Kirap Bek i Soim Ol Pasin Bilong God—Pasin Laikim, Savetingting, na i No Les Kwik

1. Wai na Jehova i wokim ol samting i gat laip?

PASTAIM, Jehova wanpela tasol i bin i stap. Tasol em i no pilim olsem em i stap wanpis. Em i no sot long wanpela samting. Maski i olsem, God i laik bai ol narapela i gat laip na bai ol tu i ken amamas. Pasin laikim i kirapim Jehova long wokim ol samting.—Sng. 36:9; 1 Jon 4:19.

2. Jisas na ol ensel i pilim olsem wanem taim ol i lukim ol samting Jehova i wokim?

² Namba 1: Jehova i wokim Pikinini bilong em, Jisas. Long rot bilong Jisas, “God i wokim olgeta arapela samting,” na em i wokim tu planti milion ensel. (Kol. 1:16) Jisas i amamas tru long wok wantaim Papa bilong em. (Prov. 8:30) Na ol ensel tu i amamas. Ol i lukluk i stap taim Jehova na Jisas, em Saveman Bilong Wok, i wokim ol samting long ples antap na long graun. Ol ensel i mekim wanem? Ol i “amamas na singaut” taim God i wokim graun, na ol i amamas long olgeta wan wan samting God i wokim, na ol i amamas tu taim em i wokim ol manmeri. (Jop 38:7; Prov. 8:31) Olgeta samting Jehova i wokim i kamapim klia pasin laikim na savetingting bilong em.—Sng. 104:24; Rom 1:20.

3. Olsem 1 Korin 15:21, 22 i kamapim, ofa bilong Jisas i opim rot long wanem samting?

³ Jehova i laik bai ol manmeri i stap amamas inap oltaim oltaim long graun, em naispela ples em i wokim bilong ol i ken stap long en. Tasol Adam na Iv i bikhet long Papa bilong ol, olsem na olgeta manmeri i kisim sin na long dispela rot dai i painim olgeta lain. (Rom 5:12) Jehova i mekim wanem? Kwiktaim em i tokaut long samting em bai mekim bilong kisim bek ol manmeri. (Stt. 3:15) Jehova bai givim pe bilong baim bek ol tumbuna pikinini bilong Adam na Iv na bai ol inap lusim kalabus bilong sin na dai. Long dispela rot, God bai larim olgeta wan wan man long mekim disisen long lotuim em na bai ol inap kisim laip oltaim.—Jon 3:16; Rom 6:23; ritim 1 Korin 15:21, 22.

4. Long dispela atikol, yumi bai skelim wanem ol askim?

⁴ God i tok promis long kirapim bek ol manmeri i dai pinis, olsem na yumi gat sampela askim. Eksampel: Kirap bek bai kamap olsem wanem? Yumi bai luksave long ol wanfamili na ol pren taim ol i kirap bek? Olsem wanem kirap bek bai bringim amamas long yumi? Taim yumi tingim tingim tok promis bilong kirap bek, hau bai dispela i strongim yumi long pilim tru pasin laikim, savetingting, na pasin bilong Jehova long i no les kwik? Yumi ken skelim ol dispela askim.

KIRAP BEK BAI KAMAP OLSEM WANEM?

5. Wai na yumi inap ting olsem olgeta daiman bai i no kirap bek long seim taim?

⁵ Jehova bai yusim Pikinini bilong em long kirapim bek planti milion manmeri, na ating olgeta daiman i no inap kirap bek long seim taim. Wai? Sapos planti manmeri tru i pulap long wanpela hap long seim taim, dispela bai putim hevi long wok bilong oganaisim gut ol samting. Jehova i save oganaisim gut ol wok, na em i no save larim ol wok i paul nabaut. Em i save olsem ol wok i mas ron gut na bai ol manmeri i ken stap bel isi. (1 Kor. 14:33) God Jehova i bihainim savetingting na em i no les kwik taim em i wok wantaim Jisas long redim gut graun paslain long ol i wokim ol manmeri. Jisas tu bai bihainim savetingting na em i no inap les kwik insait long haptaim bilong Wan Tausen Yia, taim em i wok bung wantaim ol lain i abrusim bagarap bilong Armagedon, na ol bai redim kaikai, klos, na haus, bilong lukautim ol manmeri i kirap bek.

6. Olsem Aposel 24:15 i kamapim, Jehova bai kirapim bek ol stretpela man, na em bai kirapim bek husat lain tu?

⁶ Bikpela samting moa em olsem, ol lain i abrusim bagarap bilong Armagedon i mas skulim ol lain i kirap bek; ol i mas skulim ol long Kingdom Bilong God na ol samting Jehova i laik bai yumi mas mekim. Wai? Bikos planti moa bilong ol lain husat bai kirap bek em ol lain Baibel i kolim olsem “ol man nogut.” (Ritim Aposel 24:15.) Ol i mas mekim planti senis na bai ol inap kisim helpim long ofa bilong Krais. Planti milion manmeri i no save long Jehova, olsem na yumi bai mekim bikpela wok tru long skulim ol na bai ol inap kisim stretpela save long God. Ating yumi laik save olsem: Olgeta wan wan bilong yumi bai mekim Baibel stadi wantaim olgeta wan wan bilong ol olsem yumi save mekim long nau? Na ol dispela nupela Baibel sumatin bai stap long kongrigesen na kisim trening bilong skulim ol manmeri i kirap bek bihain long ol? Yumi bai wet na lukim. Tasol yumi save olsem long pinis bilong Wan Tausen Yia, “graun bai pulap long save bilong Jehova.” (Ais. 11:9) Yumi bai amamas tru long mekim planti gutpela wok insait long Wan Tausen Yia!

7. Wai na ol manmeri bilong God bai kisim pasin bilong tingim narapela taim ol i skulim ol lain i kirap bek?

⁷ Insait long Wan Tausen Yia taim Krais i mekim wok king, olgeta manmeri long graun i mas senisim pasin bilong ol na bai ol inap amamasim Jehova. Olsem na ol bai kisim pasin bilong tingim narapela, na helpim ol lain i kirap bek na bai ol inap daunim ol laik nogut bilong sin, na bihainim ol stretpela lo bilong Jehova. (1 Pita 3:8) Ol manmeri bilong Jehova i gat pasin daun na ol bai ‘mekim olgeta samting ol inap mekim bambai God i ken kisim bek ol,’ olsem na lain i kirap bek bai amamas long bung wantaim ol.—Fili. 2:12.

YU TING YUMI BAI LUKSAVE LONG OL LAIN I KIRAP BEK?

8. Wai na yumi inap ting olsem ol manmeri i welkamim ol lain i kirap bek, ol bai luksave long ol wanfamili na ol pren husat i kirap bek?

⁸ I gat sampela risen na yumi inap ting olsem taim ol lain i welkamim ol manmeri i kirap bek, ol bai luksave long ol wanfamili na ol pren. Olsem, taim yumi tingim stori bilong ol lain i bin kirap bek long bipo, i luk olsem taim Jehova i kirapim bek ol manmeri, lukluk bilong ol, wei bilong ol long toktok, na wei bilong ol long tingting bai wankain long wei ol i bihainim paslain liklik long ol i dai. Jisas i tok taim man i dai, i olsem em i slip, na taim man i kirap bek, i olsem wanpela i kirapim em long slip. (Mat. 9:18, 24; Jon 11:11-13) Taim man i kirap long slip, lukluk bilong em na wei bilong em long toktok i save stap wankain, na em inap tingim yet ol samting i stap long memori bilong em. Tingim eksampel bilong Lasarus. Em i dai inap 4-pela de i go pinis, so bodi bilong em i stat long sting. Tasol taim Jisas i kirapim bek Lasarus, kwiktaim 2-pela susa bilong em i luksave long em, na Lasarus tu i luksave long tupela.—Jon 11:38-44; 12:1, 2.

9. Bilong wanem ol manmeri i kirap bek ol bai i no kirap bek wantaim bodi na tingting i gutpela olgeta?

⁹ Jehova i tok promis olsem long Paradais, i no gat man bai tok: “Mi sik.” (Ais. 33:24; Rom 6:7) Olsem na taim ol manmeri i kirap bek, ol bai i gat gutpela helt. Dispela i no makim olsem wantu tasol bodi bilong ol bai kamap gutpela olgeta, nogat. Sapos olsem, ating ol wanfamili na ol pren bilong ol i no inap luksave long ol. I luk olsem insait long Wan Tausen Yia taim Krais i mekim wok king, isi isi olgeta manmeri bai kamap gutpela olgeta. Long pinis bilong Wan Tausen Yia, Jisas bai putim Kingdom i go bek long han bilong Papa. Long rot bilong Kingdom, Jehova bai inapim olgeta samting em i tingting long mekim, na dispela i makim tu laik bilong em long mekim olgeta manmeri i kamap gutpela olgeta.—1 Kor. 15:24-28; Rev. 20:1-3.

OLSEM WANEM KIRAP BEK BAI BRINGIM AMAMAS LONG YUMI?

10. Yu bai pilim olsem wanem taim ol manmeri i kirap bek?

¹⁰ Tingim amamas bilong yu taim yu bungim ol wanfamili na ol pren i kirap bek. Yu ting amamas bilong yu bai mekim yu lap o krai? Yu ting yu bai singim ol song bilong preisim Jehova? Tru tumas, bikpela amamas bilong yu bai kirapim yu long laikim moa yet gutpela Papa bilong yu na Pikinini bilong em.

11. Olsem tok bilong Jisas long Jon 5:28, 29 i kamapim, wanem samting bai kamap long ol manmeri husat i bihainim ol stretpela lo bilong God?

¹¹ Taim ol manmeri i kirap bek na rausim olpela pasin na bihainim ol stretpela lo bilong God, ol bai kisim bikpela amamas tru. Ol bai kisim laip oltaim long graun sapos ol i senisim pasin bilong ol. Tasol ol manmeri husat i no laik bihainim ol stretpela lo bilong God, ol bai no inap kisim laip oltaim long Paradais.—Ais. 65:20; ritim Jon 5:28, 29.

12. Olsem wanem olgeta manmeri long graun bai kisim blesing i kam long Jehova?

¹² Taim Kingdom i bosim graun, olgeta manmeri bai lukim truim bilong tok i stap long Provep 10:22: “Ol blesing bilong Jehova i save mekim man i gat planti samting, na ol dispela blesing i no save bringim pen.” Holi spirit bai stiaim ol na ol bai stap gut tru long sait bilong bilip—ol bai kisim ol pasin bilong Krais na isi isi ol bai kamap gutpela olgeta. (Jon 13:15-17; Efe. 4:23, 24) Long olgeta wan wan de, bodi bilong ol bai kamap strong moa na helt bilong ol bai kamap gutpela moa. Ol manmeri bai stap amamas tru! (Jop 33:25) Sapos yu tingim tingim ol samting bai kamap taim God i kirapim bek ol daiman, hau bai dispela i helpim yu?

PILIM TRU PASIN LAIKIM BILONG JEHOVA

13. Olsem Song 139:1-4 i kamapim, olsem wanem kirap bek bai soim klia olsem Jehova i save gut tru long yumi olgeta wan wan?

¹³ Olsem yumi stori pinis, taim Jehova i kirapim bek ol daiman, em bai givim bek olgeta memori bilong ol wantaim ol pasin bilong ol. Dispela i kamapim klia wanpela samting. Jehova i laikim yu tru, olsem na em i luksave na tingim gut olgeta samting yu putim long memori, na em i tingim gut ol filings, ol tok, na ol samting yu mekim. Olsem na sapos yu dai na God i kirapim bek yu, em bai inap tru long givim bek olgeta memori wantaim ol pasin bilong yu. King Devit i luksave olsem Jehova i save gut tru long yumi olgeta wan wan. (Ritim Buk Song 139:1-4.) Taim yumi tingim olsem Jehova i save gut tru long yumi, dispela i mas kirapim yumi long pilim olsem wanem?

14. Taim yumi tingim tingim olsem Jehova i save gut tru long yumi, dispela i mas mekim wanem long yumi?

¹⁴ Taim yumi tingim tingim olsem Jehova i save gut tru long yumi, dispela i mas mekim na yumi no ken tingting planti. Wai? Tingim olsem Jehova i save wari tru long yumi. Em i tingim tru ol pasin bilong yumi olgeta wan wan. Em i luksave long olgeta samting i kamap long laip bilong yumi we i stiaim ol pasin na tingting bilong yumi. Dispela i mekim isi bel bilong yumi! Yumi no ken tru pilim olsem yumi stap wanpis. Long olgeta wan wan minit long olgeta de, Jehova i stap wantaim yumi na em i save redi tru long helpim yumi.—2 Sto. 16:9.

PILIM TRU SAVETINGTING BILONG JEHOVA

15. Olsem wanem tok promis bilong kirap bek i soim klia savetingting bilong Jehova?

¹⁵ Pret bilong dai i gat bikpela strong long daunim man. Lain bilong Satan i save pretim ol man na tok long kilim ol i dai, na dispela i mekim na ol man i save givim baksait long ol pren o lusim bilip bilong ol. Tasol dispela pret i no gat strong long daunim yumi. Yumi save olsem sapos ol birua i kilim yumi, Jehova bai kirapim bek yumi. (Rev. 2:10) Yumi bilip tru olsem i no gat wanpela samting inap pasim yumi long mekim wok bilong Jehova. (Rom 8:35-39) Tok promis bilong kirap bek i soim klia bikpela savetingting bilong Jehova! Tok promis bilong kirap bek i daunim strongpela trap bilong Satan, na tu, dispela tok promis i strongim tru pasin bilong yumi long holimpas bilip.

16. (a) Yu mas givim wanem ol askim long yu yet? (b) Olsem wanem ol bekim bilong ol dispela askim inap helpim yu long save olsem yu trastim Jehova?

¹⁶ Sapos ol birua bilong Jehova i pretim yu na ol i tok long kilim yu, yu ting yu bai redi long putim laip bilong yu long han bilong Jehova? Olsem wanem yu inap save olsem yu bai trastim God long kain taim olsem? Wanpela samting yu ken mekim em long askim yu yet olsem, ‘Ol liklik disisen mi mekim long wan wan de i soim klia olsem mi trastim Jehova?’ (Luk 16:10) Narapela askim em olsem, ‘Sindaun bilong mi i soim klia olsem mi bilipim tok promis bilong Jehova olsem em bai lukautim mi long kaikai, klos, na haus samting sapos mi putim Kingdom i stap namba 1 samting long laip bilong mi?’ (Mat. 6:31-33) Sapos yu tok yes long ol dispela askim, yu soim klia olsem yu trastim Jehova, na yu bai sanap strong na karim olgeta kain hevi i painim yu.—Prov. 3:5, 6.

PILIM TRU PASIN BILONG JEHOVA LONG I NO LES KWIK

17. (a) Olsem wanem kirap bek i soim olsem Jehova i no save les kwik? (b) Olsem wanem yumi inap soim amamas bilong yumi long pasin bilong Jehova long i no les kwik?

¹⁷ Jehova i makim pinis de na aua bilong pinisim olgeta man nogut long graun. (Mat. 24:36) Em i no inap les kwik na mekim dispela samting paslain long taim em i makim pinis. Em i laik tru long kirapim bek ol daiman, tasol em i wet na em i no les kwik. (Jop 14:14, 15) Em i wetim taim stret em i makim bilong kirapim bek ol daiman. (Jon 5:28) I gat planti gutpela risen na yumi pilim tru pasin bilong Jehova long i no les kwik. Tingim: Jehova i no les kwik, na dispela i opim rot long planti manmeri, na yumi tu, long “tanim bel.” (2 Pita 3:9) Jehova i laik bai planti manmeri moa i kisim laip oltaim. Olsem na yumi mas soim klia olsem yumi pilim tru pasin bilong God long i no les kwik. Hau bai yumi inap mekim olsem? Yumi mas givim bel olgeta long painim ol manmeri “em bel bilong ol i gutpela long kisim laip oltaim,” na helpim ol long laikim Jehova na mekim wok bilong em. (Apo. 13:48) Long dispela rot, ol tu bai kisim helpim long pasin bilong Jehova long i no les kwik.

18. Wai na yumi no ken les kwik long ol narapela?

¹⁸ Jehova bai i no les kwik long yumi; em bai wet inap long Wan Tausen Yia i pinis na bai yumi inap kamap gutpela olgeta. Long nau i go inap long dispela taim, Jehova i redi long lusim ol rong bilong yumi. Olsem na yumi tu i mas lukluk long ol gutpela pasin bilong ol narapela na no ken les kwik long ol. Tingim eksampel bilong wanpela sista; man bilong em i kisim sik bilong tingting planti na em i stop long go long ol miting. Sista i tok: “Dispela i putim bikpela hevi tru long mi. Wantu laip bilong famili bilong mipela i senis na mipela i no mekim ol samting mipela i bin pasim tok long mekim.” Maski i olsem, dispela sista i soim yet pasin laikim long man bilong em na sista i no les kwik long em. Em i askim Jehova long helpim em na em i no givap. Olsem Jehova, em i no tingim tumas hevi; em i tingim tingim ol gutpela pasin bilong man bilong em. Em i tok: “Man bilong mi i gat ol naispela pasin, na isi isi em i wok long daunim pasin bilong tingting planti.” Em i bikpela samting tru olsem yumi no ken les kwik long ol narapela insait long famili o kongrigesen em ol i wok hat long daunim ol hevi!

19. Yumi mas strongim tingting long mekim wanem?

¹⁹ Jisas na ol ensel i amamas tru taim God i wokim dispela graun. Ol bai amamas moa yet taim ol i lukim olsem ol gutpela manmeri tasol i stap long graun, em ol manmeri husat i laikim Jehova na mekim wok bilong em. Na tingim bikpela amamas bilong ol manmeri em God i makim ol long mekim wok king wantaim Krais long heven; ol bai amamas tru taim ol i lukim olsem wok bilong ol i helpim ol manmeri. (Rev. 4:4, 9-11; 5:9, 10) Aiwara bilong pen na hevi bai pinis na ol manmeri bai i gat aiwara bilong amamas, na hevi bilong sik, bel hevi, na dai, bai pinis olgeta. (Rev. 21:4) Long nau, yu mas strongim tingting long bihainim ol pasin bilong Papa, olsem pasin laikim, savetingting, na pasin bilong i no les kwik. Sapos yu mekim olsem, yu bai stap amamas yet maski wanem ol hevi i painim yu. (Jems 1:2-4) Yumi tenkyu tru long tok promis bilong Jehova “olsem bai i gat kirap bek bilong ol man i dai pinis”!—Apo. 24:15.