Yu Ting Man i Stap Gutpela Man Bai Gat Gutpela Sindaun Long Bihain?
Inap planti handret yia, planti man i bilip olsem man i stap gutpela man na i bihainim gutpela pasin em bai gat gutpela sindaun long bihain. Olsem ol man long hap bilong Esia i wanbel long tok bilong saveman Konfusas (551-479 B.C.E.), em i tok: “Samting yu no laik bai ol narapela i mekim long yu, yu no ken mekim long ol.”
WANPELA ROT PLANTI I BIHAINIM
Planti man i bilip olsem man i bihainim gutpela pasin dispela bai mekim em i gat gutpela sindaun long bihain. Ol i traim long soim pasin rispek, mekim gutpela pasin, luksave long wok bilong ol long komiuniti, na mekim ol samting bai maus bilong bel bilong ol i stap gut. Linh, wanpela meri i stap long Vietnam i tok: “Mi bilip olsem sapos oltaim mi bihainim onest pasin na gutpela pasin, mi bai gat gutpela sindaun.”
Sampela em bilip bilong ol long lotu i kirapim ol long mekim gutpela pasin. Wanpela man nem bilong em Hsu-Yun i stap long Taiwan i tok: “Mi lainim olsem, man i mekim gutpela pasin taim em i stap laip dispela i makim olsem bihain long em i dai em bai stap amamas o em bai kisim bikpela pen.”
WANEM SAMTING I KAMAP?
Em tru olsem taim yumi mekim gut long ol narapela, yumi kisim planti gutpela pasin. Tasol planti em ol i traim long mekim gutpela pasin long ol narapela, ol i luksave olsem dispela i no save kamapim ol samting ol i laikim. Wanpela meri nem bilong em Shiu Ping i stap long Hong Kong i tok: “Mi lukim olsem ol man i save mekim gutpela pasin long ol narapela, planti taim i no gat wanpela i mekim gutpela pasin long ol. Mi traim bes bilong mi long lukautim gut famili na mekim gutpela pasin. Tasol marit bilong mi i bruk, man bilong mi i lusim mi na pikinini man bilong mi.”
Planti i lukim olsem lotu i no save helpim man long kamap gutpela man. Etsuko em wanpela meri i stap long Japan i tok: “Mi joinim wanpela lotu na mi save oganaisim ol samting em ol yangpela manmeri i save mekim. Mi kirap nogut long lukim olsem sampela manmeri long lotu bilong mi i mekim ol pasin i no stret, resis long kisim namba, na paulim mani bilong lotu.”
“Mi traim bes bilong mi long lukautim gut famili na mekim gutpela pasin. Tasol marit bilong mi i bruk, man bilong mi i lusim mi na pikinini man bilong mi.”—SHIU PING, HONG KONG
Sampela strongpela lotu lain i bel hevi olsem ol i mekim gutpela pasin tasol ol yet i no kisim gutpela samting. Van em wanpela meri long Vietnam i pilim olsem. Em i tok: “Olgeta de mi baim ol prut, plaua, na ol kaikai na ofaim long ol alta bilong ol tumbuna bilong mi i dai pinis, mi ting olsem mi bai kisim ol gutpela samting long bihain. Maski mi mekim ol dispela gutpela pasin na mi bihainim olgeta pasin bilong lotu inap planti yia, man bilong mi i kisim wanpela sik we i mekim na em i no inap wokabaut. Bihain, pikinini meri bilong mi i gat 20 krismas i stap long skul long narapela kantri em i dai.”
Man i stap gutpela man, dispela tasol i no inap helpim em na bai em i gat gutpela sindaun long bihain, tasol wanem samting inap? Bilong bekim dispela askim, yumi nidim wanpela samting bilong stiaim yumi, we i gat ol tok i bekim ol askim bilong yumi na stiaim yumi long rot bilong kisim gutpela sindaun long bihain. Yumi inap kisim we dispela gutpela tok bilong stiaim yumi?