Gutpela Sindaun Long Bihain—Olgeta Man i Laikim
Yu laikim wanem kain sindaun long bihain? Olsem planti man, ating yu laik bai yu na famili bilong yu i gat gutpela sindaun long bihain—stap amamas, gutpela helt, stap bel isi, na gat planti samting.
Tasol planti man i no ting ol bai gat kain sindaun ol i laikim long bihain. Ol hevi olsem COVID-19 i kamap wantu tasol na i bagarapim sindaun bilong ol man, mekim ol i kamap rabis, na i kilim i dai planti man. So ol i pilim olsem ol bai no gat gutpela sindaun long bihain.
Ol man i no save wanem samting bai kamap bihain, olsem na ol i wok strong long painim wanpela samting bilong stiaim ol bilong i gat gutpela sindaun long bihain. Sampela i bilip olsem God i makim pinis ol samting bai painim ol long bihain. Planti i wok strong long kisim gutpela skul na mani kago, ol i ting ol dispela samting bai helpim ol long kisim ol samting ol i laikim. Ol narapela i pilim olsem sapos ol i stap gutpela man, dispela tasol inap helpim ol long i gat gutpela laip.
Yu ting ol dispela samting bai stiaim yu long kisim kain sindaun yu laikim long bihain? Bilong painimaut, yu mas skelim ol dispela askim:
Wanem samting i stiaim ol samting bai painim yu long bihain?
Yu ting gutpela skul na mani inap helpim yu long i gat gutpela sindaun?
Yu ting sapos yu stap gutpela man dispela i makim olsem bai yu gat gutpela sindaun long bihain?
Yu inap painim we ol tok bilong stiaim yu long kisim gutpela sindaun long bihain?
Dispela nius Wastaua bai helpim yu long painim bekim bilong ol dispela askim?