap kamap sapos elda em maritman. Tupela marit inap pas gut wantaim sapos ol i toktok gut long narapela narapela na autim olgeta tingting na filings bilong ol. Tasol elda i save olsem em i no ken stori nabaut long “ol tok hait bilong narapela” insait long kongrigesen. Sapos em i mekim olsem, em bai bagarapim gutnem bilong em yet na ol narapela long kongrigesen i no inap trastim em. Ol man i kisim wok insait long kongrigesen, ol i no ken i gat “tupela maus,” o mekim tok giaman. (1 Tim. 3:8, ftn.) Ol i no ken kusai long toktok bilong ol o tok baksait long ol narapela. Sapos elda i laikim tru meri bilong em, em i no inap stori long ol samting we i no stret long meri i save long en bikos dispela bai putim hevi long meri.

14. Olsem wanem meri bilong elda inap helpim man bilong em long holim yet gutnem?

¹⁴ Maritmeri inap helpim man bilong em long holim yet gutnem sapos em i no strong long man i mas stori long ol tok hait. Long dispela rot, meri bai helpim man long inapim gut wok bilong em, na tu, meri bai soim olsem em i rispektim ol narapela husat i trastim man bilong em. Bikpela samting moa, meri bai mekim Jehova i belgut bikos em i strongim bel isi na pasin wanbel insait long kongrigesen.—Rom 14:19.

JEHOVA I PILIM OLSEM WANEM LONG TOK BILONG YUMI?

15. Jehova i pilim olsem wanem long 3-pela pren bilong Jop? Bilong wanem?

¹⁵ Yumi inap kisim planti save long Buk Jop, long olsem wanem na wanem taim yumi ken toktok. Ol bikpela hevi tru i painim Jop, na bihain long en 4-pela man i kam long mekim gut bel bilong Jop na givim tok kaunsel long em. Inap longpela haptaim, ol dispela man i no mekim wanpela tok. Tasol taim yumi skelim tok bilong 3-pela bilong ol—Elifas, Bildat, na Sofar—i luk olsem ol i no lusim sampela haptaim long tingting long olsem wanem ol inap helpim Jop. Ol i tingting moa long hau ol inap soim klia olsem Jop i bin mekim rong. Sampela tok bilong ol i tru, tasol planti tok ol i mekim long pasin bilong Jop na Jehova, em i no stret na i no tru. Ol i sutim tok olsem Jop em man nogut. (Jop 32:1-3) Jehova i mekim wanem? Em i belhat tru long ol dispela 3-pela man. Em i tok ol i mekim ol kranki toktok na ol i mas askim Jop long mekim beten bilong helpim ol.—Jop 42:7-9.

16. Yumi inap kisim wanem skul long stori bilong Elifas, Bildat, na Sofar?

¹⁶ Yumi kisim sampela skul long stori bilong Elifas, Bildat, na Sofar. Namba 1: Yumi no ken skelim pasin bilong ol bratasista. (Mat. 7:1-5) Yumi mas putim gut yau long ol paslain long yumi toktok. Long dispela rot tasol yumi bai kliagut long hevi bilong ol. (1 Pita 3:8) Namba 2: Taim yumi toktok, yumi mas mekim ol tok we i gutpela na i stret. (Efe. 4:25) Namba 3: Jehova i laik tru long save long ol tok yumi mekim long narapela narapela.

17. Yumi inap kisim wanem skul long stori bilong Elihu?

¹⁷ Namba 4 man i visitim Jop em Elihu, wanblut bilong Abraham. Em i putim gut yau taim Jop na 3-pela narapela man i toktok. Em i bin putim gut yau long toktok bilong ol bikos ol tok bilong em i soim olsem em i gat pasin sori, na tu, em i kolim stret ol tok we i helpim Jop long stretim tingting kranki bilong em. (Jop 33:1, 6, 17) Bikpela tingting bilong Elihu em long givim biknem long Jehova, na i no long em yet o long narapela man. (Jop 32:21, 22; 37:23, 24) Pasin bilong Elihu i soim olsem i gat taim bilong pasim maus na taim bilong putim yau. (Jems 1:19) Na tu, yumi kisim save olsem taim yumi givim tok kaunsel, nambawan tingting bilong yumi em long givim ona long Jehova, na i no long yumi yet.

18. Hau bai yumi inap soim olsem yumi amamas tru long presen bilong yumi long toktok?

¹⁸ Sapos yumi amamas long presen bilong yumi long toktok, yumi bai bihainim skultok bilong Baibel na tingim gut wanem taim yumi ken toktok na wanem ol tok yumi ken mekim. Holi spirit i kirapim King Solomon long tokaut olsem: “Tok man i mekim long taim stret bilong en, dispela i olsem ol apol gol i stap insait long ol silva dis.” (Prov. 25:11) Sapos yumi putim gut yau long ol narapela, na yumi tingting gut paslain long yumi toktok, orait toktok bilong yumi bai i olsem ol apol ol i wokim long gol—ol i nais tumas na dia tru. Maski yumi mekim liklik tok o planti tok, toktok bilong yumi bai strongim ol narapela, na Jehova bai amamas long yumi. (Prov. 23:15; Efe. 4:29) Dispela em nambawan gutpela rot bilong soim olsem yumi amamas tru long presen em God i givim long yumi!