STADI ATIKOL 13
Laikim Tru Narapela Narapela
“Laikim tru narapela narapela long bel olgeta.”—1 PITA 1:22.
SINGSING 109 [25] Laikim Tru Ol Arapela Long Bel Olgeta
PRIVIUa
Long laspela nait bilong Jisas long stap wantaim ol aposel, em i strongim ol long soim pasin laikim (Lukim paragraf 1-2)
1. Jisas i bin tokim ol disaipel long bihainim wanem lo? (Lukim fran pes piksa.)
LONG nait paslain long Jisas i dai, em i givim wanpela lo long ol disaipel. Em i tokim ol: “Yupela i mas laikim narapela narapela olsem mi bin laikim yupela.” Em i tok moa: “Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:34, 35.
2. Wai na em i bikpela samting long yumi mas soim pasin laikim long narapela narapela?
2 Jisas i tok sapos ol disaipel i soim pasin laikim tru olsem em i bin soim, ol manmeri bai luksave olsem ol i disaipel tru. Dispela samting i kamap tru long taim bilong ol Kristen long bipo, na long nau tu. Yumi no ken larim ol hevi i daunim yumi, na yumi mas soim pasin laikim long narapela narapela!
3. Long dispela atikol, yumi bai stori long wanem samting?
3 Yumi gat sin, olsem na i hatwok long soim olsem yumi laikim tru narapela narapela. Maski i olsem, yumi mas traim long bihainim pasin bilong Krais. Long dispela atikol, yumi bai stori long olsem wanem pasin laikim i helpim yumi long strongim pasin bilong i stap bel isi, sakim wansait pasin, na mekim gut long ol narapela. Taim yu stadi long dispela atikol, askim yu yet: ‘Mi inap kisim wanem skul long stori bilong ol bratasista husat i wok yet long soim pasin laikim long ol narapela maski i gat hevi?’
STRONGIM BEL ISI
4. Olsem Matyu 5:23, 24 i tok, wai na yumi mas kamapim gen bel isi namel long yumi yet na ol narapela bratasista husat i kros o bel hevi long yumi?
4 Jisas i soim olsem em i bikpela samting long yumi mas stap bel isi wantaim wanpela brata o sista husat i kros o bel hevi long yumi. (Ritim Matyu 5:23, 24.) Em i kamapim klia olsem yumi mas pas gut wantaim ol narapela sapos yumi laik amamasim God. Jehova i save amamas taim yumi mekim olgeta samting yumi inap mekim bilong stap bel isi wantaim ol bratasista. Em i no inap amamas long wok lotu bilong yumi sapos yumi bel nogut na yumi no laik kamapim gen bel isi namel long yumi na ol narapela.—1 Jon 4:20.
5. Wanem samting i pasim rot bilong Mark long kamapim gen bel isi?
5 Ating yumi inap pilim hatwok long kamapim gen bel isi. Wai? Tingim samting i kamap long Mark.b Em i bel hevi tru taim wanpela brata i sutim tok long em na stori wantaim ol narapela long kongrigesen na mekim ol tok i no stret long em. Mark i mekim wanem? Em i tok: “Mi no bosim bel na mi kros.” Tasol bihain Mark i bel hevi long pasin em i mekim, na em i traim long tok sori long dispela brata na kamapim gen bel isi namel long tupela. Tasol dispela brata i no laik kamapim bel isi. Pastaim Mark i tingting olsem, ‘Wai bai mi bisi long kamapim bel isi sapos em i no laik kamap wanbel?’ Tasol wasman sekit i strongim Mark na tokim em olsem em i no ken givap. Olsem na Mark i mekim wanem?
6. (a) Mark i mekim wanem ol samting bilong kamapim gen bel isi? (b) Olsem wanem Mark i bihainim skultok i stap long Kolosi 3:13, 14?
6 Taim Mark i skelim tingting bilong em yet, em i luksave olsem em i no gat pasin daun na em i ting pasin bilong em yet i stret. Em i luksave olsem em i mas mekim sampela senis. (Kol. 3:8, 9, 12) Em i daunim em yet na go long dispela narapela brata na tok sori. Mark i raitim sampela pas long dispela brata na tok sori tru long em i bin kros na em i askim sapos ol inap kamap pren gen. Mark i givim sampela liklik presen long dispela brata, em ol presen we Mark i ting dispela brata bai laikim. Tasol dispela brata i bel nogut yet na em i no laik kamap wanbel. Mark i bihainim yet tok bilong Jisas na em i soim pasin laikim long dispela brata na fogivim em. (Ritim Kolosi 3:13, 14.) Taim yumi traim olgeta kain rot bilong kamapim gen bel isi, tasol ol narapela i no laik kamap wanbel, pasin laikim tru bai helpim yumi long fogivim yet ol narapela na beten olsem rot bai op long yumi inap kamap wanbel gen.—Mat. 18:21, 22; Gal. 6:9.
Yumi mas traim olgeta kain rot bilong daunim ol tingting kranki (Lukim paragraf 7-8)c
7. (a) Jisas i kirapim yumi long mekim wanem? (b) Wanpela sista i bungim wanem hevi?
7 Jisas i tok yumi mas mekim ol pasin em yumi laik bai ol narapela i mekim long yumi. Yumi save laikim ol lain husat i laikim yumi, tasol Jisas i tok yumi mas laikim tu ol narapela. (Luk 6:31-33) Olsem wanem sapos wanpela long kongrigesen i abrusim yu na em i no laik tok gude long yu? Dispela samting i bin kamap long Lara. Em i tok: “Wanpela sista i abrusim mi, na mi no save long wai na em i mekim olsem. Dispela i bagarapim bel bilong mi na mi no amamas moa long go long miting.” Pastaim Lara i tingting olsem: ‘Mi no mekim wanpela rong. Ol narapela long kongrigesen tu i pilim olsem dispela sista i no mekim stretpela pasin.’
8. Lara i mekim wanem bilong kamapim gen bel isi? (b) Yumi inap kisim wanem skul long ekspiriens bilong em?
8 Lara i mekim sampela samting bilong kamapim gen bel isi. Em i beten long Jehova na em i go toktok wantaim dispela sista. Tupela i toktok na stretim dispela hevi, na hagim narapela narapela, na kamapim gen bel isi namel long tupela. I luk olsem ol i stap bel isi gen. Lara i tok: “Tasol bihain, dispela sista i mekim gen wankain pasin olsem em i bin mekim long pastaim. Dispela i bagarapim tru bel bilong mi.” Pastaim, Lara i pilim olsem em bai stap amamas sapos dispela sista i senisim pasin bilong em. Tasol bihain, Lara i luksave olsem gutpela rot tru bilong helpim dispela sista em olsem, em i mas wok yet long soim pasin laikim long dispela sista na “redi long fogivim” em. (Efe. 4:32–5:2) Lara i tingim gen olsem pasin laikim tru i save stiaim man na “em i no save tingim rong ol arapela i mekim long em. Em i no save larim wanpela samting i daunim em, em i save bilip long olgeta samting, em i save wetim ol gutpela samting i kamap, na em i save sanap strong long olgeta hevi i kamap long em.” (1 Kor. 13:5, 7) Lara i kisim gen bel isi. Bihain, dispela sista i soim gen pasin pren. Taim yu strongim pasin bilong i stap bel isi wantaim ol bratasista na yu soim yet pasin laikim long ol, yu ken bilip tru olsem “God bilong pasin laikim na bel isi bai stap wantaim yupela.”—2 Kor. 13:11.
NO KEN MEKIM WANSAIT PASIN
9. Olsem Aposel 10:34, 35 i kamapim, wai na yumi mas sakim wansait pasin?
9 Jehova i no save mekim wansait pasin. (Ritim Aposel 10:34, 35.) Taim yumi sakim wansait pasin, yumi soim olsem yumi ol pikinini bilong God. Yumi bihainim Lo bilong laikim tru ol narapela olsem yumi laikim yumi yet, na yumi strongim bel isi namel long lain brata bilong yumi.—Rom 12:9, 10; Jems 2:8, 9.
10-11. Olsem wanem wanpela sista i daunim tingting kranki bilong em?
10 Ating sampela bai pilim hatwok long sakim wansait pasin. Tingim samting i kamap long wanpela sista, nem bilong em Ruth. Taim em i stap tineja, hevi i kamap namel long em na wanpela meri bilong narapela kantri. Dispela i mekim wanem long Ruth? Em i tok: “Mi heitim olgeta samting long dispela kantri. Mi ting olgeta manmeri bilong dispela kantri, na ol bratasista tu, i gat wankain pasin olsem dispela meri.” Olsem wanem Ruth i daunim tingting kranki bilong em?
11 Ruth i luksave olsem em i mas mekim sampela samting bilong daunim tingting kranki bilong em. Em i ritim ol ekspiriens na ol ripot bilong Yiabuk i stori long dispela kantri. Em i tok: “Mi wok strong long holim stretpela tingting long ol manmeri bilong dispela kantri. Mi stat long luksave olsem ol bratasista i givim bel tru long mekim wok bilong Jehova. Mi luksave olsem ol tu i stap insait long lain brata bilong yumi.” Isi isi, Ruth i luksave olsem em i mas mekim sampela samting moa. Em i tok: “Taim mi bungim ol bratasista bilong dispela kantri, mi save wok strong moa long kamap pren bilong ol. Mi toktok long ol na save gut moa long ol.” Wanem samting i kamap? Ruth i tok: “Bihain, mi no holim moa tingting kranki.”
Sapos yumi “laikim tru olgeta wanbilip,” yumi no inap mekim wansait pasin (Lukim paragraf 12-13)d
12. Wanpela sista nem bilong em Sarah, em i bin gat wanem hevi?
12 Ating sampela i no inap luksave olsem ol i wok long mekim wansait pasin. Sarah i ting em i mekim stretpela pasin bikos em i no skelim ol manmeri long sait bilong skin kala, hamas mani ol i gat, o wok ol i mekim insait long oganaisesen. Tasol em i tok: “Mi luksave olsem mi wok long mekim wansait pasin.” Long wanem rot? Ol wanfamili bilong Sarah i bin go long bikpela skul, olsem na em i laik bung tasol wantaim ol manmeri i gat wankain sindaun olsem em. Wanpela taim em i tokim pren bilong em: “Mi save bung wantaim ol wanbilip em ol i bin kisim bikpela skul. Mi no save bung wantaim ol narapela em ol i no bin kisim bikpela skul.” Sarah i holim tingting kranki, olsem na em i mas senisim dispela tingting. Em i mekim wanem?
13. Sarah i senisim tingting kranki bilong em, na dispela inap givim wanem skul long yumi?
13 Wasman sekit i helpim Sarah long skelim gen tingting bilong em. Sarah i tok: “Em i tok amamas long gutpela wok mi mekim, na ol gutpela tok mi save bekim long miting, na save bilong mi long Baibel. Em i tok tu olsem taim save bilong yumi i kamap bikpela, yumi mas kamapim ol pasin Kristen olsem pasin daun na pasin marimari.” Sarah i tingim gut tok bilong wasman sekit. Sarah i tok: “Mi luksave olsem em i bikpela samting long mi mas mekim gut long ol narapela na soim pasin laikim long ol.” Taim em i mekim olsem, dispela i helpim em long holim stretpela tingting long ol bratasista. Em i tok: “Mi traim long luksave long ol gutpela pasin we i mekim na ol i dia tumas long ai bilong Jehova.” Orait, olsem wanem long yumi? Yumi no ken tingim skul yumi kisim na larim dispela i mekim na yumi pilim olsem yumi winim tru ol narapela! Sapos yumi “laikim tru olgeta wanbilip” bilong yumi, yumi no inap mekim wansait pasin long ol.—1 Pita 2:17.
MEKIM GUT LONG OL NARAPELA
14. Olsem Hibru 13:16 i kamapim, Jehova i save pilim olsem wanem taim yumi mekim gut long ol narapela?
14 Jehova i laikim tru ol manmeri husat i save mekim gut long ol narapela. (Ritim Hibru 13:16.) Em i tingim dispela olsem hap wok lotu bilong yumi, na moa yet taim yumi helpim ol lain i nidim helpim. (Jems 1:27; 2:14-17) Olsem na Baibel i kirapim yumi long “bihainim pasin bilong mekim gut long ol arapela.” (Rom 12:13) Taim yumi mekim gut long ol narapela, yumi soim olsem yumi tingim na laikim ol na yumi laik stap pren bilong ol. Jehova i save amamas taim yumi serim ol samting yumi gat, olsem prut o keik, dring, kaikai, o haptaim bilong yumi. (1 Pita 4:8-10) Tasol sampela samting inap pasim rot bilong yumi long mekim gut long ol narapela.
“Long bipo, mi no redi long mekim gut long ol narapela, tasol mi senisim pasin na nau mi kisim bikpela amamas” (Lukim paragraf 16)e
15-16. (a) Wai na sampela inap surik long mekim gut long ol narapela? (b) Olsem wanem Edit i kisim pasin bilong mekim gut long ol narapela?
15 Sampela samting long sindaun bilong yumi inap pasim rot bilong yumi long mekim gut long ol narapela. Skelim eksampel bilong wanpela wido meri, nem bilong em Edit. Paslain long em i kamap Witnes, em i laik stap em yet tasol. Edit i pilim olsem laip bilong ol narapela i gutpela moa na ol bai redi tru long mekim gut long ol narapela.
16 Taim Edit i kamap Witnes, em i senisim tingting bilong em. Em yet i go pas long mekim gut long ol narapela. Em i tok: “Taim konstraksen tim i mekim wok bilong sanapim nupela Haus Kingdom bilong mipela, wanpela elda i tokim mi olsem tupela marit bai kam long helpim dispela wok, na em i askim sapos mi inap larim ol i stap long haus bilong mi inap 2-pela wik. Mi tingim wido meri bilong taun Sarefat na olsem wanem Jehova i blesim em.” (1 Kin. 17:12-16) Edit i tok orait long dispela tupela marit i ken stap long haus bilong em. Yu ting em i kisim blesing? Em i tok: “Tupela wik i pinis, na ol i stap wantaim mi inap 2-pela mun olgeta. Insait long dispela haptaim, mipela i kamap gutpela pren.” Na tu, Edit i kisim ol gutpela pren insait long kongrigesen. Long nau em i mekim wok painia, na em i save amamas long wok wantaim ol narapela na bringim ol i go long haus bilong em long dring wara na malolo. Em i tok: “Mi save bel gut tru taim mi givim ol samting long ol narapela! Mi kisim planti blesing tru.”—Hib. 13:1, 2.
17. Luke na meri bilong em i luksave long wanem samting?
17 Ating yumi save mekim gut long ol narapela, tasol i gat sampela samting moa yumi inap mekim. Tingim Luke na meri bilong em; tupela i save mekim gut long ol narapela. Ol i save amamas long invaitim papamama bilong ol, ol wanblut, ol gutpela pren, na wasman sekit na meri bilong em. Tasol Luke i tok: “Mipela i luksave olsem mipela i wok long invaitim tasol ol manmeri husat i pas gut wantaim mipela.” Orait, Luke na meri bilong em i mekim wanem?
18. Olsem wanem Luke na meri bilong em i kamap gutpela moa long pasin bilong mekim gut long ol narapela?
18 Luke na meri bilong em i senisim tingting taim ol i tingim gen tok bilong Jisas: “Sapos yupela i laikim ol man i save laikim yupela, orait bai yupela i kisim wanem pe?” (Mat. 5:45-47) Ol i luksave olsem ol i mas bihainim pasin bilong Jehova—em i save givim ol samting long olgeta lain. Olsem na ol i putim mak long invaitim ol bratasista em ol i no invaitim long pastaim. Luke i tok: “Mipela olgeta i save kisim amamas long ol dispela bung. Mipela olgeta i pilim olsem mipela i strongim tru narapela narapela.”
19. (a) Olsem wanem yumi inap soim klia olsem yumi ol disaipel tru bilong Jisas? (b) Yu tingting strong long mekim wanem?
19 Sapos yumi laikim tru ol narapela, yumi bai strongim pasin bilong i stap bel isi, sakim wansait pasin, na mekim gut long ol narapela. Yumi mas sakim ol tingting kranki na laikim tru ol bratasista bilong yumi long bel olgeta. Sapos yumi mekim olsem, yumi bai stap amamas na soim klia olsem yumi ol disaipel tru bilong Jisas.—Jon 13:17, 35.
SINGSING 88 [11] Skulim Mi Long Pasin Bilong Yu
a Jisas i tok pasin laikim em mak bilong ol Kristen tru. Sapos yumi laikim tru ol bratasista, dispela bai kirapim yumi long painim rot bilong i stap bel isi, na yumi no inap mekim wansait pasin, na yumi bai mekim gut long ol narapela. Sampela taim yumi inap pilim hatwok long mekim olsem. Dispela atikol i kolim sampela samting yumi ken mekim na bai yumi inap holim yet pasin bilong laikim tru narapela narapela long bel olgeta bilong yumi.
b Mipela i senisim sampela nem long dispela atikol.
c STORI BILONG PIKSA: Wanpela sista i traim long stretim hevi, na narapela sista i no laik, tasol em i no givap. Em i traim ol narapela rot na bihain gutpela samting i kamap.
d STORI BILONG PIKSA: Lapun brata i pilim olsem ol narapela long kongrigesen i no tingim em.
e STORI BILONG PIKSA: Wanpela sista i no bin redi long mekim gut long ol narapela, tasol em i senisim tingting na dispela i givim amamas long em.